Tuesday, February 24, 2015

Clarisonic Mia 2 Review كل شيء عن جهاز كلاريسونك لتنظيف البشرة وتجربتي لجهاز ميا ٢





الريفيو المنتظر :*
اسفة جدا جدا إني تأخرت فيه :*
حاولت أكتب فيه كل المعلومات اللي أعرفها عن الكلاريسونك وتجربتي الشخصية معاها وإن شالله تكون مرجع مفيد لكم 




طبعا الأغلبية صار عندكم فكرة عن الكلاريسونك،، بشكل مبسط هي جهاز مصمم بموديلات مختلفة للوجه أو الجسم راح نتكلم عن الموديلات والأنواع بعد شويه، فكرة الجهاز يسهلك روتين عنايتك ببشرتك وتنظيفها بطريقة جدا فعالة وعملية بحيث إنه ينظف البشرة بشكل عميق و٦ مرات أكثر من تنظيفك العادي بأقل من دقيقة. وعاملين تجارب ودراسات كثيرة تثبت هالشيء وكثير من دكاترة البشرة ينصحو فيها ومامنها أي ضرر لو ماأستخدمت بمبالغة أو بشكل خاطيء.
الجهاز مقاوم للمويه وتقدري تستخدميه تحت الشاور عادي بس إنتبهي لمن تشحنيه مايكون فيه مويه طبعا.


النتيجة اللي كاتبين إنها راح تعطيك هيا الكلاريسونك:

- بشرة صحية نظيفة ويحسن من ملمس سطح البشرة بشكل كبير.
- تنظيف عميق وتسمح لمنتجات البشرة اللي تستخدميها بعدها إنها تمتص بشكل أفضل.
- ناعمة عالبشرة لدرجة ممكن تستخدميها مرتين في اليوم.

هذا فيديو مبسط يشرح عنها هنا


أنا راح أقولكم إيش حسيت وتجربتي بس بعد مااعطيكم فكرة سريعة عن باقي الأنواع:



Clarisonic Mia 1


تستخدم بس للوجه
تجي بس بسرعة تحكم وحدة 
ويجي معاها غسول جل منظف وشاحن 
وفرشة للبشرة الحساسة قابلة للتغير.
متوفرة بألوان مختلفة.

أرخص نوع فيهم سعرها ٩٩ دولار بس مو متوفرة بسيفورا عندنا بس أون لاين.



Clarisonic Mia 3


تستخدم بس للوجه مو للجسم وحجمها أكبر شويه من ميا ٢ 
من مميزاتها لها ٣ إعدادات لسرعة التنظيف وتقدري تتحكمي بوقت التنظيف عكس ميا ٢ تجيك أولريدي بإعدادات وقت معينة.
وتتميز كمان إنها تجي مع حامل تحطيها عليه وشاحن USB 
ونفس ميا ٢ تجي معاها فرشة البشرة الحساسة والفرشة تقدري تغيريها زي ماتحبي.
يجي معاها عينة غسول جل.
متوفرة بعدة ألوان.
أعتقد متوفرة بسيفورا عندنا أو راح تتوفر قريب ماعرف سعرها بالزبط عندنا بس بالموقع بدون شحن ١٩٩ دولار.



Clarisonic Plus


هذه تستخدم للوجه والجسم
حجمها كبير 
لها ٣ سرعات تتحكمي فيها للوجه وسرعتين تتحكمي فيها للجسم
تجي معاها فرشة الوجه للبشرة الحساسة وقابلة للتغير وكمان تجي معاها فرشة الجسم
يجي معاها عينة غسول جل للبشرة وسكرب للجسم
حامل للشحن.
متوفرة بسيفورا عندنا وسعرها حدود الف ريال أعتذر مو فاكرة بالزبط.



Pedi


مخصصة للقدمين فقط 
تجي بجهاز مع فرشتين وحدة للتنظيف والتقشير والثانية لتنعيم القدمين
مقشر - مرهم - زيت ترطيب
الجهاز تتحكمي فيه ب ٣ سرعات والشاحن USB
سعره بالموقع ١٩٩ دولار



تجربتي الشخصية My Review 

Clarisonic Mia 2

نجي للنوع اللي أنا إخترته وناسبني شخصيا وهو ميا ٢ وصورتها في أول البوست

تجي بسرعتين تتحكمي فيها بطيئة وسريعة
عينة غسول جل وممتاز صراحة وكميته كويسة ولو ينباع لوحده ممكن أشتريه بس مرتاحة حاليا مع غسولي من بيوديرما. وتقدري تستخدمي معاها أي غسول يناسب بشرتك بس مايكون قوي عالبشرة أو سكرب.
شاحنها كهربا وينصح أول ماتشتريها تشحنيها ٢٤ ساعة بعدين إبدأي إستخدميها ويصير تستخدميها عادي وتطول والله لمن أشحنها للمرة الثانية مااقدر أحدد كم بالزبط.
فرشة للبشرة الحساسة وقابلة للتغير.
مدة التنظيف دقيقة ويعطيك وقت معين لكل جهة من الوجه
٢٠ ثانية للجبهة
٢٠ ثانية للأنف والخد
١٠ ثواني الخد اليمين
١٠ ثواني للخد اليسار.

