Wednesday, October 24, 2012

كيف تعرفي نوع بشرتك - روتين العناية بالبشرة Skincare Routine For Your Skin Type




حبيت أسوي بوست مخصص للعناية البشرة وطبعا بوست واحد ماراح يكفي لكل مشاكل البشرة
عشان كذا اليوم بديت بالأشياء الأساسية اللي هيا كيف تعرفي نوع بشرتك - روتين العناية المخصص لكل بشرة.

وإن شالله بتدوينات جاية راح أتكلم أكثر عن مشاكل كل بشرة زي القشور والحبوب والمسام والتقشير والتفتيح وإزالة المكياج 
وكل المشاكل اللي طلبتو مني بتويتر أتكلم عنها


أول شيء نبدا بكيف نعرف نوع البشرة؟



أسهل طريقة إنك تنظفي وجهك بغسول عادي وبموية وتنشفيه وماتحطي أي منتج عليه
وتستني ساعتين أو أول ماتقومي من النوم.

بهذا الوقت تكون بشرتك رجعت لحالتها الطبيعية ، عشان تعرفي إيش نوعها
جيبي قطنة أو منديل وإمسحي من عند منطقة الأنف.


- البشرة الدهنية: راح تشوفين بالمنديل زيوت وعادة تكون المسام كبيرة عند هالبشرة وفيها لمعة.

- البشرة الجافة: تحسين البشرة مشدودة وباهتة وراح تشوفين جلد ميت أو قشور والمسام صغيرة.

- البشرة العادية: البشرة ناعمة مافيها عيوب وماراح تشوفين زيوت أو قشور (أحسد اللي بشرتها كذا -.-)

- البشرة المختلطة: أغلب الناس تقريبا بشرتهم مختلطة ، جزء يكون دهني (عادة منطقة الأنف والجبهة والدقن) وبقية الوجه عادي أو جاف.


هذه أنواع البشرة العامة وممكن تكون عندك زيادة مشكلة ثانية من هذه المشكلتين:


- بشرة حساسة: البشرة تحمر وتتهيج بسرعة.

- بشرة معرضة للحبوب: حتى لو ماكنتي بسن مراهقة ممكن يكون عندك حبوب مرتبطة بمشاكل هرمونية 
ولازم تستخدمي منتجات عناية خاصة.

يعني ممكن تكون بشرتك جافة أو دهنية وحساسة
وممكن تكون جافة أو دهنية ومعرضة للحبوب.


بعد ماعرفنا نوع بشرتنا نتكلم عن روتين العناية 
لأنه إكتشفت إنو كثير بنات مايعرفو أو يستخدمو أشياء غلط وماتناسب بشرتهم وهذا يزيد مشاكل البشرة :(


روتين العناية اليومي لكل نوع بشرة والمنتجات اللي تناسب كل بشرة:



الروتين عبارة عن ثلاث أشياء أساسية منظف وتونر ومرطب ، مرتين باليوم صباح وليل.

المنظف يستخدم عشان يزيل المكياج والغبار اللي ممكن يجي عالبشرة والجلد الميت والزيوت.

التونر يستخدم عشان ينعش البشرة ويقبض المسام ويشيل بقايا الغسول وفيه أنواع تعالج مشاكل البشرة.

المرطب يرجع الترطيب للطبقة السطحية من البشرة ويحفظها من الجفاف.



البشرة الجافة Dry Skin


- إستخدمي منظف يكون حليب أو كريم وينمسح بقطنة 
وإبعدي عن الـ wash أو اللي مكتوب عليه غسول بموية لأنه ممكن يجفف البشرة
يعني اللي تدورين عليه بالمنظفات مكتوب عليه  milk cleanser أو  cream cleanser زي كذا



- التونر إستخدمي موية ورد وإمسحيها بقطنة ، وإبعدي تماما عن أي تونر فيه كحول.
 فيه عند بووتس تونر إسمه rosewater من ماركة botanics أنصح فيه للبشرة الجافة وهذه صورته


أو إستخدمي موية الورد العادية :)


- الكريم إستخدمي نوع للصباح ونوع لليل
بالصباح إستخدمي مرطب مخصص للبشرة الجافة يكون كريمي ومكتوب عليه Creamy day moisturizer 
بالليل كريمي ثقيل Thick creamy moisturizer

و لو بشرتك جدا جافة زيدي سيروم وبالعربي مصل (تقرف الكلمة لول)
وأنصحك تختارين نوع كويس ومن ماركة محترمة ومخصص للبشرة الجافة
راح يكون غالي شوية بس يستاهل وراح تشوفي الفرق ببشرتك
والسيروم فيه أنواع يكون مخصص لتفتيح أو إضاءة الوجه brightening 
وفيه أنواع ترميم للبشرة ولو بشرتك متقدمة بالعمر جيبي سيروم مقاوم للتجاعيد.

