Sleek Makeup Reviews ريفيو لمنتجات سليك ميك اب

هالماركة صراحة أشعر بالأسف إنها مو متوفرة عندنا :(

جودتها عالية وأسعارها رخيصة وتعليبها راقي وعملي وSleek على إسمها xp

أتمنى تكون عندنا منتجات بهالمواصفات عشان الكل يقدر يشتريها… بس أحس لو فتحوها عندنا الأسعار بتتدبل طبعا ولا كأنها ماركة درق ستور :\

سليك أكثر شيء تميزت فيه البلاشرز. هي اللي خلتني أتحمس أطلب منهم!
وحتى باقي منتجاتهم اللي طلبتها برضو جميلة.

راح أتكلم عن كل منتج بالتفصيل مع السواتشز وبالأخير بحط موقع الطلب..

Blush By 3 Palette

ماطلبت بلاشرز منفردة بس طلبت باليتات، والألوان اللي في الباليتات ماهي موجودة بشكل منفرد بس موجودة درجات مشابهة.

مرة حبيت فكرتها ٣ الوان مع بعض عملية وتنفعني كثييير بالسفر وحبيت إختياراتهم متناسقة مع بعض. 

ودرجاتهم جدا متنوعة،، من أفتح بشرة إلى أغمق بشرة ممكن تلاقي ألوان تناسبها، والبشرات الحنطية العربية تناسبها أغلب الألوان ;)

جودة البلاشر مستحيييييل أقول إنها درق ستور! صراحة ولا مرة توفقت ببلاشر درق ستور كلها جودتها ماتعجبني مو زي سليك نهائيا!

صبغتها عالية جدا جدا من مسحة يبان اللون وثباتها فظييييع وماهي من النوع اللي مرة باودري وتتلطخ عالبشرة بالعكس ناعمة وتندمج بشكل بيرفكت. وترى تحتاج لمسة خفييييفة بس بالفرشة عشان ماتبين قوية.

بجد ماأبالغ بالوصف ومن قلبي أنصحكم تجربوها *-* تنافس بلشرات ماك وتارت ونارس.

Sugar

ألوانها دافية وشتوية تناسب البشرات المتوسطة والسمرا، حتى البيضا تقدر تستخدم هالدرجات بس تحتاج تدمجها وتخففها.

أحب هالدرجات! خصوصا الخوخي والبرونزي بالوسط.

الحلو فيها أنه فيه درجتين مطفية ودرجة برونز بلمعة أقدر أدمجهم مع بعض أو أستخدم كل درجة لوحدها 

وهذه سواتشز للألوان 

Pumpkin

ألوانها فاقعة ومنعشة *-* جدا مناسبة للبشرات الحنطية والسمرا وحلوة بالصيف والربيع.

الأورنج مررة جميل بشكل مو طبيعي! ممكن تشوفو شكله يخوف بالعلبة بس إذا بشرتك حنطية تان أو سمرا جربيه على ضمانتي وشوفي كيف يعطي البشرة دفا وحياة ولون جميل *-*

الوردي اللي بالوسط اندرتونه دافي جميل مو بارد وتحسيه يبين أوفر بالعكس.

الأحمر لونه مايل نتفة للكورال ويعطي حُمرة طبيعية للخدود حلو إذا كنتي حاطة ميك اب خفيف وروج نيود.

بس زي ماذكرت لمسة بسيطة بس بالفرشة عشان مايبين أوفر. 

السواتشز

Pink Lemonade

هذه نزلوها جديدة بفترة الربيع وموجودة على طول.

فيها لونين باودر وبالنص كريم

والألوان وردية ناعمة تناسب البشرات البيضا والحنطية،، الباودر كلهم ساتين وفيهم شيمر بسيط والكريمي مطفي.

الكريمي مو من النوع اللي مرة سايح ويدبق بالعكس خفيف وتحسيه كريم على باودر يعطي نفس نضارة الكريم بدون مايدبق، ثباته حلو ماراح يكون نفس ثبات الباودر طبعا بس برضو يجلس وقت طويل وسهل بالتوزيع حتى لو بإصبعك.

السواتشز

وبس هذه البلاشرز اللي جربتهم وراح أطلب زيادة إن شالله ومن درجات البلاشرز اللي جدا معروفة بسليك بس ماطلبتها لأن عندي حق نارس،، حبيت أكتبلكم عنها لأني متأكدة إنها حلوة نفس بقية بلاشراتهم.

