Sunday, August 21, 2016

Summer Favorites 2016 مفضلاتي بالصيف






ورجعنااا للمدونة بعد اجازة اعتذر عن الانقطاع بس كنت فعلا مشغولة واحتجت اخذ اجازة بسيطة من المدونة ♥

من زمان عن مواضيع المفضلات وتراها من المواضيع اللي احب اكتبها واعرف انها مفضلة عندكم كمان فحبيت اعمل بوست مفضلاتي بفترة الصيف واللي قاعدة استخدمه كثير مؤخرا وان شالله تعجبكم..


اول شي حابة ابدأ فيه مفضلات البشرة والشعر



Clarisonic Mia Fit
جهاز كليراسونك ميا فت الجديد نزل برمضان واخذته معايا بسفرتي بالعيد، انا اولريدي من محبين الكليراسونك ومااستغني عنها وكتبت عنها كثير قبل شوفو هذه البوست

كل شيء عن جهاز كلاريسونك

هذا الجهاز الجديد مخصص للوجه بس وميزته عن باقي الاجهزة ان حجمه اصغر واخف وبطاريته تقعد وقت اطول يعني ممتاااز للسفر شحنته مرة وحدة قبل مااسافر واخذته معايا ٢٠ يوم مااحتجت اشحنه.

واقي نيتروجينا Neutrogena Ultra Sheer Sunscreen
اظن اني حاطته قبل بوحدة من المفضلات كمان وبرجع احطه هنا كمان
احب انه ملمسه خفيف ومو دهني ولا يخلي الوجه مبيض بزيادة زي اغلب كريمات الوقاية من الشمس.
استعمله كل يوم قبل المكياج ومااخرج من البيت بدون مااحطه ابدا.

بخاخ ايروما من لش LUSH Eau Roma Water

كتبت عنه بانستغرام البخاخ منععععششش على طول يجيك احساس نظافة وبرودة واسترخاء ببشرتك بيرفكت خصوصا بالحر نص اليوم وعادي تقدري تستعمليه بعد المكياج.

ماسك الديتوكس من بوبي براون Bobbi Brown Instant Detox Mask
ماسك طيني مخصص لتنظيف البشرة والمسام 
اللي احبه انه يتحكم بالدهون الزايدة على سطح البشرة وينعم المسام ممتاز للبشرات المختلطة والدهنية
احلى شي إن علبته عصار انظف بمليون مرة من العلب العادية.

مجموعة بمبل اند بمبل سيرف للشعر الكيرلي
 Bumble & Bumble Surf Hair Products 
المجموعة عبارة عن شامبو وبلسم وسبراي للشعر
اكثر شي حبيته بالمجموعة واللي حسيته يستاهل البخاخ.
قوامه شويه غريب لما تحطيه على شعرك راح تحسيه قاسي شويه بس هوا هذا اللي يعطي النتيجة المطلوبة
بإنه يخلي الشعر ويفي حلو زي كأنك سبحتي بالبحر وريحته زي البحر على فكرة.
جدا عجبني اخذته من بووتس لندن.


مفضلات الجسم


Vaseline Spray Moisturiser 
بخاخ فازلين المرطب هو منتج مو جديد موجود من سنين بس توي اللي قدرت القاه واجربه ومرة عجبني!
سريع وخفيف وتتشربه البشرة بسرعة مرة ينفع للي تكسل ترطب جسمها بدقيقة وحدة تخلص.

مجموعة بينا كولادا من ذي بودي شوب The Body Shop Piña Colada
احلى مافي المجموعة ريحتها ♥
مرة صيفية تجيب السعادة، اللي تحب روايح الكوكونت والفواكه لا تفوتها
خصوصا الشاور جل والسوربيه مرة عجبوني
السوربيه منتج فكرته مميزة زي لوشن جل شفاف بارد مايسيب اي اثر دهني

تان هولا للجسم من بنفت Hoola Zero Tanlines Body Bronzer
برونزر مؤقت للجسم يعني تحطيه وينغسل بالشاور
لونه حلو مو اورنج بس لو بشرتك على سمار ماراح يبين عليك
يناسب البشرات البيضا والحنطية الفاتحة والمتوسطة
تركيبته مو دهنية وتتوزع بسهولة عالبشرة وثابت مايبقع بالملابس وماله ريحة.
كاتبين انه ممكن تحطي اكثر من طبقة تقوي لونه حاولت ومازبط الا طبقتين بس
لو اكثر من طبقتين راح يبدا يبان ملطخ.
وبشكل عام حبيته وحسيته حل سريع للي تحب التان بدون ماتتعرض للشمس.

