Diorskin Nude Air Serum and Powders by Dior ريفيو فاونديشن نود آير سيرم مع الباودر من ديور

هالفاونديشن نزل قريب من ديور

وكثير قريت عليه مدح بالبلوقات وأول ماوصلني وثقت فيه وجربته بإيفنت مهم عندي والحمدلله ماخذلني *ـ*

اللي يميزه إنه سيرم فاونديشن وتركيبته جديدة ومختلفة حاتكلم عنه أكثر…

وتقريبا أغلب الفاونديشن مؤخرا نازلة بنفس الفكرة سائلة خفيفة مع إحساس مخملي ولوك طبيعي عالبشرة.

العلبة قزاز مع قطارة،، حقيقةً مو مرة عملية لكن شكلها جميل وتناسب نوع الفاونديشن لأنه سائل مو كريمي وتقدري تتحكمي بالكمية.

فيه ريحة بسيطة وجميلة ماأزعجتني بس إذا ماتحبي الروايح بالفاونديشن إنتبهي لهذه النقطة.

القطارة يفضل تقطري على يدك أو عالفرشة بعدين على وجهك لأن لو نقطتيه على وجهك مباشرة ممكن يحوس لأنه سائل الفاونديشن إلا إذا كنتِ سريعة.

درجتي 03 Medium Biege

بشرتي دهنية مختلطة.

مميزاته:

فاونديشن خفيف جدا زي الهوا عالبشرة ماتحسي فيه!

يعطي تغطية متوسطة طبيعية ويحسن من شكل وملمس البشرة كمكياج طبعا مو علاج

مايبين المسام ولا الخطوط والفينيش طبيعي مايل للباودري شويه لمن يثبت عالبشرة ومو دهني أبدا،

 حسيت بشرتي صحية وفيها نضارة ولوك فريش يعكس الإضاءة بشكل حلو،،، ورائع تحت نور الشمس يبين مررة طبيعي.

معزز بتقنية Oxygen Activ technology وهي خليط من زيت الأكسجين hyper-oxygenated oil وزيت التوت وفيتامينات ومعادن وهذه اللي تخليه كأنه سيرم.

فيه نسبة حماية من الشمس 25spf بس مايعكس فلاش باك (اتصورت كثير فيه وماأعطاني فلاش باك أبدا)

تغطيته مو خفيفة بالعكس غطى اثار الحبوب البسيطة اللي عندي بطبقة وحدة حسيت التغطية أقدر أقول عنها متوسطة إلى عالية بدون مايكون كيكي أو ثقيل. 

بس اللي بشرتها فيها عيوب واضحة يحتاج تستخدمي كونسيلر بعده لتغطية أعلى.

 من ناحية الثبات ملاحظة إستخدمت الباودر تبعه معاه وأنا عموما دايما أستخدم باودر مع الفاونديشن ولا مرة خليت الفاونديشن بدون باودر فحسيت ماله داعي أختبره بدون باودر إذا أنا عادتي كذا.

جلست فيه يوم كامل برا وجوا وبكل الظروف لول

أقدرأقول  ثباته ممتاز ماتقطع أو تكتل أو تغير أو تأكسد نهائيا

بس أخر اليوم دهن معايا نتفة بسيطة بالتي زون وتقبلتها تماما لأن جلس يمكن فوق ١٠ ساعات وأنا طبيعة بشرتي دهنية.

وزعته ببيوتي بليندر وبفرشة بفنغ وبالإثنين أعطاني نتيجة حلوة

وبما إنه سائل تقدري توزعيه بأصابعك كمان وشخصيا ماارتاح بهالطريقة بس إذا كانت طريقتك المفضلة بتعطيك نتيجة رائعة.

عيوبه:

الدرجات قليلة ٨ درجات صعب الكل يقدر يلاقي درجة بيرفكت تماما.

لا تحاولي تضيفي أكثر من طبقة للفاونديشن عشان لا يثقل.

يناسب مين برأيي؟

اللي تكره تحس إنها حاطة فاونديشن واللوك الكيكي والثقيل وتحب الفاونديشن يبين جدا طبيعي وبنفس الوقت يغطي هذا الفاونديشن عز الطلب عندك.

بيرفكت للبشرات العادية المختلطة مو جافة جدا ولا دهنية جدا.

أشوف إنه يستحق التجربة خذي عينة منه وجربيه وأحكمي ♥

Nude Air Loose Powder

بكل صراحة إذا راح تاخذي الفاونديشن لازم تاخذي معاه بودرته *-*

ليش؟

لأنها ناعمة وخفييييييييفة مرة راح تكمل الفينيش للفاونديشن وتثبته بدون ماتخفي اللوك الطبيعي مستحيل تصير باودري أبداً 

تجنن مرة عشقتها :(

إذا بشرتك مختلطة دهنية راح تقدري هالبودرة جدا. 

حتى لو مو مع نفس الفاونديشن عموما هالباودر بطلة ومرة طبيعية وبيرفكت لتثبيت أي فاونديشن.

Dior Diorskin Nude Air Tan Powder

جربت برونزر من ديور قبل هذا وكان حلو أظن تكلمت عنه بفيفورتس
وهذا مايختلف عنه كثير ويعتبر من البرونزرز الجميلة والناعمة تندمج بشكل حلو مع البشرة ودرجاتهم مو مرة أورنج ولا مرة حمرا جاية تان طبيعي جدا مو مصطنع.


عموما هالمنتجات كلها مع بعض أعطتني لوك خفيف طبيعي وبشرة صحية ماحسيته ثقيل أبدا وهذه فكرة ديور بهالمنتجات عشان كذا سموها Nude Air



ديور تلاقوها بكل محلات المكياج الكبيرة سيفورا، دبنهامز، وجوه وباريس غاليري وغيرهم
الأسعار تقريبية مو متأكدة منها بالزبط
الفاونديشن ٢٦٠ريال
الباودر ٢٧٠ريال
البرونزر ٢٤٥ ريال




وبس أتمنى حبيتو الريفيو أشوفكم ببوست هالأسبوع كمان إن شالله :*

❤❤❤

Twitter | Instagram | Email