Review: Guerlain Terracotta Bronzing Powder ريفيو: بودرة البرونز من غيرلان وطريقة توزيع البرونزر

اللي يعرفني راح يعرف ان من اهم منتجات المكياج اللي أحبها ومااستغني عنها هي البرونزر!

مرة احب كيف يعطي البشرة حياة ولون صحي وحلو،، بس هاه اذا توزع بشكل صحيح :)

غيرلان حقيقة من اكثر الماركات اللي انشهرت عندهم بودرة البرونز تيراكوتا لانهم مسوينها بعدة درجات وباندرتون تناسب الجميع وانا جدا اقدر هذا الشي عكس الماركة اللي تنزل درجة وحدة وتتوقع انها تناسب الكل :|

اليوم حبيت اكتب عنه ريفيو مفصل عشان يكون مرجع لكل وحدة تحب تجربه..

 زي ماذكرت عندهم انواع كثيرة وكل صيف تنزل اشكال مختلفة او تعليب جديد يحمس..

اول نوع اللي هو المطفي العادي موجود طول السنة ونازل ب ٨ درجات

اللي يميزه انه نصها نازلة باندرتون على احمر والنص الثاني باندرتون على ذهبي..

ليش؟ لان مو كل الناس نفس الاندرتون.

البشرات الباردة والبيضا اللي اذا اتشمست طبيعي تلاحظ لونها يحمر، اذا استخدمت برونزر دافي او على ذهبي ماراح يناسبها راح يبين اورنج عليها.. عشان كذا نزلو درجات على احمر شويه ولو تلاحظو كمان بوبي براون ومارك جيكوبس برونزرهم على احمر شويه جدا مناسب للبشرات الفاتحة والباردة..

بالنسبة للبشرات الحنطية والسمرا هم اللي يناسبهم البرونزر الدافي او اللي على ذهبي لأنه بيطلع طبيعي عليهم.

الدرجات اللي عندي وجدا ناسبتني هي رقم ٣ ورقم ٤ 

بالنص مخصصة للبشرات الحنطية المتوسطة.

البيضا تاخذ ١ او ٢ والسمرا اللي اغمق من ٤ حسب درجة سمارك.

بالنسبة لتركيبة البودرة مطفية وبقمنتد يعني صبغتها عالية وثباتها ممتاز 

تقدري تجربيها بالمحل وتحكمي عليها بنفسك..

هذه درجة ٣ شايفين واضح انها دافية وعلى ذهبي هذا اللون البيرفكت ليا.

لونها جدا طبيعي عليا استخدمها بكل وقت حتى بشكل يومي مع مكياج خفيف تعطيني لون حلو ومرة عملية احبها..

هذه درجة ٤ مبين انها اغمق ومايلة على احمر اكثر من الاولى 

هذه لونها عليا يبان غامق ومصطنع صراحة لان انا بشرتي دافية وعلى صفار مااقدر استخدمها برونزر ممكن بلاشر فقط

لكن تناسبني وقت مااعمل تان بالصيف واسمر شويه تطلع جميلة بس كاستخدام يومي طبيعي افضل رقم ٣ اكثر بالنسبة لبشرتي.

ونفس الشي بالنسبة لباقي درجاتهم كل وحدة تختار اللي تناسب درجتها..

بالنسبة للنوع الثاني اللي عندهم هو اقرب لل finishing powder او باودر لمسة اخيرة

هذه استخدامها مايكون زي البرونزر وممكن نقول اقرب للاضاءه لان فيها لمعة خفيفة

هم مخصصينها انه توزعيها بفرشة كبيرة على كل الوجه اخر المكياج بلمسة خفيفة

شخصيا مااحب اسوي كذا لأن بشرتي دهنية وتلمع خلقة لو سويت كذا راح تبان مزيتة مرة وانا مااحب هاللوك :(

احطها بس فوق البلاشر او على مكان الهايلايت فقط.

اللي بشرتها عادية او مايلة للجفاف وتحب اللوك الديوي راح تعجبها تعطيك اضاءة صحية حلوة. 

وانا كمان من ذا بالم احب هايلايت بيتي لو البرونزي اعشقه واستخدمه بنفس طريقة هذه الاضاءة كلمسة أخيرة

ولمعة صحية للبشرة

هذه نزلوها الصيف الماضي اعتقد حصرية بس بالصيف او ممكن تكون موجودة طول السنة ماعندي فكرة بالزبط بس مااشوفها كثير

المهم اسمها guerlain joli teint وتنزل باربعة درجات لونين على بينك ولونين على مشمشي

نفس ماقلت قبل البينك تناسب اكثر البشرات الفاتحة والمشمشي احلى عالمتوسطة والسمرا.

هو يعتبر كمان لمسة اخيرة او برونزر لونه خفيف مو مرة قوي نفس العادي يعني اللي ماتحب البرونزر يكون واضح راح تعجبها

ويستخدم كلمسة اخيرة نهاية المكياج عشان يعطيك لون صحي وحلو وترى مطفي بدون لمعة.

عندهم كمان نوع مشهور مو عندي حاليا 

اللي هو برونزر الفصول الاربعة

 

شايفين فيه درجات مختلفة عشان تقدري تستخدميه طول السنة لما تكوني تان او بدون تان حبيتي لون فاتح طبيعي تقدري تستخدميه 

وكمان بعض الدرجات جايه مع بلاشر فاستخدامه عملي للبعض، لكن شخصيا هذه الانواع انا احط الفرشة فيها كلها ههههه

ماراح اخذ جزء صغير من العلبة واخلي الباقي، يعني استخدامه عندي بيكون نفس الاول بالزبط..

هذه الانواع اللي اعرفها وجربتها.. كمان عندهم بخاخ التان كنت استخدمه جميل لكن لقيت بديل ارخص بكثير وربع السعر كمان ونفس النتيجة اللي هم سالي هانسن وسوب اند غلوري وبطلت اشتري حق غيرلان صراحة..

بالنسبة لطريقة التوزيع الصحيحة للبرونزر نتكلم عنها بشكل مبسط:

تكون بفرشة كبيرة ووزعيه بشكل خفيف على اطراف الوجه حدود الشعر وعظمة الخدود والدقن 

ممكن توزعي عالانف شي بسيط بس مو بنفس طريقة الكونتور! الكونتور مختلف جدا عن البرونزر لأنه مخصص للنحت

والبرونزر مخصص عشان يعطي دفء ولون حلو للبشرة

شوفو هذا الشكل.. شايفين كيف مسوي حرف E بالانجليزي؟ وبالطرف الثاني بيصير نفس الشي وبيكون نفس شكل رقم 3 بالانجليزي عشان تحفظو الشكل بسهولة وتتذكرو اماكن البرونزر شكلها كذا E3

وغلط يتوزع على كل الوجه زي بودرة التثبيت اعرف كثير يسووها مرة غلط بيطلع مرة شكله مصطنع..

 

 

وهذه تقريبا تجربتي وبوست بسيط عن البرونزر اللي احبه حاليا وطريقة توزيعه تقدرو تختارو البرونزر اللي يعجبكم والله السوق مليان اهم شي لونه يكون صح وطريقة توزيعه صح وخلاص كذا بيكون بيرفكت.

ان شالله حبيتو البوست اشوفكم ببوست قريب ان شالله..

❤❤❤

Twitter | Instagram | Email