فرشة البرونزر كمان مرة حبيتها المفروض اصورها مع المكياج ماادري ايش جابها مع منتجات الجسم هههه
تشبه الى حد كبير فرشة ريل تكنيك للبلاشر احب اوزع فيها البرونزر البودرة للوجه نااعمة وشكلها كيوت.

Bath and Body Works Tiki Mango Mai Tai Body Spray
بخاخ باث اند بدي وركس من مجموعتهم الجديدة للصيف
ريحته نفس احساس مجموعة بودي شوب كذا صيفي ومنعش وخفيف.

St Tropez 1 Hour Tan Kit
مجموعة سان تروبيه للسيلف تان اخذ جائزة الور بيوتي احسن سيلف تان واتفق معاهم
هذا مختلف عن حق بنفت انه سلف تان يعني تحطيه تخليه لفترة وتغسليه ويجلس اللون معاك كم يوم
الي يميز هذا التان انه ممكن يعطيك لون بساعة وحدة مو زي باقي انواع السلف تان تحتاج وقت طويل
بس شخصيا احب اخليه ساعتين او حتى ٣ ساعات عشان يعطي لون اغمق
تركيبته حلوة خفيفة مايبقع ولا يلطخ مافيه ريحة السلف تان المزعجة مرة يجنن وباخذ الحجم الكبير
المجموعة جا معاها سكرب قبل التان ولوشن معزز للتان واداة توزيع وحسيتها ممتازة ومتكاملة للي اول مرة حابة تجربه
اخذته من صيدلية بووتس لندن

Dove Gradual Tan
هذا مرطب لوشن عادي زي باقي المرطبات اللي تستخدميها بشكل يومي بس ميزته يعطيك تان تدريجي بدون حوسة السيلف تان
يعني لو حطيتيه كل يوم لمدة ٥ ايام او اسبوع بيعطيك لون مرة حلو وكل ماحطيتي منه كل ماحافظتي عاللون وقت اطول
ينفع كمان تستخدميه بعد السيلف تان يحافظ عاللون وقت طويل.
للاسف ماعمري شفت عندنا منتج زيه اخذته من بووتس لندن
ممكن تطلبوه اون لاين.

مفضلات المكياج



اول شي بكلمكم عنه
Nars Velvet Matte Skin Tint 



من اكثر الفاونديشنز اللي ناشبة فيهم حاليا لانه مطفي وثابت ممتاز للجو الحار
يعتبر فاونديشن خفيف لانه تنت لكن تغطيته مو خفيفة اشوفها جدا مناسبة ويوحد البشرة بدون مايكون احساسه ثقيل
تركيبته مطفية ينعم المسام وفيه حماية من الشمس.
مرة حلو بالسفر او للدوام او طلعات الصيف
اللي احبه بنارس وقلتها قبل وبرجع اقولها ان درجاتهم دايما على صفار مناسبة لبشراتنا ومنزلين كثير درجات تقدري تلاقي درجتك بسهولة.



بودرة هايلايت ديور نيود اير
كل الشركات قاعدة تتنافس عالهايلايت حاليا وكلنا نبغى نشتري كل هايلايتر ينزل ماادري ليش
مع انه اتحدا لو وحدة فينا خلصت علبة هايلايت وحدة بس :(
المهم ماعلينا اللي تعاني من ذي المشكلة احب اقولك لا يفوتك هايلايتر ديور
لمعته جميلة ناعمة مافيها قليتر ولونه شامبين حلو على اغلبية البشرات.

Benefit Watts Up
كمان هايلايتر بس كريمي اللي هوا واتس اب من بنفت
لمعته خفيفة ناعمة اكثر شي استعملها قبل الفاونديشن عشان لما احط الفاونديشن يندمج معاه ويبين الوجه صحي بشكل مررررة طبيعي ومناسب لكل يوم.

Benefit Matte Rescue 
 أظن كمان هذا اتكلمت عنه بمفضلات سابقة ويستحق ارجع اتكلم عنه
برايمر مطفي خفيف يتحكم بالدهون بدون ماينشف البشرة.

