My Makeup Look لوك مكياجي بالتفصيل + ريفيوز مصغرة

حبيت أسوي بوست عن لوك مكياج سويته بس ماقدرت أصور خطوات مكياج العين بالتفاصيل 

ولو عدت اللوك عشان أصور خفت يتأخر البوست :(

بس راح أشرح بالتفصيل وخطواته سهلة وإن شالله تكون واضحة

والبوست راح يكون طويل شوية :*

اللوك نزلتله صورة ثانية بإنستقرام

لوك ذهبي ترابي وتراني ناشبة فيه لول

نشوف تفاصيل اللوك ونبدأ بالبشرة

- تحضير البشرة قبل المكياج

هذه المنتجات ماعدا التونر معتمدتهم من زمااااان وماأحس إني بغيرهم إلا إذا إكتشفت حاجة أحسن

أول شيء أقشر وجهي بسكرب st.ives بحركات دائرية ناعمة عالبشرة لأنه شوية خشن 

بعدين أجفف وجهي وأوزع ماسك إيف روشيه وتكلمت عنه وعن المجموعة بهذا الريفيو هنا

أخليه لحد ماينشف وأغسله وأمسح بالتونر Rosewater Toner من Botanic وتلاقوه بصيدلية بووتس تونر بموية الورد خفيف ولطيف عالبشرة

أخر خطوة مرطب مطفي من Yves Rocher إسمه Sebo Specific Ultra Matt Shine Reducing Moisturizer

المرطب ماأستغني عنه أبدا لأن بشرتي مختلطة/دهنية يعطيني الترطيب اللي أحتاجه بس يحافظ عالبشرة مطفية ويخفف اللمعة وبالتالي يثبت المكياج أكثر سعره ٨٩ريال

*محلات إيف روشيه تشبه لمحلات ذا بودي شوب وموجودة بأغلب مولات جدة

- تحضير الشفايف

أوزع طبقة كثيفة من الفازلين وبعدها أقشر الشفايف بسكرب bubble gum من لشّ

وبعدين أرطب بالفازلين طبقة خفيفة 

- الفاونديشن

قبل الفاونديشن وزعت برايمر porefessional من بينيفت أنا أعترف عندي love/hate relationship معاه لول

ماني عارفة أحدد موقفي معاه بالزبط أحبه ولا أكرهه ماأشوف إنه يخفي المسام تماما بس أشوف إنه يثبت الفاونديشن أكثر وماشي حاله 

 الفاونديشن Chanel Perfection Lumiere جديد ولسا هذه أول مرة أستخدمه بس حبيييييييته مرة مرة مرة *-*

درجتي beige 40 ومطابقة للوني والفاونديشن تغطيته متوسطة إلى عالية والتغطية buildable يعني ممكن تزيدي ويعطيك تغطية أعلى وجدا سهل بالدمج مايبين ثقيل!

أنا أعشق الفاونديشنز اللي زي كذا ماأحب اللي يبين ثقيل ولا أحب الخفيف اللي مايغطي وهذا بيرفكت

الفينيش مطفية يعني للبشرات الجافة تحتاج تستخدم مرطب كويس قبله

ثباته ماأقدر أحكم عليه لوحده لأني أستخدمت برايمر وثبته بباودر بس كان أساسي كله بشكل عام ثابت مع إني كنت بمكان مكشوف برا وكان يومها حر بس رجعت البيت والأساس ماتغير!

طبعا هذا كله إنطباع أول لول أكيد راح يكون له ريفيو خاص بالمستقبل بعد ماأجربه كويس ;)

وزعته بفرشة سيقما f82 بطريقة ال stippling وال buffing وتكلمت عنها بهذا البوست هنا

وأنا طريقتي إذا بسوي لوك سهرة أوزع الفاونديشن وأبدأ بالعين بعدين أرجع للبشرة 

عشان لما أوزع الكونسيلر يبين أنظف وشكله أرتب

- الحواجب

أحب أبدأ فيها قبل مكياج العين

لما شوفت صورتي الحواجب ماكانت بيرفكت بس برضو أنا ماأحب الحواجب القوية الحادة أحب أخليها طبيعية وأحيانا ماأرسمها بس لأني صابغتها رسمتها عشان أرتبها

