Tuesday, February 2, 2016

January Favorites 2016 مفضلات شهر يناير









مفضلات شهر يناير شويه كثيرة لان جربت اشياء كثير وكمان جزء منها كان من اللي جربته بشهر ديسمبر وقلت اتكلم عنهم بالمرة.


ببدا بمفضلات العناية بالبشرة:

Replenix Scrub
سنفرة للوجه ناسبتني واستخدمها تقريبا بشكل اسبوعي
حبيباتها ناعمة عالبشرة توزعيه على بشرة شبه مبلولة او ناشفة زي الماسك وراح تحسيه يبدا يسخن بعدين تغسليه بالمويه عادي الحرارة هذه تساعد على انه ينظف البشرة بعمق ويتخلص من كل طبقة الخلايا الميتة على سطح البشرة ويخليها تتجدد وتصير انعم وانظف. 
اخذتها من عبر الطب.

Bobbi Brown Intensive Skin Supplement
سيرم من بوبي براون اذا تلاحظو بالصورة مخلص استخدمته باستمرار طول الفترة اللي راحت
سيرم مرطب ومقاوم لعلامات التقدم بالسن زي الخطوط التعبيرية والتصبغات ميزته سريع الامتصاص مايترك اثر دهني
يناسب البشرة الدهنية وجميع انواع البشرة وممكن البشرة الجافة تستخدمه قبل المرطب بيكون ممتاز.
ماتوقعت منه نتيجة مذهلة لان بوبي براون ماركة ميك اب مو سكين كير بس نتيجته كانت كويسة اعطاني ترطيب بدون مايدهن ولا يحسس البشرة بس لو برجع اشتري راح اخذ كلارنس للامانة نتيجته اقوى عالبشرة من ناحية تخفيف الخطوط والتصبغات. وبوبي براون كان ترطيب حلو فقط.

Bobbi Brown Protective Face Base SPF50
بيس واقي شمس بنسبة حماية ٥٠ ممتاااز قبل المكياج بالصباح او حتى بدون مكياج 
جدا ناسبني تمتصه بسرعة البشرة مايدهن ولا فيه ريحة واقي الشمس المزعجة
من مكوناته الكافيين وخلاصة طحالب البحر يعطي حيوية للبشرة وشكل صحي بالاضافة لمكونات تعزز الترطيب بالبشرة.


منتجات العناية بالجسم والشعر

Nature's Gate Henna Shine Enhancing Shampoo
شامبو للشعر بالحنا والافوكادو من اي هيرب 
اتكلمت عن هذه الماركة من قبل وجربت من عندهم شامبو بالرمان وكان من مفضلاتي حبيت اجرب هذا كمان اللي بالحنا وحبيته
ماحسيته فرق كثير عن اللي بالرمان صراحة. 
احب ان شمبواتهم من مكونات عضوية وطبيعية قدر الامكان وخالية من السولفيت والباربين والكيميكالز الضارة. 
اغسل فيه شعري مرتين عشان ينظف مرة وحدة ماتكفي بس مرتين ممتاز وماحسيته ينشف شعري او يزيد النفشة بالعكس راح ارجع استخدمه واطلب بالمستقبل ان شالله من هذه الماركة ناسبت شعري جدا.
هنا حطيت تدوينة كاملة عن اي هيرب بطريقة الطلب وكل شي

 Shia Moisture Baby Lotion
لوشن بالشيا من ماركة شيا مويستشر برضو موجودة في اي هيرب
الماركة كلها مواد طبيعية وآمنة للاستخدام حتى للاطفال
ترطيب اللوشن فظيييع واقرب للكريم مو سائل بالعكس شويه ثقيل وترطيبه عالي زي الزبدة تقريبا
ريحته هادية مو قوية مايلة عالسويت شويه.
مرة حبيته وبجرب منتجات اكثر من الماركة تحمستلها.

Bath & Body Works Twilight Woods Hand Soap
صابون سائل لليد من باث اند بدي ووركس بريحة توايلايت وودز
اخذته بالتخفيضات الموسمية اللي يعملوها بشهر يناير واعتقد جولاي كمان
ترى مااشتري منهم الا وقت التخفيض هههه لانهم يخفضو على كل شيء واسعارهم تصير مو معقولة بالتخفيض مرة رخيصة.
المهم الصابون نفسه مرة عجبني ريحته حلوة ماينشف اليد وفيه حبيبات صغيرة تسوي سكرب خفيف لليد كمان ممتاز وبرجع اشتريه اكيد اذا خفضو.


العطور

Jo Malone Velvet Rose and Oud
 عطر جو مالون فلفت روز اند عود عندي الحجم الميني مرة من علبة العطور الشرقية نزلت اعتقد بالهوليديز
ريحة العود والفلفت روز مرة حبيتها صح انها عود فيها فخامة بس مرة انثوية وفلورال والحجم ميني كانت بيرفكت ليا
للمناسبات اخذها بالكلتش مرة حبيت العطر ويستحق تطلو عليه جربوه بالمحل.

