MAKE UP FOR EVER Step 1 Skin Equalizer Review ريفيو: برايمرات ستيب ١ من ميك اب فورايفر

اليوم البوست راح يكون عن هذه البرايمرز الجديدة البطلة من ميك اب فوريفر ❤

حقيقة خلتني أركن كل البرايمرز اللي عندي على جنب وأستخدمها.

وميك اب فوريفر مؤخرا نزلو مجموعة كاملة من البرايمرز ١١ نوع 

وكل نوع مخصص لتصحيح مشكلة معينة بالمكياج.

سواء ترطيب أو تنعيم أو تخفيف لمعة البشرة أو تصحيح لونها

اللي عندي ٤ أنواع منهم فقط بس راح أشرحلكم شويه عن باقي الأنواع اللي نازلة.

ومو شرط تشتريها كلها طبعا محد راح يحتاجها كلها بس ممكن تاخذي الأنواع اللي تناسب مشاكل بشرتك.

وأعتقد إن البرايمرز القديمة اللي كانت عندهم اتسحبت ونزلت هذه بدالها على طول.

في البداية البرايمر بشكل عام هو منتج تجميلي وليس علاجي. يعني لمن يقولك يخفف المسام كثير بنات يعتقدو إنه المفروض يعالجها وهو لا، المقصود منه يخفيها بشكل مؤقت قبل المكياج.

يتوزع بعد المرطب وقبل المكياج حتى يساعد على تحضير البشرة للمكياج، ممكن يستخدم لتصحيح لون البشرة أو لزيادة ثبات المكياج أو لزيادة النضارة واللمعة حسب أنواع البرايمر المختلفة تختاري النوع المناسب لبشرتك..

وهو خطوة ممكن يستغني عنه البعض إذا ماكنتِ محتاجتله بس في بعض الأحيان يكون ضروري نستخدمه.

هل يضر البشرة، يطلع حبوب... إلخ؟

حاله حال كل المكياج والأساس لو مانظفتي بشرتك وإهتميتي فيها طبيعي راح يضرها.

بتكلم عن برايمرز ستيب ١ حسب الصورة من اليسار لليمين:

تعليبهم كلهم نفس الشي علبة عصار عملية ومريحة أحلى بكثير من تعليبهم السابق.

وأنا حقيقة أحب أقرا وأستكشف بالمكونات وكل واحد من البرايمرز مصنوع بتركيبة معينة تعطي النتيجة المطلوبة منه يعني حسيت إنهم إشتغلو عليها بعناية.

Step 1 Smoothing Primer

برايمر قوامه سيليكوني مخصص لتنعيم وتحسين ملمس سطح البشرة والمسام والخطوط التعبيرية حتى اللي عندها مناطق تتقشر.

بمجرد ماتوزعيه تحسي بشرتك صارت ناعمة وطبقة وحدة والأساس يصير سهل المد والتوزيع فوقه.

مرة حبيته ماحسيته ثقيل ولا دهني أبدا وبنفس الوقت ماينشف البشرة

وهو اللي أستخدمه أكثر شيء بينهم وفعلا أعطاني تنعيم حلو للمسام 

وكمان هذا النوع من البرايمرز يساعدك كثير بحل مشكلة الخطوط التعبيرية حول الشفايف لما توزعيه قبل الأساس يعبي الخطوط ومايخلي الأساس يخطط فيها.

بس لا توزعي كمية كبيرة شيء بسيط وبطريقة التربيت الخفيفة بأصابعك وراح يعطيك نتيجة جميلة.

Step 1 Mattifying Primer

برايمر قوامه زي الجل شفاف مخصص لتقليل اللمعة بالبشرة ويعطيها لوك مطفي.

يناسب البشرات الدهنية والمختلطة 

أوزعه على منطقة التي زون (جبهة - انف - دقن) وأستخدمه أغلب الوقت إذا كنت عارفة بطلع برا البيت بالنهار خصوصا مع جونا العليل بجدة :* 

والله الجو صراحة متعدل هاليومين مرة بس جايينا الصيف راح اعشق هذا البرايمر هههههه :(

أول ماتوزعيه تحسيه نشف المنطقة شويه وأعطاها لوك مطفي 

جربته مع فاونديشنات كانت تدهن معايا شويه وخففلي اللمعة بشكل كبير.

