لوك جديد مع صالون ميزون دو جويل في جدة My Experience With Maison De Joelle Salon In Jeddah

 صالون ميزون دو جويل صار موجود في جدة وفتح قريب ماصارله كم يوم D:

والصالون تابع لجويل شخصيا نفس اللي بالإمارات والرياض. 

رابط موقع الصالون 

www.maisondejoelle.com

ومكان الصالون بجدة مقابل مركز التحلية التجاري خلف القثمي للأقمشة

وهذا رقمهم: 0566882700

بشكل عام الصالون جدا راقي ومرتب ونظيف والموظفات يعاملوك بقمة الذوق والإحترام..

أنا عادة بالصوالين خصوصا إذا بعمل شعري دايما أتوتر وأخاف مايزبطولي اللون

بس بالعكس معاهم مرة حسيت إني مرتاحة ومبسوطة ومرة عجبتني النتيجة D:

أول ماتدخلي هذا الإستقبال

ديكورهم نايس وناعم مرررة حبيته..

 ومقابل الإستقبال حاطين بعض الماركات المتوفرة اللي يستخدموها وكمان تقدري تشتريها من الصالون 

موجودة عندهم ماركة ات فاكتور الجميلة اللي عملتها ريفيو هنا 

REVIEW: IT FACTOR QUICK BLOWDRY HAIR PRODUCTS ريفيو: منتجات إت فاكتور للشعر

إخترت الخدمات اللي كنت حابتها وهي صبغة وقص شعر وبديكير ومناكير

طلعوني فوق وكلمتني الأخصائية فاطمة عن اللون اللي حابته وإخترت بني تشوكلت غامق 

وأول شيء عملتلي تيست على خصلة وطلع مرة مزبوط اللون ونفس طلبي الحمدالله

وكملنا باقي الشعر،، 

وغسلنا اللون وحطتلي امبولة تريتمنت من كيرستاز للشعر المصبوغ ومساج للراس

التريتمنت أعطى شعري لمعة ورطوبة تجنن.

بعد كدا قصينا الشعر أنا مرة كنت متخوفة من النقطة هذه بالذات لأني جالسة أطول شعري وماابغى أقص كثير ودايما الكوفييرات يقصرو :(

بس هيا فهمت عليا وقالتلي حاسة فيكي وماتخافي ماراح أقصرلك شعرك

وقصتلي الأطراف وشوية تدريج من قدام وسوت نفس اللي أبغاه بالزبط. 

وعملتلي سشوار ومررة إنبسطت بالنتيجة وراضية تماما عنها والأخصائية مرة كانت نايس الله يسعدها.

البديكير والمناكير

الأدوات كلها كانت جديدة ومعقمة وتعملك وإنتِ جالسة على كرسي مساج مع ميوزك هادية تحسي بإسترخاء ودلع كأنك عاملة مساج والمنتجات اللي يستخدموها أغلبها من ماركات معروفة زي OPI واليساندرو

وبس هذه الخدمات اللي عملتها وإن شالله ماراح تكون أخر زيارة ليا للصالون مرة إنبسطت فيه وراح أرجع أجرب خدمات ثانية قريب بإذن الله..

بالنسبة لأسعار الصالون والخدمات اللي الكل يسأل عنها 

الصور من موقعهم وأسعارهم مرة معقولة وحلوة 

❤❤❤

Twitter | Instagram | Email