كل ماخلصت ١٠ ثواني مثلا يسوي صوت بيب وروحي للجهة اللي بعدها.


نوع بشرتي:

دهنية مختلطة معرضة للحبوب والمسام

طريقة إستخدامي لها:

مرة وحدة يوميا بس في الليل وماأستخدمها مرتين في اليوم.
أحط كمية بسيطة من الغسول عالفرشة وأبللها ووجهي يكون مبلول طبعا وأبدأ أستخدمها عالوجه بحركات دائرية رقيقة أبدا لا تشدي أو تضغطي هي راح تسوي كل الشغل وتطلع ذبذبات كافية إنها تنظف البشرة بعمق،
أستخدم فرشة البشرة الحساسة جدددا ناسبتني رائعة. وأستخدم سرعة وحدة اللي هي البطيئة.
واللي أنا أسويه مخليه ٢٠ ثانية لكل خد، و١٠ ثواني للجبهة و١٠ للأنف والخشم 
ليش لأن جبهتي صغيرة لووول والخشم والدقن ماتحتاج وقت طويل أحس كثير عليهم ٢٠ ثانية والخدود تحتاج تنظيف أطول خصوصا لو مع مكياج. 
المهم أنا حبيت هذه الطريقة لأن أولريدي الأعدادات موجودة مناسبتني ومايحتاج أغيرها أو أعدل عليها.


النتيجة:

فظيعة من جد حسيت بشرتي قبل ماكانت نظيفة! :\
أول مرة إستخدمتها أو أسبوعين طلعتلي حبوب صغيرة على جبهتي وطبيعي هذا الشيء لأن البشرة إتعرضت لتنظيف عميق فقاعدة تطلع البلاوي اللي جوتها للوووول هذا أبسط وصف ممكن اقوله لل purging phase

بس الحبوب مو مفروض تطول راح تلاحظي بشرتك بعدها رجعت طبيعية وصارت أنعم وأنظف من قبل
ملمس البشرة والمسام تحسنت بشكل كبييييييييير. 
تنظيفها عميق تجنن بعد المكياج تشيله بسرعة وسهولة بدقيقة وحدة وماتخلي ولا نقطة مكياج
وأقدر أستخدمها بالشاور كمان مرة عملية حتى بالسفر.
خلي معاها الCase أو الغلاف الأبيض والشيء اللي يحمي الفرشة عشان السفر تحافظ عليها.

أنصحكم فيها لأني كنت جدا مترددة قبل مااخذها خفت أخسر فلوس عالفاضي خصوصا وإنها مو رخيصة سعرها ٧١٧ ريال إشتريتها من سيفورا ريد سي مول وبكل أمانة أشوف إنها تستاهل كل ريال وأبداً ماندمت عليها.
هي مو المفروض تكون سحر للبشرة بس من ناحية التنظيف العميق فعلا ممتازة وعملية تنظف بكل سهولة وأريحية.
وأكيد لو بشرتك حساسة وبتعالجيها عند دكتور إستشيريه أفضل.

وإذا من ناحية الطلب أون لاين أرخص ولا لأ..
هي سعرها بالموقع ١٤٩ دولار لو حسبتها مع شحن وضريبة راح تكلف تقريبا نفس سعرها هنا.
وميا ٢ متوفرة بألوان كثيييرة ونقشات مختلفة وأحيانا تكون ليميتد.

اللي حسيته فرق ميا ٢ عن باقي الأنواع إنها صغيرة وعملية أكثر، مثلا البلس حلو إنها للجسم كمان بس صراحة حجمها كبير مو عملي وأنا حيكون أكثر إستخدامي لها للوجه فحبيت أخذ الأصغر. 
ميا ١ أرخص بس محدودة الإعدادات ماتقدري تتحكمي فيها وميا ٣ أغلى من ميا ٢ والفرق إنه تتحكمي أكثر بالأعدادات والسرعة.
يعني شوفي اللي تحتاجيه أكثر وحددي إيش اللي راح يناسبك اكثر.