تقدري تستغني عن الباودر معاه بس يدي ماتطاوعني إلا أحط شويه باودر :*

Step 1 Hydrating Primer

برايمر مرطب يوازن الترطيب بالبشرة وكأنه يعطيها مويه ويحافظ عليها تبقى مترطبة ونضرة لوقت طويل حتى مع المكياج.

ملمسه زي اللوشن خفيف مو دهني أبدا بيكون ممتاز للبشرات اللي ناقصها ترطيب

رائع جدا مو شرط بس للبشرة الجافة حتى العادية والمختلطة تقدر تستخدمه.

Step 1 Nourishing Primer

مشابه لبرايمر الهايدريتينغ بالقوام لوشني ومائي بس مغذي أكثر وترطيبه أعلى ويحتوي على زبدة الشيا

يعني ممكن يكون قوي شويه عالبشرة الدهنية والمختلطة بس مثالي للبشرات الجافة يرطب ويريح البشرة إذا حسيتيها مشدودة من الجفاف.

باقي البرايمرات المصححة كل لون مخصص لتصحيح مشكلة من مشاكل البشرة:

على فكرة لو كان عندك أكثر من مشكلة بالبشرة مثلا تحتاج تصحيح لون وتنعيم أو ترطيب أو تخفيف لمعة تقدري تستخدمي مثلا البرايمر المنعم مع المصحح للون وهكذا حسب بشرتك...

البرايمرات المصححة ٦ ألوان:

البرايمر الأخضر مخصص لتصحيح لون الإحمرار بالبشرة.

البرايمر الأزرق مخصص عشان يعطي نضارة ويخفف من بهتان البشرة البيضاء.

البرايمر الوردي يعطي نضارة ويخفف بهتان وإصفرار البشرة البيضاء/المتوسطة.

البرايمر الأصفر يصحح الإحمرار بالبشرة البيضاء حتى ممكن يستخدم عشان يعطي نضارة وإشراقة للبشرات الحنطية.

البرايمر المشمشي يصحح لون البشرة المتوسطة والحنطية اللي تعاني من تصبغات وعدم توحد اللون وتحس الفاونديشن يقلب رمادي مع التصبغات تستخدمه قبل الفاونديشن.

البرايمر الأورنج/كاراميل يسوي نفس الشيء بس للبشرة السمرا يصحح لونها وممكن يستخدم عالهالات والسمار حول الشفايف.

البرايمر الموف يصحح الإصفرار والشحوب بالبشرات الفاتحة/المتوسطة.

عندنا أشوف غلطات كثير بالمصححات الأغلبية ياخذو اللون البينك لتصحيح اللون حتى تلاحظو اللي تبيع دايما تعطيك اللون البينك حتى لو بشرتك حنطية ولا سمرا وتقولك يعطيك نضارة! -.-

بينما بالعكس البشرة السمرا والحنطية المفروض تميل للألوان الدافية الأصفر أو الأورنج والمشمشي تعطيها نضارة أكثر خصوصا لو كان فيها تصبغات.

وزي ماذكرت بشكل عام البرايمرز المصححة مو الكل يحتاجها طبعا بس اللي عندها تصبغات أو إحمرار أو بهتان بالبشرة وتحتاج شيء يوازن لونها.

سعر الواحد ١٦٥ ريال وميك اب فوريفر موجودة بكل فروع سيفورا ودبنهامز وفافافوم
وموجود لهم بوتيك خاص بمركز التحلية والسلام مول.

وبس تقريبا هذا رأيي وتجربتي لبرايمرات ميك اب فوريفر الجديدة أشوف إنها تستحق تطلي عليهم وتجربيهم ومن أفضل البرايمرز اللي جربتها حتى الآن.

إن شالله عجبكم الريفيو وإستفدتو منه 

أشوفكم ببوست قريب :*

❤❤❤

Twitter | Instagram | Email