أحس إني مقصرة شويه بريفيو منتجات للشعر في المدونة :* وناوية قريب أعمل بوست عن روتيني بعنايتي بشعري
بس حبيت أعمل ريفيو سريع لمنتج جميل بستخدمه من كم شهر وحسيت راح يعجبكم..
المنتج هوا هذا البخاخ وإسمه
RG Cosmetics Keratin X-press
ماركة RG هي ماركة برازيلية بروفيشينال للشعر ويستخدموها بالصالونات الكبيرة وعندهم منتجات للكيراتين المنزلي ويتميزو بإن منتجاتهم خالية من الفورمالدهايد.
وهذا المنتج اللي بكلمكم عنه اليوم هو بخاخ مرطب ومنعم للشعر يستخدم بعد الكيراتين أو ممكن تستخدميه حتى لو ماعملتي كيراتين، فيه زيوت وبروتينات معالجة ومرطبة للشعر.
ممكن تستخدميه بعد الشاور أو على شعر ناشف قبل التصفيف أو بعد التصفيف.
طريقة إستخدامه:
بخيه على يدك ووزعيه على طول الشعر بدون ماتوزعيه عالجذور.
مميزاته من تجربتي:
- يعالج ويرطب الشعر بشكل فوري بدون مايبين مدهن ويثقل الشعر بالعكس خفيف.
- يعطي نعومة ولمعة تجنن للشعر.
- ريحته جميلة على كوكونت مرة أحبها.
- مرة يخفف النفشة سواء سشورتي شعرك أو بدون سشوار لاحظت فرق لو ماإستخدمته ينفش شعري لأنو طبيعته ينفش بس لمن أستخدمه مرة تخف النفشة والشعر ينعم.
صار أساسي عندي أستخدمه قبل السشوار *-* وأحيانا أستخدمه بعد الشاور إذا ماأبغى اسشور شعري بس عشان يعطيني ترطيب ولمعة أو يمنع النفشة.
المنتج مو كثير معروف بس بحثت عنه ولقيت ريفيوات إيجابية وفعلا أنا حبيته وأنصحكم تجربوه،،
سعره ٣٥٠ ريال
تقدرو تلاقوه بالصالونات الكبيرة بجدة زي منّه سنتر وصالون لوسين وغيرهم.
وشوفو حساب @BeautyBoxLtd عالإنستجرام عشان تعرفو عنه أكثر.
No comments:
Post a Comment