كل شيء عن ماسكارا جل الحواجب | ريفيو | استخدماته Eyebrow Gel Mascara

كثير بنات يهملو خطوة ماسكارا الحواجب او مو فاهمين ليش نستخدمها مع اني اشوفها خطوة مهمة في روتين الحواجب وحقيقة مااستغنى عنها! احيانا استخدمها لوحدها بدون رسم للحواجب وتعطي لوك طبيعي جدا، وراح اقولكم كيف وبعطيكم ريڤيو مفصل لكذا نوع ماسكارا احبها.

في البداية هي عبارة عن ماسكارا نفس علبة وشكل الماسكارا العادية للعين بس المنتج بداخلها جل مخصص للحواجب ونستخدمه بعد مانعبي الحواجب. 

الفايدة منه اولا تثبيت رسمة وشعر الحاجب بمكانه وقت طويل وبالنسبة ليا دايما اقول انه نفس فكرة واهمية مثبت الشعر،

 دايما اذا سرحتي شعرك لازم اللمسة الاخيرة السبراي المثبت عشان تثبت تسريحتك ومايكون الشعر متطاير.. 

بالزبط نفس فكرة مثبت الحواجب! يخلي شعر الحاجب بمكانه خصوصا اللي شعر حواجبها طويل وكثيف ومتطاير ماتحب تقصه او تشيله راح يحافظ عليه مرتب بشكل جميل ونظيف.

وعلى فكرة قبل محد يخترع ماسكارا الحواجب كانو الميك اب ارتيست يستخدمو الهير سبراي بفرشة حواجب ويثبتو فيها الحاجب p;

ممكن جدا اللي حواجبها ماتحتاج تعبئة ورسم تكتفي فيه لوحده بشكل يومي طبيعي وانا هذا اللي اسويه،
كمان اللي حواجبها خفيفة والشعر قليل اذا استخدمته راح يسمك الشعرة نفسها ويخليها محددة ويبين انه شعر حاجبك اكثف.

وبالاضافة للتثبيت خصوصا اللي شعر حاجبها غامق وتبغى تفتحه تقدر تستخدم النوع الملون يعطيها لون بدون ماتحتاج تصبغه او اي شي بس مجرد جل ملون يعطيك نتيجة بيرفكت. واللي ماتبغى لون بس تثبيت وترتيب تستخدم الشفاف.

يعني له استخدامات كثيرة وممكن يفرق كثير بشكل الحاجب اذا دخلتيه في روتينك واشجعك تجربيه.

نجي للماركات اللي جداً حابتها مؤخرا واستخدمها باستمرار:

‏MAC Prolong Wear

 

 التوب عندي بلا منازع! بسبب اني ابغى تثبيت وبنفس الوقت ابغى لون على بني لان حواجبي سودا واحبها تكون افتح شويه.

فهذه الماسكارا اعطتني النتيجة اللي ابغاها بشكل مثالي وكمان فرشتها عملية وحجمها صغير على قد شعر الحاجب وكمية المنتج كبيرة، الدرجة اللي تناسب شعري حاليا Quiet Brunette

عندهم الوان ثانية منها ومن خلال تجربتي اللي تدور على ماسكارا تعطي لون قوي كانها تصبغ الحواجب حتى لو كانت حواجبها سودا بتخليها شقرا تاخذ ماك.

هذا نوع ثاني كمان من عندهم

لاحظو اختلاف العلبة هذا مو برولونغ وير هذه من المجموعة القديمة عندهم مختلفة عن البرولونغ وير ان فرشتها اكبر شويه وفيها لمعة بس مو ملحوظة بس هذا النوع ممكن شويه يكتل عالحواجب.

وشخصيا افضل النوع البرولونغ وير اللي فوق لان تركيبته انعم واثبت ومو مرة تكتل ولونها قوي وفرشتها عملية اكثر.

بالنسبة لماركة انستازيا

Anastasia Clear Brow Gel 

تعتبر من اقوى ماركات الحواجب عندي النوع الشفاف هذا النوع عموما يناسب البنات اللي بس حابة تثبيت لشعر الحاجب بدون تلوين. يعطي ثبات ممتاز لوقت طويل ومايكتل التركيبة ممتازة عيبها الوحيد لاحظت ريحتها قوية وكمان الفرشة كبيرة شويه اتمنيت لو يصغروها عشان تناسب حجم شعر الحواجب اكثر.

بوبي براون

 Natural Brow Shaper & Hair Touch Up

 كمان من ماسكارات الحواجب المعروفة تعطي ثبات ولون للامانة اللون مو بقوة ماك يفتح بنسبة بسيطة بس برضو تعتبر جيدة 

يعني اللي تبغى تفتيح بسيط راح تعجبها ومن ناحية التثبيت رائعة وجودتها ممتازة ماتكتل ولا تخلي الشعر يابس. 

فرشتها حلوة كمان. اللونين اللي عندي ماهوغني وبرونيت،، برونيت ناسبني جدا.

بنفت 

 Benefit Gimme Brow

هي مخلصة عندي حاليا بس جبت صورة من تدوينة قديمة ليا، هذه مختلفة عنهم شويه بإن فيها ميزة تكثف الحواجب، لانها تحتوي على فايبرز صغيرة تغلف شعرة الحاجب وتبينه اكثف وفرشتها نقطة تمسك كل شعرة تمام.. مثالية جدا جدا اللي شعر حواجبها خفيف راح تحبها مرة، فيه منها لونين بني واشقر اختاري اللي يناسبك بس صبغتها مو قوية تعطي لون خفيف.

من الاشياء اللي اتعلمتها من جارد بيلي خبير بنفت تستخدميها عكس اتجاه شعر الحاجب يعني من نهاية الحاجب الى قدام بعدين تسوي العكس ترجعي تمشطي من بداية الحاجب لورا.

ليش؟ عشان يعطينا كثافة اعلى. جربوها ممتازة الطريقة.

بإختصار اعطيتكم كذا خيار اللي تحب تختار وتجرب حسب المنتج اللي يناسبها واحتياجها سواء تثبيت او كثافة او تلوين وغيرهم.. 

واللي ماقد جربت ماسكارا حواجب من قبل تجربها وتقولي كيف!

اشوفكم بتدوينة قريبة :*

❤❤❤

Twitter | Instagram | Email