November Favorites 2014 مفضلات شهر نوفمبر

شهر نوفمبر بالنسبة ليا كان مررة طويل :| مو مصدقة إنو خلص ودخلنا بديسمبر وقربت تخلص السنة :(

ماأعرف أخر الشهر أسوي مفضلات ديسمبر ولا مفضلات السنة كلها ولا الإثنين xp

جربت كثير أشياء جديدة بنوفمبر وبشارككم بأكثر المنتجات اللي حبيتها..

مفضلات العناية بالبشرة والجسم

Ocean Salt Face and Body Scrub

كتبت عنه بإنستقرام، مقشر منظف بملح البحر ومن محتوياته الليمون والأفوكادو والكوكونت يقشر ويعطي ترطيب ونضارة للبشرة، كثير قالو جربوه وحسوه خشن عالبشرة أنا أحطه ووجهي مبلول ويذوب الملح مع التقشير ماحسيته خشن بالعكس بس ممكن اللي بشرتها حساسة يكون قوي عليها وأحب أستخدمه ليدي كمان.

Sephora Instant Nail & Cuticle Care

عبارة عن مجموعة زيوت ومن ضمنهم زيت اللوز بداخل علبة واسفنجة تدخلي أصابعك وترطب منطقة حول الأظافر وتقوي الأظافر، الفكرة سريعة وعملية وأحب أستخدمه قبل ماأنام وترطيبه جميل.

Clarins Hand and Nail Treatment Care

هذا كنت أستخدمه زمان قبل سنتين يمكن ومرة كنت أحب ترطيبه ومؤخرا وصلت ٢٠٠ نقطة بسيفورا بلاك كارد وإخترت هدية وطلعلي فيها يرطب وينعم اليد ومايدبق بس ريحته ماتعجبني يمكن عشان كذا مارجعت إشتريته بس ترطيبه فظيع.

The Body Shop Glazed Apple Body Collection

مرررة حبيت ريحتها وأظن كانت قديمة في بودي شوب ورجعوها مؤخرا لأن الريحة مو غريبة عليا *-*

الصابونة رجعتها بكيستها عشان ماابغى أصورها مستخدمة ونسيت أصورها جديدة xp

صوابين بودي شوب ماتنشف البشرة ومع إني أحب الشاور جل أكثر لأنه أسهل وعملي أكثر بس حبيت الصابونة يمكن عشان ريحتها نفس المجموعة، 

الزبدة جمييلة :( عموما بودي شوب أكثر شيء أحبه عندهم ومالقيت شبيه له هو زبداتهم.

العطر ريحته خفيفة وثباته مو عالي بس مناسب للبيت ومع الزبدة يزيد ثبات الريحة *-*

مفضلات الشعر

Phyto Clarifying Detox Shampoo

هذا الشامبو قريت عنه كثير وتعبت وأنا أدوره! أماكن تواجد ماركة فيتو عموما بالصيدليات الكبيرة ورحت كل الصيدليات بجدة وأروح أسأل الصيدلي عن هالشامبو بالذات ولا كأنو موجود بالحياة ويجلس يقولي فيتو ماعندهم شامبو ديتوكس أصلا!

خارج عن الموضوع بس أكره لمن يصير كذا حتى لو فعلا كنت غلطانة المفروض مايكذّب الزبون هذا وأنا متأكدة وشايفته بالموقع إذا ماعندك المنتج قول ماوصلنا عادي :\

المهم لقيته أخيرا بصيدلية بالامارات مول تحت نسيت إسمها :(

الشامبو من إسمه ديتوكس يعني ينظف الشعر بعمق ويستخدم مرة بالأسبوع، أنا أحب أستخدمه بعد ماأزيت شعري بزيت جوز الهند عشان ينظف الشعر بعمق ومرة عجبني! ريحته نعناع منعشة وينظف بدون لا ينشف الشعر زي شامبو بيق من لش وسعره حدود ٦٠ درهم تقريبا مرة حبيته ولو لقيته مرة ثانية باخذ كمية :|

مفضلات المناكير

The Body Shop Nail Polishes in 110 & 820

بودي شوب الشهر الماضي نزلو مجموعة مناكير جديدة عندهم،، التركيبة لونها واضح من طبقة وحدة بس عموما أحط طبقتين عشان يبين اللون أرتب وأقوى وأهم شيء تنشف بسرعة وأظن مو كل الألوان قوية بس هذه اللي حطيت أرقامهم مررررة عجبوني واللونين نفس الواني اللي أحبها واحد على وردي لحمي درجته مرة جميلة والثاني على عودي. واللي لاحظته كمان إنها ماتتقشر اللون العودي جلست فيه ٥ أيام بدون بيس كوت ولا توب كوت ولا تقشرت *-*

جربوهم بالمحل وأحكمو،، سعر المناكير الواحد ٣٩ ريال و٣ مع بعض ب٩٩ ريال 

وهذه سواتشات للألوان من النت

مفضلات المكياج

أحلى جزء بالمفضلات عادة صح؟ :*

Nars Sheer Glow Foundation

البوست الجاي بيكون ريفيو لهذا الفاونديشن الجميل. أنا مرة مرة عجبني نتيجته عالبشرة حلوة وتغطيته عالية ومو ثقيل ودرجتي برسلونه مرة حبيتها عليا وحقيقة له مميزات وعيوب بذكرها كلها بالريفيو بس طوول الشهر كنت أستخدمه وجدا حبيته..

