تجربتي: ماسك الطين الاوروبي والطين الهندي من اي هيرب | الفرق بينهم وطريقة الاستعمال Review: Clay Powder Mask

الماسكات الطينية او اللي تشوفو مكتوب عليها Clay من اكثر الماسكات اللي احب استخدمها باستمرار لانها تحافظ على بشرتي الدهنية تكون متوازنة وتنظفلي المسام بعمق جربت كثيييير انواع وماركات اخرهم هذه الانواع الباودر الطبيعية انتِ تخلطيها بنفسك بالمكونات اللي تناسب بشرتك وبإختصار بالنسبة لي لقيتها أفضل من كثير ماركات أغلى!

بكتبلكم عنهم بالتفصيل وكيف ممكن تستخدموها بالطريقة اللي تناسبك..

الطين الهندي والطين الاوروبي مع موقع اي هيرب 

الماسكين هذه بالذات عليهم مدح وكلام مرة كثير قررت اجربهم الاثنين واشوف بنفسي مالاحظت كثير فرق بينهم الا بأشياء بسيطة بذكرها بعد شويه..

هي فكرتها عبارة عن بودرة مكونة من Calcium Bentonite Clay 

تستخدم مرة بالاسبوع وممكن تخلطيها مع مويه، زبادي، خل تفاح، زيت جوجوبا. 

فوائد هذه الماسكات

- تنظيف عميق للمسام يمنع ظهور الرؤوس السودا وينقي البشرة اكثر بالتالي يصغر المسام.

- يقضي عالبكتريا المسببة للحبوب وكمان يتحكم بدهون البشرة يحافظ عليها متوازنة.

- يحرك الدورة الدموية بالبشرة ويجددها والمعادن اللي فيه تغذي البشرة.

 - ممكن تستخدميه للجسم لنفس الاسباب المذكورة لتنقية وتصفية الجسم خصوصا لو تعاني من حبوب بالظهر او الصدر.

- كمان قريت من استخدماته وفوائده ممكن يستخدم مع خل التفاح على فروة الراس خصوصا الدهنية راح يعالج مشاكل دهنية الشعر والقشرة بس ماجربت هالطريقة لان شعري جاف.

 طريقة الاستعمال

المقدار يكون متساوي ملعقة مويه وملعقة من البودرة او لمن يصير مزيج سائل كثيف نوعا ما.

اتجنبي تستخدمي صحن او ملعقة معدنية يايكون بلاستيك او قزاز.. 

تستخدميه على وجهك كأي ماسك عادي خليه لما يبدا ينشف واغسليه بس ابدا لا تخليه لما ينشف تماما ويتفتفت لأن بهذه المرحلة راح يبدا يسحب الرطوبة من وجهك.. 

افضل شيء لما تحسي انه بدأ نشف وتغير لونه على طول اغسليه بالمويه وممكن تمسحيه بمنشفة مخصصة للوجه نظيفة ومبلولة.

للبشرة الدهنية والمعرضة للحبوب

ممكن تخلطيه مع مويه او مويه ورد هذه الطريقة اللي جدا ناسبتني اعطتني تنظيف ممتاز للبشرة زي ماقلت يقارن بكثير ماسكات اغلى! بيرفكت للاستخدام قبل المكياج لانه يخفف دهنية البشرة احس بشرتي متوازنة والمكياج يطلع نظيف، 

استخدميه مرة بالاسبوع.

الطريقة الثانية ممكن تخلطيه مع خل التفاح العضوي - زيت شجرة الشاي عشان يعالج الحبوب.

اذا كانت بشرتك مختلطة ممكن تحطيه بس عالاماكن الدهنية زي التي زون (الجبهة الانف الدقن)

واتجنبي باقي الاماكن او سوي نفس وصفة البشرة الجافة.

للبشرة الجافة

اخلطيه مع كم نقطة من زيت الجوجوبا Jojoba oil تلاقوه في اي هيرب 

او ممكن تخلطيه مع زبادي.

راح يعطيك فوائد الماسك وتنظيفه بدون جفاف وزي ماقلت لا تخليه لفترة طويلة مجرد مايبدا ينشف اغسليه عشان لا ينشف بشرتك

وممكن تستخدميه مرة كل اسبوعين او ١٠ ايام.

للامانة البشرة الحساسة ماعندي فكرة اذا يناسبك او لا ممكن يحسس بشرتك لأنه قوي.

بالنسبة للفروقات بين الطين الاروبي والهندي

من ناحية التنظيف مافي اي فرق الاثنين اعطوني تنظيف حلو وتوازن للبشرة ونتيجة مقاربة.

والفروقات اللي لاحظتها حجم العلبة والسعر فقط!

الطين الهندي (سعره ٧ دولار) حجمه كبير والكمية كبيرة جدا مقارنة بالاوروبي (سعره ٦دولار)

 ونفس السعر تقريبا الفرق دولار واحد.

وبس اعتقد هذا كل شيء حابة اقوله عن الماسكات جدا انصحكم تجربوها سعرها مرة رخيص ونتيتجتها حلوة 

تقدرو تطلبوه من اي هيرب حطيتلكم طريقة الطلب هنا

او تلقوه متوفر بالمتاجر

❤❤❤

Twitter | Instagram | Email