أنواع الفرش Brush Heads


فرش الوجه Face Brushes

بالنسبة لأنواع الفرش ينصح تغيري فرشتها كل ٣ شهور وطريقة تركيب الفرشة سهلة ويحتاج تنظفي الفرشة أسبوعيا 
وشوفي طريقة تركيب الفرشة وتنظيفها بالفيديو هنا


 Sensitive Brush Head


هذه اللي تجي مع كل أجهزة كليراسونك.
مناسبة لكل أنواع البشرة حتى الحساسة والمختلطة،
تنظيفها عميق بس ناعم وماتحسس البشرة.
هذه الفرشة المفضلة عندي وماراح أستخدم غيرها لأن أعطتني النتيجة اللي أبغاها وماحسيتها قوية على بشرتي.


Deep Pore Cleansing Brush Head 


هذه فرشة مخصصة للتنظيف العميق للمسام وبحكم أنا بشرتي دهنية وفيها شويه مسام حبيت أجربها صراحة مرررة كانت قوية على بشرتي ماقدرت أستخدمها كثير على طول وقفتها.
فرشة البشرة الحساسة كانت كافية بالنسبة ليا للتنظيف ونتيجتها حلوة عكس هذه كانت شويه قاسية وقوية عالبشرة.

ومنزلين جهاز كليراسونك خاص مع هذه الفرشة وغسول جل وماسك للبشرة الدهنية صراحة لو إنتِ مجربة هذه الفرشة قبل وناسبتك راح يعجبك الجهاز بس لو ماقد جربتيها أنصحك جربي الحساسة أول.


 Delicate Brush Head


فرشة رقيقة تناسب البشرات اللي جدا حساسة وجافة لأنها ناعمة مرة عالبشرة.


Acne Cleansing Brush Head 


مخصصة للبشرات اللي تعاني من حبوب ماراح تهيج الحبوب أو تحسسها.



 Normal Brush Head


للبشرة العادية اللي ماتعاني من مشاكل أو حساسية وكاتبين عنها إنها مناسبة للرجال خصوصا قبل الحلاقة………
هما زين منهم إذا غسلو وجههم بغسول عادي أول عشان يستخدمو كليراسونك كمان! :(



Cashmere Cleanse Brush Head


هذه الفرشة مخصصة للبشرة الجافة واللي تعاني من تجاعيد لأنها رقيقة وتسمح إن البشرة تتنظف مع ترطيب.


 Radiance Brush Head


هذه الفرشة تساعد على تحسين نضارة البشرة وتقليل التصبغات والبهتان.




فرش الجسم Body Brushes

طبعا فرش الجسم بس تستخدم مع جهاز بلس زي ماذكرت قبل.

Velvet Foam Body Brush Head 


ناعمة ومخملية للجسم تعطي تنظيف ومساج ورغوة عالية.


Normal Body


تنظف بعمق وتشيل طبقة الجلد الميت بكل سهولة.




أسعار الفرش عندنا مو متأكدة منها بس اللي أعرفه الفرشة للبشرة الحساسة تقريبا ١٤٥ ريال
وأنا أطلبها أون لاين صراحة خصوصا من موقع Beauty.com لأن يعملو تخفيض ٢٥٪ وتطلعلي أرخص.



كثير شركات نزلو بدائل شبيهة لها وعندي من براون ولونا إن شالله أجربهم مزبوط وأعمل مقارنة بينهم مشكلة منتجات البشرة مو زي المكياج لازم أخذ وقت عشان أجربها وأحكم عليها صح :*




وبس تقريباً هذه كل المعلومات اللي أعرفها عن كليراسونك لو في أي إضافة حابين تقولوها أو تتكلمو عن تجربتكم بليز أكتبوها بالكومنتس *-*




❤❤

Twitter | Instagram | Email



20 comments:

  1. انا استخدمها من سنه تقريبا و في هذي السنة بالذات بشرتي حببت مرررره :( لما رحت لدكتور الجلديه قاللي بشرتك متعرضه لتنظيف عنيف نشط الخلايا الدهنيه تحت الجلد فعلى طول جت في بالي هالاله بخفف استعمالها بخليها كل ٣ شهور مره و نشوف

    ReplyDelete
  2. تسلم يدك على هالريڤيو الجمييل 💕
    أنا مرررا نفسي فيها بس متردده ، وسألت دكتورتي
    قالتلي ما أنصحك فيها وما أؤمن بهالاشياء :(

