مفضلات شهر فبراير 2016 February Favorites

 اسفة المفضلات اتأخرت هذه المرة

بس في كثير منتجات جديدة وحلوة جربتها بشهر فيبراير..

نبدا بمفضلات البشرة:

٣ من منتجات ديرما اي صارلي فترة قاعدة اجرب كم منتج من عندهم وهذه الثلاثة منتجات ناسبوني جدا واخترتهم من المفضلات:

Microdermabrasion Scrub

سكرب ناعم وخفيف مو قاسي عالبشرة ولا فيه حبيبات خشنة ابدا انا احب السكرب يكون كذا.. باقي الانواع الخشنة تحسس بشرتي، هذا من مكوناته ملح البحر ومافيه مواد ضارة، استعمليه مرة بالاسبوع مرة ممتاز لتنعيم سطح البشرة وتنظيف الجلد الميت.

Hand Cream 

كريم ترطيبه علاجي ومكوناته طبيعية ماله ريحة ظاهرة ولا يدبق وترطيبه ممتاز اذا يدك ناشفة 

احب استخدمه قبل ماانام يوميا ومناسبني جدا راح ارجع اطلبه.

Acne Spot Treatment 

هذا منتج معالج ومخفف للحبوب مجهزتله تدوينة خلاص كاتبتها ومصورتها بس باقي انزلها بعد هذا البوست ان شالله

مجموعة فرش كليراسونك الكاشمير 

هنا بوست كامل عن الكليراسونك 

انا دايما متعودة عالفرشة للبشرة الحساسة ناسب بشرتي بس مااستخدمها يوميا وحبيت اجرب فرش الكاشمير لانها انعم واخف عالبشرة.. حبيتهم تنظيفها رقيق عالبشرة تنفع للاستخدام اليوم وكمان اللي بشرتهم جافة او حساسة وماناسبتهم الفرش العادية يجربو هذه ممكن تناسبهم.

حبيت جدا الفرشة الصغيرة لتحت العين وحوالين الخشم والشفايف، وانا شخصيا استخدمها للشفايف كمان اسوي فيها سكرب خفيف.

بالنسبة لمفضلات الشعر

مجموعة حمام الهنا بالعود للشعر شامبو وبلسم

ريحتهم عود فخمة وجميلة للشعر احب استخدمها بالمناسبات، والمجموعة نفسها ناسبت نوع شعري الجاف لانها بالارغان وتعطي ترطيب حلو، عندي منها كمان بالمسك وجميلة برضو.

اخذتها من مركز العناية بالشعر والبشرة.

تريزيمي بخاخ الحماية

هذا اظن اني اتكلمت عنه بالمدونة قبل ٣ سنين! كنت استخدمه وقتها واحبه ورجعتله مؤخرا.

قبل فترة كنا نجيبه من برا ماكان متوفر عندنا بس دحين صار موجود خلاص بأغلب الصيدليات والهايبرماركت.

ميزته يحمي الشعر من حرارة التصفيف ومهم تستخدمي اي نوع حماية عشان لا ينعدم شعرك. علبته عملية ببخاخ ومايدهن الشعر قوامه زي المويه وماله ريحة قوية.

Silky Smooth Argan oil Serum

هذا المنتج عبارة عن سيرم للشعر بزيت الارغان يعطي لمعة ونعومة ويبعد النفشة بعد التصفيف. حطي مسحة منه بس على طول الشعر وتجنبي الجذور عشان لا تدهن بسرعة نتيجته تجنن صرت مستحيل استغني عنه بعد التصفيف.

مفضلات المكياج:

مجموعة الفاونديشن من غيرلان
اتكلمت عنهم بانستقرام.. المجموعة هدفها تعطيك فينيش ندي وفيه نضارة، البشرة الجافة جدا بتحبها.

البرايمر يعطيك ترطيب وحبيبات الذهب اللي فيه تعطيك انعكاس للمعة ونضارة جميلة ممكن توزعيه قبل الفاونديشن زي البيس عادي او جربي اخلطيه مع اي فاونديشن عندك كمان بيخليه ديوي اكثر.. بالنسبة للفاونديشن حقهم الصراحة جدا ممتاز بالتغطية والفينيش شكله مرة طبيعي عالبشرة وثباته حلو حبيته مرة.

بالنسبة للباودر نفس الشي تعطي لوك طبيعي وفيه نضارة واهم شي خفيييييفة ماتعطي لوك مغبر وتغطيتها متوسطة ممكن تستخدميها لتثبيت الفاونديشن وحتى كباودر فاونديشن لوحدها تغطيتها بيرفكت لكل يوم.

بلسم نيڤيا 

لو تعرفو اليوتيوبر نيكي تتوريالز اخذته على مدحها هو بلسم لبعد الحلاقة بس لأن فيه مادة الجلسرين يخلي الفاونديشن يلصق ويثبت عالبشرة اكثر وفعلا لاحظت هالشي.

ماحسس بشرتي وماحسيته يدهنها ولا ينشفها هو مجرد تحضير بسيط قبل المكياج مع ثبات.

Ultra HD Concealer
ميزته انه كريمي وسلس ويعكس الاضاءة وينور تحت العين انا حبيت الدرجات الافتح استخدمها هايلايت تحت عيني يعطيني تنوير جميل، تغطيته متوسطة مو عالية ممكن يستخدم كونسيلر يومي لانه مو ثقيل..

بالنسبة لثباته يحتاج صراحة تثبيت بالباودر عشان لا يخطط واحب اثبته باللوس باودر.

الارواج المفضلة هالشهر 
MAC Retro Matte Liquid Lipsticks

ارواج ماك اللكويد نزلت عندنا حبيت تركيبتهم وثباتهم، صح تنشف شويه بس لانها ريترو مات فتحتاج ترطيب للشفايف قبلها وبتكون تمام.

 Captive

من مجموعة ماك الدائمة كنت استخدمه قبل سنييين ورجعتله مؤخرا لونه بينكي موڤي كذا ناعم وحلو لكل يوم ويناسب كثير البشرات الحنطية.

Whirl
ياسلام واخيرا طحت عليه!! لونه بيرفكت لكل يوم وجدا دارج ويناسب الاغلبية.

اخر شيء بالنسبة للعطر المفضل هذا الشهر كان
Dior Poison Girl 
الجديد من ديور ريحته اكثر شيء يغلب عليها السويت والفانيلا وريحته تعتبر باردة خفيفة وانثوية جدا

❤❤❤

Twitter | Instagram | Email