Hammam Al Hana Egyptian White Musk Body Spray
بخاخ المسك الابيض من مجموعة حمام الهنا
ريحته مسك نظااافة وخفيف مرة اعشقه بعد الشاور 
او حتى قبل اي عطر استخدمه خصوصا بالصباح هادي مو قوي.


المكياج

Tom Ford Illuminating Primer
برايمر لمعة من توم فورد موجودة هالفكرة بكثير ماركات ومجربة كثير واغلبهم متشابهين وحلوين.
هذا عجبني لانه مو دهني او كريمي بزيادة ولمعته تعطي صحة ونظارة للبشرة بدون اي ذرات شيمر او لمعة واضحة 
احطه قبل الفاونديشن واحيانا بعد الفاونديشن بس لازم تحطيه قبل الباودر لان غلط تحطي كريم على باودر.
لمعته جميلة ومو قوية وموجود منه الوان على مشمشي وبينك يعطي قلو حلو للبشرة الباهتة حسب الاندرتون اذا بارد او دافي
اللي عندي الشفاف.
Diorskin Forever & Ever Wear Extreme Perfection & Hold Makeup Base
كمان برايمر بس من نوع ثاني مو لميع، هذا النوع اللي يزيد ثبات الفاونديشن اكثر ويسوي طبقة بين البشرة والفاونديشن مايخلي الفاونديشن يقطع او يدخل بالخطوط او تتشربه البشرة يعني باختصار يخلي شكله وثباته احلى
ملمسه سائل تحتاجي ترجي العلبة قبل الاستخدام خفيف جدا عالبشرة مو سيليكوني 
ويستحق تجربوه.

Diorskin Forever Perfect Makeup Foundation
فاونديشن ديور فوريفر الجديد مطور عن فوريفر القديم
مازال الفينيش والتغطية متقاربة ماغيروه كثير بس اتطور اكثر عشان يناسب التريند حاليا بالفاونديشن 
يعني الاغلب حاليا صار يبغى بشرة تبين صحية فيها نضارة ماتكون مرة مطفية بشكل مكتم 
وهذا الفاونديشن زي كذا مطفي بشكل طبيعي وفيه حياة مو مغبر جدا ممتاز للبشرة الدهنية والمختلطة 
ثباته عالي مايتغير او يقلب لونه وتغطيته ميديم الى عالية، انصحكم خذو سامبلز منه وجربوه كم يوم وشوفو اذا يناسبكم ولا لا
حبيته وناسبني.
Diorskin Forever & Ever Control Loose Powder
طبعا مو شرط تستخدمي المجموعة كلها مع بعض ممكن تاخذي اللي يعجبك او يناسبك اكثر او اللي تحتاجيه منهم
بس حبيت اجربهم مع بعض واحكم عليهم وزي مانتو شايفين بالمفضلات لانهم ناسبوني.
البودرة من اخف البودرات اللي جربتها ديور صراحة بودراتهم راااااائعة خفيف وناااعمة مستحيل تبين مغبرة ولا كيكي
تعطي لوك مطفي طبيعي وتتحكم بالدهون خلال اليوم، علبتها ممتازة مرة عملية وماتخلي البودرة تتكبكب وتحوس.
جربوها عندهم اللي تحب اللوس باودر راح تعجبها.
Makeup Forever Ultra HD Invisible Cover Stick Foundation #505
فاونديشن ستيك اتكلمت عنه بتدوينة ريفيو مفصل هنا
بس الفترة الاخيرة مرة حابة استخدمه للكونتور سلس بالدمج وثباته عالي ومو ثقيل ومو مرة كريمي يزيت زي كريولان بالعكس.

Bobbi Brown Intensive Skin Serum Corrector and Concealer
 كونسيلر وكوركتر من بوبي براون نازلين جديد بمجموعة السيرم 
ميزتهم فيهم ترطيب وخفيفين تحت العين بس التغطية ممتازة والالوان رااائعة درجاتهم متنوعة تناسب الكل واختيار الالوان من جد اختيار احد فاهم بالمكياج لتصحيح الهالات والعيوب.
الدرجات بالمصححات مختلفة بين الوردي والمشمشي الفاتح والغامق والاورنج عشان الكل يقدر يختار اللي يناسبه مو الكل يستخدم كوركتر بلون واحد وبس! انا ناسبني جدا الكوركتر المشمشي Peach بشرتي حنطية وهالاتي متوسطة مايناسبني الاورنج مرة غامق عليا ويبان احمر تحت عيني بس المشمشي يكنسل الهالات بشكل ممتاز ليا ومايبين ابدا.
الكونسيلرات كمان متنوعة والوانها كثير من الافتح للاغمق تقدري تاخذي لون قريب منك تستخدميه بدون كوركتر اذا ماتحتاجي تصحيح او تاخذي لون افتح بكم درجة بعد الكوركتر يطلع جميل ويعطي تنوير تحت العين.
باختصار كونسيلر جميل ويناسب الاغلبية خصوصا لو عندك خطوط او تجاعيد تحت العين جربيه.

