Lime Crime Velvetines Review ❤ Red Velvet | Wicked | Pink Velvet ريفيو أرواج لايم كرايم المخملية

هذا بوست أرواج لايم كريم زي ماوعدتكم :*

قلتلكم قبل مشكلتي مع موقعهم بس أحس دحين حلو المشكلة وكل الستوك مليان!

الستوك عندهم كان مرة فاشل دايما كل شي أوت اوف ستوك ويجلس بالشهووور وخدمتهم سيئة بالرد

ماحبيت أطلب من غير الموقع صراحة ولأني مالقيت مواقع عدلة تبيعهم حتى قريت ريفيوز أجانب قالو نفس الكلام بإختصار موقعهم سيء..

بس المهم إني بيوم دخلت الموقع ولقيت الألوان اللي أبغاها كلها موجودة وطلبتها مرة وحدة.

رابط الموقع

http://limecrime.com/

الشحن مجاني لأمريكا فوق ٥٠ دولار

ويشحنو انترناشونال بسعر ١١ دولار تقريبا

يقبل الفيزا السعودية.

سعر الروج الواحد من الأرواج المخملية ٢٠ دولار

نجي للريفيو

الأرواح عبارة عن Lip Stain وإذا ماعندك فكرة عن الستين هوا يعتبر ملون للشفايف يصبغها بشكل مؤقت ويضل ثابت اللون لفترة أطول من الروج العادي.

جربت كثير من هالنوعية بس صراحة ماجربت نفس جمال وثبات هذه الأرواج!

لأن عادة هذه النوعية تنشف الشفايف جدا أو ماتبين ناعمة ومرتبة بس هذه بالعكس.

تجي سائلة وبعلبة زي القلوس بس أول ماتوزعيها عالشفايف دقيقة وتصير مطفية وتثبت.

مميزاتها:

- مخملية ومطفية عالشفايف مافيها لمعة.

- ثابتة لأكثر من ٩ ساعات بس شويه يبهت اللون بعد الأكل ويحتاج تعيدي عليه طبقة بسيييطة بس.

- ماتنشف أو تشقق الشفايف ولأنها مطفية أكيد تحتاج مرطب قبلها بس مقارنة مع أرواج بنفس النوعية هذه ماتنشف وتؤذي الشفايف زي الباقي.

- مايطبع ولا يسيح.

- صبغته عالية واللون قوي زي مو مبين بالعلبة يبين عالشفايف من مسحة.

- الألوان تناسب أغلب البشرات.

- علبتها كيوت xD

- جدا عملية ومناسبة للسفر.

- ريحتها حلوة مو مزعجة.

عيوبها:

- لو وزعتي طبقة ثقيلة ممكن تصير كابوس مرعب وراح تكرهيها لأنها راح تتكل وماتبين حلوة أبدا يحتاج توزعي مسحة بسيطة ومتساوية عالشفايف وماتطبعي شفايفك على بعض خليها لمن تنشف وتثبت وراح تطلع بيرفكت.

- سعرها غالي ٢٠ دولار مقارنة ب١٦ دولار لأرواج ماك بس عندنا طبعا يابلاش :|

الألوان اللي جربتها

Red Velvet

أعتقد أول لون صنعوه وجدا مشهور عندهم.

درجته أحمر أندرتون بارد ويناسب كل البشرات 

صراحة جدا جميل خصوصا اللي تحب الروج الأحمر جدا أنصحها تجربه بيرفكت لأنو مايسيح وثابت ومخملي.

Pink Velvet

لونه فوشي بارد مو كثير أستخدم هذا اللون بس ماقدرت أقاومه لذيييييييذ وصيفي منعش.

Wicked

لونه خطيييير أكثر لون أنصحكم فيه :(

أحمر عودي بارد يناسب الكل ومرة حلو بالخريف والشتا يجنننن وفخم أكثر لون أستخدمه بين الثلاثة جدا عاجبتني الدرجة.

وهذه باقي الألوان اللي عندهم أتمننننى ينزلو ألوان لحمية وفاتحة بتكون شيء جدا جميل وعملي لكل يوم

قلبي قاعد يوسوسني أطلب اللونين اللي فوق p;

وبس هذه تجربتي مع الأرواج المخملية من لايم كريم أنصحكم فيها تركيبتها جميلة،

ولو جربتوها أعطوني رأيكم :*

❤❤❤

Twitter | Instagram | Email