Kiko Makeup Milano Review تجربتي لبعض منتجات ماركة كيكو الإيطالية

كيكو ماركة إيطالية مو موجودة بالخليج ومتوفرة فقط بأوروبا وأعتقد فتحو محل واحد بأمريكا بس مو متأكدة فين..

تعتبر ماركة بروفيشنال تعليبهم حلو وجودتها عالية وشخصيا تذكرني كثير بماركة ماك وإنجلوت! وينزلو كل فترة كولكشنات حلوة زي ماك وأحيانا يعملو تخفيضات ماتتفوت على كل شيء حتى بالموقع.

أسعارها معقولة خصوصا بالتخفيضات هذا إذا إشتريتيها من اوروبا بس بالنسبة لنا إحنا بتكلف شوية زيادة مع الشحن..

طلبتها من موقعهم

http://www.kikocosmetics.com

على حظي كنت بصور طريقة الطلب من الموقع ومغلق للصيانة :(

بس طريقة الطلب سهلة اللي متعودة تطلب من النت ماراح تلقى صعوبة إن شالله.. يحتاج يكون عندك فيزا وصندوق بريد أوروبي، اللي عندي بريطاني من خدمة Shop and Ship بأرامكس.

ماجربت كل منتجاتهم طلبت كم منتج كنت حابة أجربهم وعليهم مدح كثير وعجبوني كلهم ماعدا منتج واحد ومو أنا طالبته جا هدية مع الطلب لووول

راح أكتب عن كل منتج بالتفصيل وبعدها صورة سواتش لكل المنتجات

وببدأ أول شيء بأكثر منتج عجبني 

Water Eyeshadow 

أول شيء من غير ماأتكلم عن جودتهم، شكل الشدو يعذب :(

تركيبة الشدو من أجمل الشدوهات اللي ممكن تجربيها وتشبه شدوهات ماك الليميتد من مجموعة إكسترا ديمنشن

اللي يميزها إن نوعيتها باودر بس مررررة ناعمة وتحسيها كأنها كريمية زي الزبدة

صبغتها قوية جدا من مسحة يبان اللون وبعض الألوان تحسي فيها لمعة ناعمة وفخمة مو قوية تبين أكثر إذا إستخدمتيها مبلولة.

المنتج هذا أنصحكم فيه من كل قلبي خصوصا لكل وحدة تحب الشدوهات لازم تجربهم!!

ببدأ بالألوان من اليسار لليمين والسواتشات تشوفوها تحت بأخر صورة..

درجة 218

لونه وردي مشمشي بلمعة ذهبية مرة جميل عالجفن مع شدو بني تشوكلت دافي عالكريس 

وكمان أحطه فوق البلاشر بشكل بسيط يخلي لونه مميز ولمعته حلوة.

درجة 228

أحسه Perfect taupe!

كثييير ماركات مسوين هالدرجة بس أعتبر حق كيكو أجملهم مع ساتين توب من ماك.

لونه بين البني والبنفسجي والرمادي مناسب لكل وقت وفيه لمعة بسيطة تبين جميييلة إذا بخيتي الفرشة بشوية فكس بلس من ماك..

درجة 215

 هذا اللون ساحر مع سموكي أسود وروج نيود بيج! *-*

أحطه بوسط الجفن ويعطي السموكي لمسة مميزة وجميلة أحب هالدرجة مرة! صح ممكن البعض يخاف من الأزرق بالشدو إنو ممكن يبين قديم بس هذا اللون أحسه جميل جدا ودرجة مميزة 

فيه لمعة مرررة حلوة ويزيد جمالها إذا إستخدمتيه مبلول.

درجة 201

لون Taupe على وردي بس فاتح وناعم بيرفكت للإستخدام اليومي وحلو كمان كهايلايت جدا بسيط لعظمة الخد.

درجة 208

هذه الدرجة إذا كنتي مفكرة تاخدي شيء واحد من كيكو هي اللي أنصحك فيها!

كتبت عنها بإنستقرام قبل وإنها مرررة قريبة لهايلايت ماك الليمتيد المشهور Whisper of gilt 

مرة تشبهلها عالوجه مافي أي فرق بالنتيجة

نفس التركيبة ناعمة جدا واللمعة قوية وجميلة 

هايلايت ماك ليميتد وإحتمال ينزل بمجموعات قادمة وحق كيكو موجود على طول بالموقع.

