July Favorites 2015 مفضلات شهر جولاي

حسيت ان السنة مرت بسرررررعة مو مصدقة خلصنا نص السنة :\

شهر جولاي بالنسبة لي دايما اجمل شهور السنة!

 صيف واجازة وحفلات ومناسبات وشهر عيد ميلادي كمان p;

دايما اكثر شهور السنة سعادة بالنسبة ليا ♥

بالنسبة للمفضلات كان فيه كثيييير منتجات جديدة جربتها وكثير حبيتهم بس ماحبيت احطهم كلهم وتصير تو متش فاخترت الافضل واللي فعلا عجبوني الشهر الماضي ♥

 مفضلات المكياج

اربن ديكاي احب أقول ان منتجاتهم الجديدة مرة رائعة! بسويلهم تدوينة مفصلة مع مفاجأة لكم ان شالله بس اكثر شي حبيته الشهر الماضي

باليت السموكي هذه الجديدة

الوانها درجات سموكي عادية شيء شيمري وشيء مطفي بس لمن استخدمتها حسيتها عملية واستخدمتها بالعيد

درجات الرمادي الشيمري مررة جميلة والبني المطفي حلو للحواجب وفيها هايلايت مطفي تحت الحاجب حسيتها متكاملة الباليت لو ماعندك الوان شبيهة فيها كثير طلي عليها اذا نزلت.

منتج العيون الثاني اللي عجبني هو اقلام الايشادو من بوبي براون وميك اب فوريفر 

تكلمت عنها كثير هالشهر ولازم تكون من ضمن مفضلاتي 

اعتبرها متعددة الاستخدامات ممكن استخدمها اي شادو لوحدها او بيس تحت الشدو وحتى ممكن استخدمها داخل العين زي الكحل

ميزتها ثااابتة مرة وضد المويه وسهلة بالتوزيع زي القلم توزعيه عالجفن وتدمجيه وخلاص حتى المبتدئات راح تسوي فيه لوك اي شادو بكل سهولة.

حقيقة مو بس هذه الماركتين اللي مسوين هذه الفكرة فيه كثير ماركات بس هذه اللي جربتها انا وحبيتها.

الالوان اللي عندي:

بوبي براون 

Dusty Mauve لونه موفي على بني دافي 

Heather Steal لونه رمادي بلمعة استخدمه بيس بالعيد قبل شدو اربن ديكاي *-*

ميك اب فوريفر 

Me-50 لونه برونزي ذهبي ممتاز لكل يوم

الارواج المطفية كمان حقة اربن ديكاي مرة عجبتني ونوعيتها المطفي المريح عالشفايف ماينشفها ابدا بالعكس عملي وثباتها ممتاز

اكثر الوان عجبتني 

1993 لونه البني المطفي حق التسعينات

Bittersweet لونه وردي على موف شويه اللي يعرفني بيعرف قد ايش اموت بهذه الالوان :*

 محدد مارك جيكوب اول مرة اجرب محدداتهم وماخيبت ظني ابدا!

لونه واضح وتركيبة المحدد نفسها كريمية مو ناشفة واللي عجبني اكثر شيء انه يتلف من تحت مايحتاج بري مرة عملي بالسفر والشنطة الدرجة اللي عندي Prim Rose 304 لونه وردي على بني شويه قريب من سور حق ماك.

المناكير

 أجمل لون عندي على طول ♥

اعشق البيبي بينك

هذا من فورملا اكس تلاقوها بسيفورا اسم الدرجة intensity 

هذا سواتش من النت

وتركيبة فورملا اكس مرة كويسة لونها بقمنتد وماتتقشر بسرعة

وترى عندهم درجات كثييييييييرة بكل الالوان.. البينك احترت وانا ادور عشان لقيت الدرجة اللي ابغاها.

مفضلات العناية بالشعر والبشرة

شاور جل وغسول يد جو مالون ريحة Orange Blossom

ماركة جو مالون تعتبر Luxury فخمة وراقية حلو تدلعي نفسك فيها بين فترة والثانية 

مشهورين بالعطور وروايحهم مميزة خاصة فيهم وبمجموعات الجسم كمان.

مرة حبيت هالشاور جل ريحته منعشة ولذيذة.

فروعهم بجدة ريد سي مول والاندلس مول.

ماسك الفحم للمسام من كلينيك 

 Clinique Pore Refining Solutions Charcoal Mask

 الماسك مخصص لتنعيم سطح البشرة وتنظيف المسام وامتصاص الدهون الزايدة بالبشرة ممتاز لو عندك مناسبة تستخدميه قبل المكياج او تستخدميه مرتين ل ٣ مرات بالاسبوع ومع الاستخدام باستمرار راح يحافظ عالبشرة متوازنة ويقلل من ظهور الرؤوس السودا.

مناسب اكثر شي للبشرات المختلطة والدهنية والحساسة، خال من العطور مايحسس البشرة

دخلته في روتيني ومرتاحة على نتيجته..

منتجات التان من ماليبو تلاقوها بصيدلية وايتس

 العلبة عبارة عن جل تسمير يتوزع عالجسم قبل التشميس يساعد في انه يعطيك لون تان حلو وسريع 

تقريبا اخذ مني ساعة وصار لوني تان برونزي يحتاج تحطي حماية قبله لان مافيه حماية من الشمس

وبعد التشميس استخدمت الجل المبرد للبشرة عشان لا تنحرق او تتحسس ولازم ترطيب كمان هنا كل المجموعة اللي استخدمتها

الصورة من انستقرامي

اللي عاليسار بخاخ حماية للشعر ضروري استخدامه زي حماية الوجه والجسم 

وحتى مرطب شفايف بحماية اخذته من همالايا اذا حابين بوست مفصل عن التان قولولي :*

اخر شيء من مفضلات الشعر

مجموعة بانتين الجديدة،، حسيت معاها شويه فرق عن اللي قبل لان اعطت شعري لمعة وترطيب خلته صحي اكثر

 بس مشكلتي معاه ان فيه سولفيت ومااستخدمه بشكل متكرر احبه قبل مااسوي استشوار يعطيني نعومة وترطيب حلو للشعر..

بديل الزيت احب استخدمه اذا بخلي شعري كيرلي ارطب فيه ترطيبه مرة ممتاز وماينفش الشعر. 

وبس هذه كانت مفضلاتي ان شالله عجبتكم واشوفكم بتدوينة قريبة ♥

❤❤❤

Twitter | Instagram | Email