Zoeva Brushes Review ريفيو فرش زويفا وطريقة الطلب

فرش زويفا شوفتوها في بوست مشتريات الفرش هنا 

واليوم بكتبلكم ريفيو عنها وعن كل فرشة من اللي أخذتهم حسب إستخدامي وتجربتي وأكيد طريقة الطلب.

زويفا هي ماركة المانية إشتهرو بالفرش من بدايتهم بس مؤخرا كمان نزلو ميك اب
والماركة فرضت وجودها بجودة منتجاتها العالية وسعرها المعقول
وخدمتهم الممتازة خصوصا وإنهم موقع أون لاين ومالهم محلات.

أنا حبيت أجرب الفرش أكثر شيء لأن مرة سمعت عليها مدح كثير وإخترت كم فرشة عجبوني




وعندهم مجموعات فرش متنوعة تجي مع شنطة جلد فخمة وتقدري تستخدميها كشنطة مكياج
والفرش المفردة برضو تجي بتغليف حلو وشنطة كبيرة وكل فرشة مغلفة لوحدها بمحفظة صغيرة.

صناعة الفرش عندهم مختلفة وفيه مجموعات إحترافية أكثر وبجودة أعلى
مكس بين شعر طبيعي وشعر صناعي وبعضها تكون غير مصبوغة
ومجموعة كاملة بس شعر صناعي للنباتيين اللي مايحبو يستخدمو أي فرش بشعر طبيعي.
يعني عندك خيارات وإختاري اللي يعجبك من ناحية نوع الفرشة
واللي لاحظته إن كلها مصنعة بجودة عالية وشعر نااعم جدا وحتى المعدن ومسكة الفرشة ثابتة وجودتها ممتازة.
غسلتها مرة وماطاحت ولا شعره ورجعت لشكلها الطبيعي.

المبتدئات جدا أنصحكم فيها خصوصا لو أخذتي من المجموعات الكلاسيك عندهم للوجه والعين أغلب مجموعاتهم حسيتها متكاملة ومختارينها بعناية.


ريفيو لكل فرشة من اللي طلبتهم

100/Luxe Face Finish

حجمها كبير وبزاوية وبالنسبة ليا مرة بيرفكت للبرونزر!
أوزعه فيها على حدود الوجه وتحت عظمة الخد توزعه بشكل مدموج وناعم وسريع لأنها كبيرة وشعرها ناعم بشكل خيالي :(
إذا ماأخذتي كمية كبيرة من البرونزر مستحيل يبين متكتل مع هالفرشة
وتنفع كمان لباودر الوجه لأنها نفس الشيء توزع الباودر بخفة وشكل سريع بدون لا تتكتل.

126/Luxe Cheek Finish

حجمها ممتاز للبلاشر مو صغيرة ولا كبيرة ومو جايه مرة فلفي
بالعكس شويه متماسكة وتوزعه في المكان المطلوب
لأن مو حلو البلاشر لمن يجي على حدود الأنف أو لمن ينزل عن عظمة الخد عشان كذا يفضل تستخدمي فرش بنفس هالحجم..
جميلة وأظن موجودة بأغلب مجموعات الوجه عندهم.

109/Luxe Face Paint

فرشة الكونتور الجميلة! *-* أكثر فرشة كنت متحمستلها.
تشبه فرش بنفت الصغيرة اللي تجي في بوكسات البلاشرز بس شعرها أنعم
تسوي كونتور محدد وجميل تحت عظمة الخد وحتى على حدود الأنف والجبهة وتقدري تدمجيه بنفس الفرشة
مرة رائعة وتستخدم للكونتور الباودر والكريمي عشقتها :*

227/Luxe Soft Definer

كثير ماركات حاولو يقلدو فرشة ماك ٢١٧ بس أغلبهم ماكانت بالزبط نفسها هذه اللي من زويفا بكل ثقة أقولكم نفسها بالزبط!
نفس نتيجة الدمج والنعومة وتماسك الشعر وكل شيء مافي فرق بالنتيجة اللي تعطيك ابدا وسعرها أرخص بكثير
والفرشة هذه مهم تكون عندك من أي ماركة سواء ماك أو زويفا أو سيقما لأنها مرة تريحك بدمج الشدو وتوزيعه وتعطيك نتيجة نظيفة ومرتبة.

234/Luxe Smokey Shader

هذه كمان مقاربة لثاني أهم فرشة للعيون من ماك وهي ٢٣٩
فرشة مسطحة ومتماسكة لتوزيع الشدو وتعطيك لون قوي وحسيت فرش زويفا أقرب لفرش ماك من سيقما لأن جودتها أعلى بكثير من سيقما صراحة.

228/Crease

هذه فرشة دمج بشكل يختلف شويه عن الأولى وأحسها مهمة ومااقدر أستغني عنها لأنها جايه أكبر منها ومدببه أكثر أقدر أوزع فيها شدو بالكسرة أو أدمج ألوان مع بعض بنفس مساحة كسرة الجفن ماتاخذ مساحة كبيرة وماتوزع الشدو بكل مكان.

جدا جميلة هالفرشة وكمان مرة ناعمة.

طريقة الطلب 

الموقع يشحن انترناشونال لكل مكان وعندنا بالسعودية عن طريق DHL يعني تضمني الشحنة توصل لفرع دي اتش ال بمدينتك..

يقبل فيزتنا ويقبل الباي بال أنا أستخدمته بالطلب.

رابط الموقع

https://www.zoeva-shop.de


أول ماتفتحيه من فوق عاليسار غيري اللغة إنجلش إلا إذا تفهمي لغتهم p;

بعدين عند خانة Shop تصفحي الموقع وإختاري الفرش أو المجموعة اللي تناسبك وضيفيها للباسكت عن طريق الضغط على كلمة Buy تحت كل منتج

ولمن تختاري كل المنتجات اللي حابتها تروحي للباسكت من فوق عاليمين..

تحت الباسكت إختاري الدولة اللي حابة تشحني عليها عشان يحسبلك سعر الشحن والأسعار كلها باليورو وتحويل العملة سوو بحث بقوقل.

شايفين السعر أعتبره خيالي صراحة لأني حطيت مجموعة فرش وفرشتين زيادة ومع الشحن للسعودية ماكلفت ٤٠٠ ريال

وفيه خانة الكوبون أنا ماعندي كوبون ودورت مالقيت بس لو عملو عروض ولقيتي كوبون حطيه.

بعدين تكملي قو تو تشيك أوت وتحطي معلوماتك وإسمك وإيميلك وعنوانك..

الشحن إختاري Dhl

والدفع إخترت باي بال

أخر شيء إضغطي Place Order عشان يكتمل الطلب وراح تجيك رسالة عالإيميل بالفاتورة ومتى ينشحن وكل التفاصيل.

خدمتهم بالرد ممتازة ولو واجهتك أي مشكلة تواصلي معاهم.



وبس إن شالله حبيتو الريفيو خصوصا اللي ناويين يطلبو منهم وتسوق ممتع إن شالله :*

❤❤❤

Twitter | Instagram | Email