هي درجة Rose Gold وتعتبر بديل عن نارس أورغازم.

طبعا نارس أورغازم هذا أحسه أكثر بلاشر مشهور بالحياة! من سنييين والكل يتكلم عنه ويحبه لأن لونه يناسب كل البشرات بكل وقت ومع أي ميك اب لوك. اللي ماعندها أو ماهي حابة تشتري نارس لأنه غالي تاخذ هذا اللون :)

باليت البلش سعرها ١٥ دولار والبلش المنفرد سعره ٧ دولار.

Contour Kit in Light & Medium

الكونتور كت تعتبر بديل قوي جدا للكت تبع ميك اب فورإيفر! 

نفس تركيبة البلاشرز اللون قوي وسهلة بالدمج وماتبين ملطخة وجدا ثابتة.

الكونتور أندرتونه بارد بيرفكت للنحت 

والهايلايت لمعته مو أوفر وقوي بالعكس ساتين تقريبا بين المطفي واللميع ويبين طبيعي جدا.

اللايت للبشرات الفاتحة وحتى المتوسطة والحنطية تقدر تستخدمه

الميديم للبشرات المتوسطة والسمرا

الدارك (مو بالصورة) للبشرات الأفريقية.

هذا سواتش للميديم

صراحة ماراح أرجع أشتري كت ميك اب فورايفر أبدا! هذا نفس الجودة والنتيجة ومرة فرق بالسعر.

سعره ١٠ دولار

كمان عندهم كونتور باليت نفس باليت البلاشرز فيها ٣ الوان كونتور وهايلايت وبرونز أو بلاشر حبيت فكرتهم وناوية أجربهم إن شالله.

Eyeshadow Palette in Oh So Special

صراحة مسكت نفسي بالقوة ماأطلب أكثر من باليت :( أدخلو بالموقع وإتفرجو عالباليتات كلها مُغرريييية!
وماكنت أبغى أطلب ألوان كلها طبيعية لأن عندي كثييير فأخترت هذه حبيت تنوع ألوانها،،

حاطين ألوان دافية وباردة وفاقعة وطبيعية ومطفي وشيمر مع بعض.

فيها ٣ ألوان أساسية مطفية الأسود والبني المتوسط والكريمي

البني ينفع تستخدميه للحواجب كمان. 

ولون بني دافي جملي مطفي ينفع للكسرة ودمج الألوان.

واللون الباذنجاني الشيمري فظيييع يجنن بالسموكي.

السواتشز (مو مبين جمال الألوان زي بالحقيقة)

الباليت متنوعة جدا وأقدر أسوي فيها لوكات كثير،، جودتها حلوة حسيت الألوان الشيمر زي الزبدة ناااعمة ولونها قوي بس بعض الألوان المطفية (مو كلها) خفيفة مايطلع اللون بسرعة نفس الشيمر.
علبتها ماتاخذ مساحة وفيها مراية كبيرة حلوة بالسفر،، تجي معاها أداة التطبيق الإسفنجية الفاشلة لول ماتنفع للشدو ابدا بس ترى تقدري تستخدميها للغليتر.

وعندهم باليتات كثير بدرجات مختلفة وسعرها ١٢ دولار

أخر منتج وهو 

Matte Me Lipstick in Birthday Suit 

صراحة هذا يوم أحبه ويوم أكرهه! لول

روج سائل ثابت لونه نيود حلو وطبيعي ومطفي جدا وثاااابت من قلب بس يحتاج عناية قوية للشفايف.

أبدا ماينفعلك إذا شفايفك جافة مرة ينشف،،

ماراح أرجع أشتريه صراحة :( بس عاجبني اللون xp

سواتش

الموقع اللي أطلب منه

www.sleekmakeup.com

والماركة أعتقد متوفرة بس في بريطانيا حتى بأمريكا مو موجودة بس موقعهم يشحن لكل مكان حتى للسعودية مباشرة.

ومؤخرا صرت أطلبها من موقع صيدلية بووتس البريطاني لأن يشمل أكثر من ماركة وأطلب مرة وحدة

www.boots.com

أشحنهم لبريدي البريطاني عن طريق شوب اند شيب ارامكس.

وبس هذه المنتجات اللي جربتها من سليك إن شالله عجبكم الريفيو وأكتبولي تجربتكم مع منتجاتهم الجميلة *-*

❤❤❤

Twitter | Instagram | Email