Urban Decay Gwen Stefani Palette
صراحة مااتوقعت استخدمها كثير بس الباليت الوانها عملية وتقدري تستخدميها بشكل يومي وكمان لو حبيت اسوي لوك سموكي او سهرة تساعد برضو


جودة شدوات اربن ديكاي معروفة ومشهورين فيها حبيت الالوان البنية المطفية واللون البني المحمر فوق بالزاوية
وكمان الوان الهايلايت جميلة جدا.
موجودة بسيفورا.

Makeup Forever Aqua Liner
ايلاينر اسود ضد المويه من ميك اب فوريفر
سواده عالي ثباته رااااائع حتى لو عيونك تدمع مايسيح ولا يحوس 
ريشته قصيرة ورفيعة مو مرة لينة يعني التحكم فيها سهل شبيهة بالقلم وسهل بالرسم 
جربوه اذا تدورو على ايلاينر جديد ممتاز.

Anastasia Clear Brow Gel
من المنتجات اللي كثير اشوف عليها مدح واخيرا جربته
صراحة قلت كثير ومازلت عند رأيي انستازيا تجنن للحواجب من جد مبدعة فيها ومنتجاتها من افضل المنتجات للحواجب
الجل الشفاف يثبت الحواجب بدون مايخلي الشعر يابس ولا يبين مكتل بدون لون بس مجرد تثبيت وعندهم درجات مختلفة لو حابة جل يعطي لون وراح اجرب الملون منه ان شالله. مااستغني عن خطوة ماسكارا الحواجب ابدا ترتب شعر الحاجب وتثبته وتخليه احلى.

MAC Verve Lipstick 
لونه بني على موف من الواني المفضلة هذه الفترة حطيتله سواتش بانستقرام مؤخرا 
واستخدمه بكثرة نوعه ساتين مو مطفي ولا كريمي مريح عالشفايف وثباته متوسط.

Blink lashes in Bling Bling
حبيت الرموش مريحة الباند حقها خفيف مو ثقيل وستايل بلينق بلينق يعطي تطويل للرموش وكثافة طبيعية.

❤❤

Twitter | Instagram | Email
 


5 comments:

  1. حبيت الريفو عن المنتجات مرره ������ ، بالذات السكين كير ،
    بس جد دايم اتسائل ليه البلوقرز الخليجيات و السعوديات بالذات ما يجربون منتجات جديدة الا اذا جات هدية لهم !!!!
    يعني تجي المنتجات متأخر السعودية و كولكشنات لميتد اديشم وتوها توصل وتو البلوقرز يتكلمون عنها
    يعني افتح اليوتيوب و اشوف الاجانب يسون رفيوهات و بعضهم يشترون المنتجات و الاشياء الجديدة كلهازعرف منهم !!!
    بعكس هينا لازم يجيها المنتج عشان تتكلم عنه و تجب بلوقر ثانيه تشتري مثله و تتكلم عنه

    ReplyDelete
    Replies
    1. مافهمت وجهة نظرك وايش مقصدك من الكلام. المنتجات من ماركات اجنبية طبيعي بتنزل برا قبلنا والبلوقرز الاجانب يجربوها قبلنا شي بديهي يعني وعشان تنزل عندنا هنا تاخذ وقت طويل احيانا نطلبها اون لاين عشان تجينا قبل ونجربها مو بالضرورة هدية او مو هدية اشتريت او ماشتريت المهم التجربة توصلك بصدق يعني فين المشكلة؟

      Delete
    2. انا كثير افتح الاون لاين شوبينق و اجلس اسوف اشياء كثير عليها تقيم عالي او جديدة و اتحمس اشتريها بس للاسف ما اشوف اي بلوقر تكلمت عنها خليجية و اتردد اخذها او لا ، لان تقيم المنتج يختلف من مكان الى مكان ، انبسط مرره اذا شفت بلوقرز تكلمت عن شيء حلو وجديد ومو شرط ترند 👌😍😍😍

      Delete
  2. حبيبتي وفاء كيف اطلب الرموش الله يسعدك 💋💋💋💋ويفرح قلبك مثل ماتسعديني برفيوهاتك وابغا كمان تقولين لنا عن اخر طلبية لك من ايهرررب بليييززز بليزززز ابغا اطلب قريب وانتظر الرفيوو تبعك بليززز ياقلبي

    ReplyDelete

Related Posts Plugin for WordPress, Blogger...