Liquid Eyeliner

أخذت واحد أسود ضد المويه والثاني غليتر 

الأسود

نفس أيلاينر ماك Liquidlast Liner قلتلكم أحس الماركة تشبه لماك كثير وهذا واحد من منتجاتهم اللي حسيته يشبه لمنتج من ماك.

نفس السواد حق ماك سواده جدا قوي ونفس الثبات كمان ضد المويه ثباته عالي وحاولي ماتغلطي كثير بالرسم لأن راح تحوسي عشان تمسحيه، وصعب الإزالة مايروح إلا بمزيل مكياج زيتي.. حتى السواتش على يدي بعد ماخلصت رحت غسلته بصابون ماراح إلا بمزيل مكياج، يمكن بعضكم يشوفها عيب أنا أشوفها ميزة لأن عيوني تدمع والأيلاينر يختفي ويحوس وهذا بالعكس ثابت.

الريشة رفيعة جدا ومرنة أحب هالنوع من الريش بالأيلاينر متعودة عليها.

الغليتر

أول مرة أجرب أيلاينر غليتر شفت زيه من اربن ديكاي وتحمست له كثير بس حبيت أجرب حق كيكو بما إنه أرخص

ومرررررة عجبني!! أحطه تحت العين بالزاوية الداخلية بس خط بسيط يعطي لمعة حلوة خصوصا لما أسوي سموكي لبنت عيونها صغار هالطريقة تفتح عينها أكثر وتوسعها مع هايلايت بزاوية العين.

كمان اللي تحب تسوي أيلاينر جريء ممكن ترسمي خط أسود عادي فوق عينك ومشي فوقه بالغليتر ايلاينر يعطي لوك خطير ومميز.

Eye Kajal

الأكحال جميلة وثابتة ولونها واضح ماهي مرة كريمية تعتبر من الأكحال الناشفة شويه وهذا اللي يخليها تثبت أكثر وماتسيح.. بس مقارنة مع أكحال ماك وميك اب فوريفر وأربن ديكاي تعتبر أقل منهم شويه من ناحية وضوح اللون والثبات بس على سعرها حلوة.

الأخضر رقمه 112 والأبيض 101

 Smart Lip Pencil & Kiss Balm 

المحدد مو واو بس حلو وممكن تلاقي نفس جودته بالدرق ستور زي ريميل ونكس.

المرطب الملون جدا فاشل! وهو اللي قلت بالبداية إنه جا هدية أتوقع وقت ماطلبت كان فالنتاين أو شيء زي كذا وجا هدية مع الطلب. ماحبيته أبدا مايعطي أي لون وينشف الشفايف بشكل مؤذي..

Ready To Go Nail Art

لصقات الأظافر جمييييلة والديزاين هذا بالذات حبيته
مرة مريحة بالإستخدام وتعطي شكل حلو أنا أحطها على ظفر واحد والباقي لون سادة أحس يطلع شكلها أرتب
ممكن لو كان ديزاين ثاني ينفع أحطه على كل الأظافر أحس بتريحني مرة
لأن على طول تثبت وماتطيح وأقدر أشيلها بسهولة.

هذه السواتشز لكل المنتجات اللي تكلمت عنها.. للأسف اللمعة بالألوان مااعرف أبينها بالتصوير :(

سمعت كثير عن أرواجهم المطفية والكريمية ونفسي مرة أجربهم!

وكمان من الأشياء اللي مدحوها الماسكارات والبرونزرات والبلاشرز إن شالله لو طلبت منهم مرة ثانية أكيد بطلبهم.

وكيكو مو بس عندهم مكياج حتى عندهم منتجات عناية بالبشرة والجسم ومنتجات للتان 

ماادري إذا بقدر أطلبهم أو لا لأن ارامكس مو كل شيء يشحنوه :\ المناكير مممرررة نفسي أجربها بس مايشحنو مناكير من البريد البريطاني! إن شالله إذا رحت أوروبا حاطتهم بأول اللست.

إن شالله عجبكم الريفيو ولو جربتي أي منتج من كيكو شاركينا تجربتك بالكومنتس :*

❤❤❤

Twitter | Instagram | Email