Anastasia Liquid Lipstick Review ريفيو أرواج أنستازيا المطفية الثابتة

مابقيت ماركة مانزلت أرواج سائلة لدرجة بديت أطفش منهم :\ لول

كالعادة بكل ماركة أحب أخذلي كم لون أجربها ولو عجبتني ممكن أرجع أطلب زيادة.

واليوم راح أكتبلكم ريفيو عن أرواج انستازيا السائلة مافي أحد ماشفناه اتكلم عنها سوت ضجة كبيرة!

فكرة الأرواج السائلة عموما تجي بعلبة زي القلوسات العادية والمنتج يكون سائل ينشف يصير مات وثابت لوقت طويل

معروفة هالمنتجات إنها ممكن تنشف الشفايف شويه ويحتاج إهتمام كبير بالشفايف وتقشير وترطيب كويس قبلها

ولا تهملي هالخطوة أبدا عشان لا تبين شفايفك ناشفة ومقشرة وكمان عشان يبين اللون شكله أحلى.

أنستازيا نزلت مجموعة من ٢٠ روج مطفي تقريبا وكل مالها بتزيد ألوان ماشالله :(

المجموعة كبيرة ومنزلة درجات كثيييرة وكلها حلوة ومغرية أنا حاولت اختار المميزين منهم واللي ماعندي شبيهة فيهم من نفس النوعية 

وأخذت الدرجات كلها مطفية

Lovely لونه بينك طبيعي

Sad Girl لونه عودي على موف غامق وفيه حبات شيمر بسيطة.

Bambi بمبي لونه باربي بينك فاقع وشويه على بنفسجي.

التعليب عملي وأنيق وفرشته سهلة بالتطبيق، مافيه ريحة قوية.

وحبيت إن العلبة شفافة واللون يبين من برا يخليني أعرفه بسرعة بدل ماأجلس أشوف الأسم وكذا،،

الألوان تعطي تغطية عالية ولون قوي من تطبيق واحد مايحتاج تعيدي عاللون عشان تخليه يصير أقوى، 

مطفي تماما وثباته تقريبا أقدر أقول ٥ ساعات ومع إستخدام محدد بيصير ثباته أعلى، إذا أكلتي راح يخف اللون ويحتاج تعيدي توزيعه.

تركيبته مريحة عالشفايف ماتحسي فيه وتقدري تخلطي أكثر من درجة مع بعض ويطلع جميل.

فيها عيب واحد إن اللون ممكن يتكتل بسرعة ولازم تنتبهي للتوزيع بدقة ماتكثري من المنتج أو تعيدي عليه أكثر من مرة!

لما تجي توزعي إمسحي زوايد الروج عالفرشة بطرف فتحة العلبة لا تخلي عالفرشة منتج كثير وإلا راح يحوس مرة ويبين غبي ولاحظت إن تركيبة كل روج تختلف، فيه درجات تركيبتها أحلى من غيرها..

 هذه سواتشز للدرجات اللي عندي

ABH Lipsticks From left to right: Sad Girl - Bambi - Lovely

مثلا لون لوفلي وردي طبيعي رائع وتركيبته كريمية جميلة مايتكتل كثير لو برجع اطلب لون واحد منهم مرة ثانية راح أطلبه درجته حلوة مع بشرتي ويناسب أغلب البشرات وحلو لكل يوم جدا حبيته.

بامبي لونه باربي بينك على بنفسجي شويه فاقع ومميز يحتاج قبله ليب لاينر مااتوقع بيعجب الكل بس اللي تحب الألوان الملفتة xp

ساد قيرل اللون مرة جميل يجنن بس للاسف هو اللي تركيبته خذلتني شويه :( يمكن عشان فيه شيمر... متعب بالتوزيع عشان لا يتكتل اللي حابة تجربه تحط ببالها هالشي توزعه بدقة وماتحط أكثر من طبقة وبيطلع تمام.

ونقطة ثانية لازم تنتبهيلها إن السواتشز بالموقع مختلفة شويه عن اللون الحقيقي دوري سواتشز بالنت أفضل عشان تعرفي اللون بالزبط.

زي ساد قيرل لونه موف مبين بسواتش الموقع! لما جبته أكتشفت إنو مايل للبرغندي أكثر نفس السواتش على يدي.

وإحتمال باقي الالوان اللي ماجربتها ماتكون زي ساد قيرل لأن أحس العيب فيه بس عشان الشيمر لو كلها كانت نفس تركيبة لوفلي بتطلع جميلة. 

وإن شالله أطلب كم لون زيادة وأشوف حاطة عيني على فامب وفينتج وكرافت جميلين مرة *-*

وبالنسبة لمقارنة سريعة مع لايم كرايم صراحة لايم كرايم لحد اللان تتفوق على كل الأرواج السائلة اللي جربتها لأن تركيبتهم مخملية رائعة عالشفايف وماتتكتل كثير ولا تنشف الشفايف أبدا وريحتهم أحلى على فانيلا.

بس المميز بأنستازيا إن درجاتهم كثيرة ومنوعة.

اماكن توفر أرواج أنستازيا 

طلبتها من موقعهم الرسمي

http://anastasiabeverlyhills.com/

وسعر الروج الواحد ٢٠ دولار

الطلب كان بفيزة التسوق من الراجحي وشحنتها على عنواني الأمريكي بحسابي ارامكس شوب اند شيب

ماكان في مشاكل بالطلب إلا إنه الموقع أول ماطلبت علق وماكان يرضى يسوي تسجيل دخول أشيك عالطلب وقعد على هالحالة كم يوم بعدين رجع عادي أتوقع كان عليه ضغط كبير من الطلبات.

بالنسبة للشحن دايركت أنا حقيقة ماجربت ونادرا اشحن دايركت مو عيب في الموقع بس عيب ببريدنا هنا لأنه يضيع الشحنة إلا لو كانت تنشحن عن طريق DHL أو فيديكس ممكن أشحنها دايركت.

وبس هذا كان رأيي بأرواجهم إن شالله حبيتو الريفيو لو جربتوها أكتبولي رأيكم وأشوفكم إن شالله ببوست قريب :*

❤❤❤

Twitter | Instagram | Email