Sunday, March 20, 2016

Derma E Very Clear Spot Treatment معالج الحبوب من ديرما إي






اليوم الريڤيو لمنتج بطل! 
ينفعلكم اذا كنتو زيي، تكون حياتكم حلوة وبشرتكم صافية وفجأة لمن يصير عندك شي مهم الحبوب تطلع بأماكن لم ينزل الله بها من سلطان :)
الحبوب اللي تطلعلي اكثر شي من الستريس يعني لما اتوتر من شي معين على طول الاقيلي حبة طالعة بنص جبهتي مثلا، ولا تكون هرمونال كل شهر لازم اتفاجأ بحبة حبتين..
ومنتجنا اليوم مخصص لتخفيف وعلاج الحبوب الدهنية،، قريت عنه ريفيوز وتقييمات عالية
اسمه Very Clear Spot Treatment من ماركة ديرما E من قريب طحت على هذه الماركة منتجاتها ممتازة ومكوناتها اغلبها عضوية وطبيعية اذا لاحظتو كانت بمفضلاتي..

والمنتج زي باقي منتجات ديرما اي مكوناته نباتية خالِ من المواد الضارة والكيميكالز
 ويحتوي على مكونين مهمين للبشرة المعرضة للحبوب وهذه المكونات الفعالة بالمنتج اللي هي زيت شجرة الشاي وحمض الساليسلك بنسبة ٥٪ يساعدون على تعقيم البشرة والقضاء عالبكتريا المسببة للحبوب،
يحتوي كمان عالبابونج واللافندر وهذه المكونات تهديء البشرة وتمنع التهيج والاحمرار بالبشرة يعني مناسب كمان للي بشرتها شويه حساسة. 
تركيبته زي الجل سائل يعني مو دهني ولا ثقيل بس احطه وماعاد احس فيه على بشرتي.

من مميزاته كمان علبته عصار بيرفكت! انظف من العلبة الدائرية عشان ماتدخل بكتريا بالمنتج 
وكمان تطلعلك المنتج بالكمية اللي حابتها وعملي معاك بالشنطة اذا حبيتي تستخدميه خلال اليوم.

مالقيت فيه عيوب الا انه لازم تحطيه ٣ مرات باليوم لو حطيتيه مرة وحدة ماراح يسوي فرق كبير يعني لازم تلتزمي بطريقة الاستخدام.


طريقة استخدامه:
وزعي نقطة منه على مكان الحبة فقط مو على اي مكان ثاني بوجهك لانه شويه ينشف، واعيدي توزيعه ٣ مرات باليوم.
راح تلاحظي الحبة تبدا تنشف وتصغر باليوم الثاني بشكل ملحوظ يعني انا بالعادة تاخذ معايا اسبوع عشان تنشف وتروح ومع الكريم يومين تقريبا وتروح.
اهم شي لا تقشري الحبة ابدا ولا تمسكيها خليها تخف لحالها عشان لا تترك جرح او اثر عميق.
صرت كل ماحسيت حبة بتطلع احطه على طول لأنه يعقم مكان الحبة اولا وثانيا ينشفها ويوديها بسرعة
 اعتبره منتج ممتاز وراح ارجع اشتريه سعره مناسب ماحسسلي بشرتي وشفت منه نتيجة فعالة وانصحكم تجربوه.

اماكن تواجده وسعره
سعره ١٠ دولار تقريبا ٤٠ الى ٥٠ ريال
وتلاقوه بموقع اي هيرب هنا شرحت طريقة الطلب.
وبجدة لحد علمي موجود بالصيدليات الكبيرة زي الوزير - نوره - كوزموديرم - ادمه - اكسجين - الاسرة.

اذا حابين ريڤيو لكل منتجات ديرما اي اللي عندي قولولي ️❤


❤❤

Twitter | Instagram | Email

3 comments:

  1. يعطيكي العافيه وفاء ..
    من أول ما تكلمتي عنه في سناب دورت عليه في آي هيرب بس مالقيته نفسه
    لقيت هذا
    Derma E, Very Clear Spot Treatment Anti-Blemish Complex

    http://sa.iherb.com/Derma-E-Very-Clear-Spot-Treatment-Anti-Blemish-Complex-1-2-oz-14-g/11550

    بس ماقدرت اعرف ايش الفرق بينهم .. اذا عندك فكرة ياليت تفيدينا .. انا تقريبا نفسك تطلع لي حبوب بين فتره و فتره او وقت المناسبات السعيده :)

    وشي ثاني ودي اسألك فيه .. كيف ممكن الواحد يوحد لون بشرته خصوصا الوجه يعني في اختلاف لوني فبعض المناطق وماعرف ايش السبب او كيف اعالجها
    و الميك اب مو حل جذري طبعاً

    ReplyDelete
    Replies
    1. الله يعافيك حبيبتي،، ايوه هذا نفسه المنتج اعتقد مخلص حاليا من اي هيرب

      Delete
  2. شكرًا وبجربه,
    ايوه ياليت تسوي ريفيو عن منجات ديرما E

    ReplyDelete

Related Posts Plugin for WordPress, Blogger...