Gucci Face Blush 020
بلاشر قوتشي رقم ٢٠ لونه كورال مشمشي على بينك دافي وفيه لمعة خفيفة بس ماهي قليتر لا تعطيك شكل خدود حلو وصحي ولونه يجنن اغلبية البشرات ويجي مع كثير الوان ميك اب
يشبه الى حد كبير بلاشر اورغازم من نارس بس هذا لمعته اخف وأحلى حق نارس مرة شيمري
استعملته يوميا بالسفر مرة حبيته

Clarins Supra Volume Mascara 
الماسكارا هذه من كلارنس تعتبر بيسك يعني مااقولكم مررررررة واو وتخلي الرموش دراماتيك لا
اللي حبيته فيها انها بيسك ماسكارا عادية مناسبة لكل يوم تعطي سواد حلو وكثافة معقولة
بدون لا تسيح ولا تأذي الرموش وتنشال بكل سهولة
هذا اكثر شيء حبيته فيها وخلاني استخدمها بشكل يومي

MAC Cconceal And Correct Duo
كوركتر من ماك بلونين اصفر واورنج ونازل بعدة درجات انا اخذت Rich Yellow/Burnt Coral
درجة الاورنج اللي فيه ماهي غامقة لونها على مشمشي اكثر وممتازة للي هالاتها متوسطة مو غامقة
الاصفر كمان لونه جدا ناسبني كهايلايت انور فيه تحت العين والاماكن اللي حابة انورها
تركيبته تشبه برولونق وير بس على اخف يعني مطفية وثابته بس ماهي ثقيلة وعجبني مرة وحبيت طريقة التوزيع انها بفرشة.

اقلام الشدو من بوبي براون Bobbi Brown Eyeshadow Stick 
انا اتكلمت عنهم قبل بس حبيت ارجع اضيفهم لانهم نزلو الوان صيفية جديدة برونزية وذهبية مرة حلوة ومناسبة للصيف
احب انها سهلة وضد المويه ودمجها سريع ولونها واضح.

اقلام الاكحال
عجبوني ٣ مؤخرا اكحال ماك مودرن تويست اخترتلكم اللون اللحمي Nothing On لانه وبلا منازع اكثر لون استخدمته! لونه بيج طبيعي جدا وثابت جوا العين اللي تدور على كحل بيج مرة انصحها فيه.
اكحال ميك اب فوريفر اكوا اكس ال خصوصا اللون البني
 سويت مرة تتوريال صغير فيه بسناب كنت استعمله اكثر شي بيس للشدو الخفيف تركيبته كريمية ولونه قوي وكمان مرة ثابت وضد المويه.
كحل ذي بودي شوب فلفت هذا اعتبره بديل لكحل ماك المودرن تويست بس ماعندهم منه الوان كثير بس الاسود وجميل اللي تدور على كحل اسود كريمي تجربه.

اخر مفضلات المكياج روج ميتالك من اربان ديكاي
طبعا لانه دارجة حاليا تريند الارواج الميتالك تشجعت اجربه وماتوقعت بيعجبني لهالدرجة! لونه بني دافي مع لمعة خفيفة
وتركيبته ناعمة ماتنشف الشفايف واغلبية ارواجهم اللي نزلوها مؤخرا مرة حبيتهم
الروج اسمه Conspiracy




هذه اكثر الوان المناكير اللي حطيتهم بالفترة الاخيرة
اللون الفضي ميتاليك كأنه مرايه برضو دارج هالفترة من ديور اسمه Mirror
مناكير nails Inc مرة حلوة مناكيراتهم عندي منهم مجموعة اكثر شي حبيته اللون اللحمي هذا اعتقد درجته ٢٥٣ مكتوب تحت العلبة.
ومن ديور كمان لونين بينك اعشق هالدرجات رقم ٢٦٢ و ٥٨٢



وبس ان شالله حبيتو المفضلات اشوفكم ان شالله ببوست قريب.




❤❤

Twitter | Instagram | Email

6 comments:

  1. شرح جميل
    من متابعين مدونتك الجميله
    بس ياريت تكبري الخط شوي ^

    ReplyDelete
  2. حبيت البوست شامل لكل شي 👍🏼

    شكرا وفاء 😍

    ReplyDelete
  3. تحمست اجرب كم منتج ..
    بس بالنسبة للكلاريسونك مخططة أشتري وحده بس مني عارفه ايش اخذ
    الميا فت لأن مميزاتها حلوة وفي نفس الوقت صغيره ولا السمارت لأنها شاملة واقدر استخدمها للوجه والجسم والأقدام ( مع العلم اني مو مشتريتها من قبل )

    شكراً وفاء ومستنين البوست الجاي
    + ياليت تنزلي اشياء على اليوتيوب
    خصوصا بعض المواضيع الي تتكلمي عنها في سناب وكثير مفيده بس للأسف تروح

    ReplyDelete
  4. "Really I loved" البوست مررا ج ميييل 😻😻😻

    ReplyDelete

Related Posts Plugin for WordPress, Blogger...