أرسم الحواجب بلونين غامق وفاتح بفرشة سيفورا رقم ١٥

الغامق (اللون البني من باليت ذا بودي شوب للحواجب) أبدأ فيه من تحت

وبنص الحاجب لفوق أرسم بالفاتح ( لون buck من باليت نيكد ) 

وأمشط الحواجب بفرشة سيفورا رقم ١١

بعد ماأرسمها بفرشة مسطحة أحدد حوالين الحاجب بكونسيلر فاتح واللي إستخدمته من باليت ميك اب فوريفر أفتح درجة عشان يرتبلي الرسمة.

- مكياج العين

الخطوة الأولى وهي خطوة أساسية بكل لوك أسويه 

البيس وإستخدمت البيس المفضل عندي ماك سوفت أوكر Soft Ochre 

هو شدو كريمي مطفي ثابت جدا ومايخطط وأستخدمه كـ بيس يعطي تغطية ولونه بيج على أصفر يناسب البشرات الدافئة 

وعندهم شدو كريمي ثاني إسمه Painterly لونه بيج على وردي وبرضو يستخدم كـ بيس

أوزعه بإصبعي على كل منطقة الجفن لحد الحواجب وتحت العين برضو

بعدين وزعت عالجفن المتحرك بفرشة ماك ٢١٧ شدو ذهبي كريمي كلر تاتو من مايبلين وإسمه eternal gold 

 الخطوة هذه سويتها عشان لمن أوزع شدو كريمي قبل الشدو الباودري يبين اللون أكثر وتعطيني ثبات للون 

بعدين وزعت فوقه بفرشة ماك ٢٣٩ وزعت شدو half baked من باليت نيكد

وبنفس الفرشة بس بالجهة الثانية وزعت شدو smog عزاوية الجفن من برا 

دمجتهم بفرشة سيفورا ١٨ ورجعت سويت نفس الخطوة زدت شدو half baked عالجفن وشدو smog برا ودمجتهم

عدتها مرتين لأني لما أدمجهم المرة الأولى يخف اللون فأرجع أزيد الشدو وأدمجه مرة ثانية 

بعدين بفرشة ماك ٢١٧ حطيت بكسرة الجفن شدو buck لونه بني مطفي 

(أعشقه هذا الشدو من الشدوهات اللي راح أشتريها بشكل منفصل لأني أستخدمه كثير وماأستغني عنه وأحيانا أضطر أخذ الباليت كاملة معايا بس عشانه لول أحسه ال perfect crease color)

وبعد ماأوزع buck أرجع أدمج بفرشة سيفورا ١٨ وهي قريبة لفرشة ٢٢٤ من ماك كبيرة وfluffy تدمج الشدو بشكل رائع وعشان الدمج يكون مرتب لازم تكون الفرشة نظيفة أو إمسحي الشدو اللي فيها إذا كنتِ مستخدمتها بالتوزيع

بنص الجفن وزعت بفرشة ٢٣٩ بيقمنت ذهبي من ماك إسمه Gold Dusk 

وتحت الحاجب وزعت اللون virgin بفرشة مسطحة زي ماك ٢٥٢

تحت العين وزعت بفرشة ٢١٢ اللون smog جميل اللون برونزي بلمعة مرة أحبه 

وعموما أكثر ألوان النيكد باليت اللي أحبها وأكثرهم إستخداما بالنسبة ليا Buck و Half Baked و Smog و Virgin 

بعد ماخلصت الشدو رسمت من فوق العين بأيلاينر سيفورا المحبب إلى قلبي

فرشته بيرفكت بالنسبة ليا وسهلة بالرسم رسمت وبعدها بفرشة ماك ٢١٢ المسطحة حددت فوقه بشدو darkhorse من نيكد باليت لأني كنت حابة الأيلاينر يكون smudged يعني مو محدد ومرسوم

وداخل العين إستخدمت كحل ذا بودي شوب سواده وثباته مو مرة قوي بس يناسب عيوني الحساسة :(