    ReplyDelete
  3. أستخدم اللي من سيقما وحبيتها وناسبتني بس الفرشة تتجمع فيها البكتيريا على طول وبحثت بموقعهم ماحصلتها ببحث بمواقع ثانيه ، خاطري بوحدة جديده بس محتاره بين براون وكلينك ، وانتظر ريفيو براون ♥ شكرا على التدوينه :* ♥

    ReplyDelete
  4. بحياتي ما ترددت اشتري شي يفيد البشرة بس هذي الكليراسونك سببت لي رعب .. اللي تقول ما تنفع وتطلع حبوب وتخرب البشرة واللي تقول بحياتي ما حسيت بشرتي جميلة الا بهذي الاداة .. من سنة وانا مترددة اشتريها بس شكلي في النهاية راح انهار واشتريها واستخدمها استخدام خفيف ومتدرج وبشوف كيف .. شكرا على الريفيو

    ReplyDelete
  5. اهلا وفاء يسعد مساك
    شكرا على هالبوست مره جميل وكفيتي ووفيتي بشرح يعطيك الف عافيه

    ReplyDelete
  6. شرح وافي وجميل شكرًا وفاء ♥️ أنا بسألك عن تنظيف الفرشة بعد الاستخدام اليومي لازم افكها من الجهاز؟ كل مره كذا؟ ولا عادي اغسلها وهي بالجهاز؟

    ReplyDelete
  7. يعطيج الف الف الف عافيه ع البوست جد متكامل و مفيد
    افدتينا جدا
    عافاج ربي و سلمتي ^^

    ReplyDelete
  8. This comment has been removed by the author.

    ReplyDelete
  9. فيه شي مافهمته الحين امسح الميك اب بعدين استخدمها ؟ والا هي لإزالة الميك اب ؟؟


    وشكككرا على الريفيو الي افادني جددااا <3

    ReplyDelete
  10. انا قريت انو الافضل تمسحين الميك اب وبعدين تستخدميها حتى تشوفي بقايا الميك اب فيها انا اليوم مسويه كذا وع الاساس خلاص مسحته ويوم غسلت وجهي فيها شفت كلها كريم اساس

    ReplyDelete
  11. انا قريت انو الافضل تمسحين الميك اب وبعدين تستخدميها حتى تشوفي بقايا الميك اب فيها انا اليوم مسويه كذا وع الاساس خلاص مسحته ويوم غسلت وجهي فيها شفت كلها كريم اساس

    ReplyDelete

  12. شركة تنظيف خزانات بمكة
    تنظيف خزانات بمكة
    شركة صقر البشاير تقدم لكم خدمات تنظيف الخزانات بمكة والطائف بأفضل الاسعار ومن خلال فنيون متخصصون حيث نقوم بتنظيفها ثم تعقيمها بأفضل مواد التعقيم
    شركة تنظيف خزانات بالطائف
    تنظيف خزانات بالطائف
    اتصل بنا على 0500941566
    التسويق الالكتروني اشهار المواقع لشركة ميكسيوجي
    elbshayr.com/6/Cleaning-tanks

    ReplyDelete
  13. ممكن تستخدمي فرشة ديب بور للجسم اذا قاسية على وجهك

    ReplyDelete
  14. ريڤيو يحمس الواحد يشتري بس سعرها غالي بالنسبه لضروفي وانتي قلتي في سناب مالها اي بديل يعني لو الوحده تشتري حق بروان ١٠٠ وشويا تخاف ماتطلع نتيجتك اش الحل

    ReplyDelete
  15. This comment has been removed by the author.

    ReplyDelete
  16. بصراحه اشتريتها من اسبوعين مااقدر احكم عليها لاكن انطباعي الاول عنها انها في قمه الروعه مااستعملها كل يوم بس ثلاث مرات بالاسبوع

    ReplyDelete
  17. الجهاز مررره رووعه ولا اقدر استغني عنه. اشتريته من تاجره في الانستقرام تعاملها راقي واسعارها حلوه وتوفر بضاعتها من امريكا. الجهاز اصلي ١٠٠٪ وعندها فرش متنوعه. انصح بالتعامل معها. (متجر فتافيت) علي الانستقرام

    ReplyDelete
  18. حبيبتي انا عندي ذي من سنه مره شئ خرافي للبشرتهم دهنيه اش تنظيف بامانه
    بس حبيت اسئلك هل الموقع الى ذكرتيه تاخذي منه الفرش يوصل دايركت للسعوديه ولا لازم بريد امريكي

    ReplyDelete

Related Posts Plugin for WordPress, Blogger...