Nars Radient Creamy Concealer

مرة عجبتني تغطيته! جدا عالية وكريمي يتوزع بسهولة ويندمج تمام تحت العين ويحتاج تثبيت بالباودر ولو منطقة تحت العين عندك دهنية ويخطط معاك الكونسيلر ماانصحك فيه لأنه كريمي وممكن يخطط. ودرجتي فيه جينجر.

Nars Audacious Lipstick in Anita

لونه جميل :(

جبتلكم سواتش من النت عشان لا أجلس اوصف اللون وأنا فاشلة بالوصف

يليق مع أغلب لوكات المكياج وبيرفكت لكل يوم،

وتركيبة الروج مرررة تجنن مطفية كريمية ماتنشف الشفايف وثباتها حلو واللون تغطيته قوية ونفس اللون بالعلبة يبان عالشفايف.

أرواجهم مو متوفرة عندنا بس اللي مفكرة تطلبها أشجعها صراحة لأنها جميلة وتستاهل وحطيت باللستة كم درجة زيادة :*

ومنتجات نارس أخذتها من سيفورا الإمارت مول بدبي للأسف لسا مانزلت عندنا وتقدرو تاخذوها من برا أو أون لاين.

Inglot Gel Liner #77 

برضو كتبت عنه بإنستقرام بجد أكثر جل لاينر أسود جربته بحياتي! وثباته مررة عالي وكريمي وسلس بالرسم ينفع للكل المبتدئات والمحترفات على حسب الفرشة اللي تستخدميها معاه.

جربي مع فرشة رفيعة أو فرشة مشطوفة وشوفي إيش الأسهل والأريح بالنسبة لك وعادة المشطوفة أسهل للمبتدئات بس يعتمد حسب يدك متعودة على إيش،

أنا متعودة عالفرش الرفيعة بس أحبها تكون صغيرة وشعرها متماسك أتحكم فيها بسهولة ومرررة عجبتني فرشة سيقما E11 تقريبا أفضل فرشة لاينر جربتها مرة صغيرة ورفيعة وقد كتبت عنها كثير.

واللي حابة تلحق تخفيض سيقما لليوم

الرابط 

Sigma Beauty

والكود CM2014 بس لليوم خصم ٢٠٪ لكل الموقع.

Dior Lip Glow 004 Coral

مرطب للشفايف وواقي بنسبة 10 spf وملون من ديور اللي يميزه إنه يتفاعل مع شفايفك ويعطيك تورد طبيعي وثابت

أنا مخليته بشنطتي على طول ودايما أحطه بالطلعات الخفيفة حتى لو بدون مكياج نتيجته خفيفة ويخلي شفايفك تبين متوردة طبيعي وناعمة.

Elf Eyebrow Treat & Tame

جل للحواجب من ايلف درجة دارك، إذا فاكرين جل حواجب سيقما سويتله ريفيو قبل هذا مرة قريب منه جميل وثباته مو مرة عالي بس حبيته مايخشن شعر الحاجب ومافيه لمعة.

برضو إيلف عندهم خصم لليوم والكود CyberMonday

Sephora Pro Angled Brush #49

أحب فرش سيفورا! ومن أوائل الريفيوات اللي عملتها بمدونتي كانت عن فرشة سيفورا ٤٥ مرة أقدرها هالفرشة :*

فرشهم جودتها ممتازة مهما أغسلها ماتخرب ومتوفرة عندنا وسعرها مو مرة رخيص بس معقول اللي ماتقدر تطلب أون لاين أول فرش أنصحها فيهم سيفورا وبعدها إنجلوت.

هذه الفرشة بزاوية وشعرها ناعم وصناعي يشبه شعر فرش ريل تكنيك ومرة بيرفكت مع برونزر شانيل الكريمي أو الكونتور والبلاش الكريمي تدمجهم تمام مع البشرة وماتطلع خطوط وشعرها مايطيح، تستخدم مع الباودر كمان وتوزيعها ناعم.
سعرها أظن حدود ١١٥ ريال تقريبا أو أكثر شويه.

❤❤❤

Twitter | Instagram | Email