ريفيو اليوم عن منتج جدا رائع من ماك صارلي فترة أستخدمه وهو مقشر فولكانيك اش من ماك
نزل ليميتيد قبل كم سنة وصار عليه ضجة وكثير حبوه وماك طوروه وغيرو بالتعليب حقه ورجعوه على طول بالمجموعة الدائمة. وصراحة أشوف منتجات ماك للعناية للبشرة جدا ممتازة خصوصا وإنها جزء من ماركة إيستيه لودر ومرة كنت حابة أسوي بوست أتكلم عن كل منتجاتهم بس حبيت أخصص بوست كامل لهذا المقشر بالذات ❤-❤
هو منظف ومقشر فعاليته عالية مكون من معادن ورماد بركاني وكريستالات السكر
مناسب لجميع أنواع البشرات، ينظف البشرة بعمق بدون مايسد المسام ولا يجفف البشرة بالعكس يعطي ترطيب وبنفس الوقت يمنع افرازات الدهون الزايدة بالبشرة وينعم سطحها بشكل فوري،
ممكن يستخدم على الوجه والجسم.
لونه أسود وفيه حبيبات سكر أوزعه على بشرة رطبة *يستحسن وإنتِ بالشاور*
وأخليه لمدة ١٠ دقائق بعدين أبدء أفرك البشرة بنعومة عشان أذوب السكر وأقشر البشرة وبعدين أغسله.
النتيجة:
يعطي نعومة رائعة للبشرة وشعور بالنظافة بدون مايجففها أبدا مرررة أدمنته أستخدمه مرتين بالأسبوع وبشرتي مرة تحسنت من بعده.
فيه ناس تحب تستخدمه كمنظف بشكل يومي بس حسيت تنظيفه عميق وأفضّل أستخدمه بشكل أسبوعي
واللي تحس إنه شوية قوي عليها تستخدمه مرة كل أسبوعين.
عيبه الوحيد ريحته مرة مزعجة بالنسبة ليا كأنها حنة :|
ولأن لونه أسود ممكن تحوسي فيه شوية عشان كذا أستخدمه بالشاور وأتأكد إني غسلته مزبوط.
بس بغض النظر عن الريحة مرة حبيت نتيجته وجدا أنصحكم تجربوه وإذا مترددين خذو عينة من ماك ممكن تودولهم علبة صغيرة يعبولكم وجربوه ومتأكدة بيعجبكم *-*
أماكن تواجده: محلات ماك
سعره: ١٥٧ ريال
من جد مررا بطل حتى انا ادمنتو :)
ReplyDelete