الرموش

الماسكارا إستخدمت ذي أر ريل من بينيفت وهذا ريفيو لها هنا

والرموش المفروض تترمي خلاص لول لأني إستخدمتها أكثر من مرة بس كويس لقيتها جنب عدساتي بعد ماشلتها عشان أصورها xp

رقمها ٣٥ من ماك هي كانت بمجموعة مارلين مونرو وصارت بالمجموعة الدائمة وهذه صورتها أول ماأخذتها 

مررررة جميلة وشكلها طبيعي جدا وشعراتها ماهي بمستوى واحد وبعد ماأخذتها إكتشفت إن كثير حابينها ويمدحوها

حبيتها وبأقرب روحة لماك راح أخذلي كم حبة.

والغرا اللي إستخدمته وماأستخدم غيره duo lash adhesive موجود بماك وإنجلوت وأعتقد فوريفر وسعره ٥٠-٦٠ ريال

وبعد ماأركب الرموش أرجع اعيد فوق الأيلاينر 

*الرموش ماأركبها إلا بعد البلش أو أخر خطوة بالمكياج

وبس كذا خلصنا العين

- الكونسيلر

وزعت كوركتر مشمشي mid peach من باليت ماك pro conceal and correct درجة medium وممكن تشتري الكوركتر لوحده 

بعد الكوركتر وزعت كونسيلر ماك NW25 وهو كونسيلر ستوديو فينيش كنت أستخدمه زمان ودحين رجعتله الدرجة nw على وردي مع إن بشرتي دافئة بس الدرجة هذه أفضل لتغطية الهالات المايلة للأزرق للبشرات الدافئة ويعطي brightening يعني ينور تحت العين

رقم الدرجة اللي أستخدمها يناسب البشرات من nc30 واللي بشرتها nc40 تستخدم كونسيلر nw30 بيكون لونه أنسب
والبشرات أقل من nc30 تستخدم كونسيلر nw20
إذا الهرجة معقدة شوية بالنسبة لك فهيا مصطلحات ماكية لول

والكونسيلر تغطيته عالية وكثير يقولو إنه ممكن يخطط بس إذا وزعتيه صح وثبتيه كويس بالباودر ماراح يخطط

ماإحتجت كونسيلر بشرة بس لو بحتاج أستخدم درجة nc35 لأنها دافئة وأقرب لبشرتي

الفرشة اللي إستخدمتها هي ماك ٢٣٤ 

لها جهتين البيضا شعر صناعي وأوزع فيها المنتجات الكريمية

والجهة السودا أوزع فيها الباودر للتثبيت وإستخدمت باودر ميك اب فوريفر الدرجة 5 rue la boetie

- تكملة مكياج الوجه

ثبتت الأساس بباودر MAC Mineralize Skinfinish Natural والدرجة ميديم دارك بفرشة سيفورا المقدسة عندي رقم ٤٥ 

الباودر مرة أحبها وكانت مناسبة مع الأساس لأنه مطفي والباودر طبيعية أكثر

الكونتور ماكنت حابة كونتور محدد وواضح بس كان بشكل خفيف عشان يبين الملامح أكثر وإستخدمت كونتور ميك اب فوريفر الباليت درجة ٢ بفرشة بزاوية

البلش Orgasm من نارس والهايلايت Whisper of Gilt من ماك كولكشن Extra Dimension وراح ترجع قريب عندنا مرة أنصحكم تاخذو هذا الهايلايت لونه ذهبي ناعم والباودر نفسها جاية بين الكريمي والباودر

- الروج

أول شيء حددت بمحدد نكس Pinky والروج Party Parrot من ماك 

هالموسم الألوان الفاقعة دارجة بالأرواج ومرررة حبيت درجة الروج لونه وردي على كورال جدا جميل وهو لميتيد وأعتقد الكولكشن لدحين معروضة بماك وإحتمال يكون لسا موجود

وهذا كان كل اللوك تقريبا أنا لوكي دايما زي كذا شدو بألوان ترابية وروج فاقع والخطوات ماتتغير كثير بس ممكن تتغير المنتجات 

 وبس إن شالله حبيتوه وسوري لو طولت عليكم p;