 أنصح وبشدة بسيروم إيستيه لودر عندهم كذا نوع إختاري اللي يناسبك

يعني روتينك يكون الصباح حليب منظف - تونر موية ورد - كريم مرطب نفس ماقلت
وبالليل حليب منظف - تونر موية ورد - سيروم - كريم مرطب ثقيل



البشرة الدهنية Oily Skin


- المنظف أستخدمي غسول يعني مكتوب عليه face wash أو face foam 
اللي يتغسل بموية وعادة يكون زي الجل 


(بشرتي دهنية/مختلطة ومن اللي جربتهم غسول فيشي الأخضر والمجموعة كلها مرة حلوة وناسبتني
غسولات نيتروجينا كل اللي نوعها جل ومخصصة للبشرة الدهنية كلها تناسبني
غسول بودي شوب للبشرة المختلطة جميل 
غسول إيف روشيه الأزرق اللي سويت عنه ريفيو والأخضر كلهم حلوين
كلينيك الثري ستيبس ماناسبتني :(
لوكسيتان مجموعة الأرز الأحمر ماناسبتني ، وبس هذا اللي أتذكره لوول)


- التونر يكون نوع قوي شوية ويحتوي على نسبة بسيطة من الكحول 
ويفضل يكون زيت شجرة الشاي زي حق لاش أو من بودي شوب أو أي تونر مخصص للبشرة الدهنية مو شرط اللي ذكرتها



- المرطب إستخدمي نوعين للصباح والليل
اللي بالصباح يكون مرطب مخصص للبشرة الدهنية ويطفي اللمعة مكتوب عليه Mattifying
وبالليل إستخدمي مرطب عادي بدون زيوت oil free ومكتوب عليه moisturizer

الترطيب جدا مهم للبشرة الدهنية لأنه حتى ولو إنك ماتحسين بجفاف ، الطبقة السطحية للبشرة ينقصها ترطيب وموية 
وهذا اللي يخليها تصير دهنية زيادة ولو رطبتيها تصير متوازنة وأقرب للبشرة العادية.


البشرة المختلطة Combination Skin


هدفنا إننا نخلي البشرة متوازنة

- المنظف إستخدمي غسول يكون wash أو mild cleanser 
وممكن ينغسل بموية ، وإبعدي عن الغسول الحليبي المرطب أو غسول رغوي foam

- التونر إستخدمي إثنين واحد للمنطقة الدهنية ويكون نفس التونر المخصص للبشرة الدهنية اللي تكلمت عنه
والمنطقة الجافة أو العادية أستخدمي موية ورد.

- الكريم المرطب برضو إستخدمي إثنين ، واحد يكون مطفي Mattifying بس عالمنطقة الدهنية 
ولو الخدود جافة إستخدمي مرطب عادي moisturizer 

وممكن تستخدمين مرطب واحد على كل البشرة ويكون مخصص للبشرة المختلطة 
بس لو كانت بشرتك بس دهنية عالأنف والجبهة والدقن وبقية الوجه عادي 
أما لو بقية الوجه جاف لازم تستخدمين مرطبين
وبالليل إستخدمي بس المرطب العادي لوحده بدون المطفي.

*******
 
إذا كان عندك مشكلة بالبشرة وكانت حساسة
إستخدمي منتجات من شركة طبية وتكون كلها مخصصة للبشرة الحساسة for sensitive skin

ونفس الشيء للبشرة المعرضة للحبوب for acne pron skin 
نستخدم منتجات مكتوب عليها إنها للبشرة المعرضة للحبوب ، وراح أسوي بوست مخصص لهذا النوع من البشرات :(





وبس يارب تكونو إستفدتو من التدوينة :$
إذا إلتزمتو بهذا الروتين راح تشوفون الفرق خصوصا لو لقيتو منتجات تناسبكم
وبليز بعد هذا البوست ماأبغا أحد يسألني إيش المنتجات الأفضل لأني ماأدري 
وحتى لو أعرف إيش الأفضل ليا ممكن مايناسبك وبالعكس يكون الأسوء بالنسبة لك :)


إذا عندكم أي إقتراحات أكتبوها ليا بتويتر أو بالتعليقات تحت

وإذا عندكم أي أسئلة إسألوني بالفورم هنا


15 comments:

  1. احلا مدونه بحياتي كلها :(3>
    أحبك 3>
    وعندي سؤال!
    كيف يعني غسول عادي؟
    يعني جيبي منتج لغسول عادي

    شكرا 3>

    ReplyDelete
    Replies
    1. اسفه ترا توني اشوف الفورم

      Delete
    2. مو مشكلة حبيبتي :*
      غسول عادي ، يعني مكتوب عليه للبشرة العادية مايكون مخصص لنوع معين إن شالله عرفتي ، يعني مثلا أولاي للبشرة العادية :)

      Delete
  2. شكلج تتابعين ذيج البنت الأيرلندية على اليوتوب مثلي.
    زين انج كتبتي الترجمة لأن في وايد اللي ما يفهمون على لهجتها هع
    مشكورة حبيبتي على المجهود

    ReplyDelete
  3. روووووعه...مرا استفدت ..أنا بشرتي دهنيه فكرت أغير المرطب حقي وأشوف وين المشكله بالضبط

    ReplyDelete
  4. طيب والبشره العاديه

    ReplyDelete
  5. طيب ممكن تساعديني
    انا
    tزون عندي تقريبا دهنيه
    والخدود حساسه دايما حمره
    وباقي الوجه معرفتلوه مره مقشر مره دهني فيه حبوب
    اصلا مره احس وجهي دهني ومره مقشروجاف ومع المكياج مره يقشر وجهي
    معرفتله 7.7

    ReplyDelete
  6. والله روووعه مدونتك ...ياعسل ممكن حسابك بتويتر والفيس بوك مو موجود بالمدونه !

    ReplyDelete
  7. ارجوك انصحيني بماركة جيدة للبشرة الجافة بالنسبة لكريم الليل و النهار

    ReplyDelete
  8. ارجوك انصحيني بماركة جيدة للبشرة الجافة بالنسبة لكريم الليل و النهار

    ReplyDelete
  9. و ازا كل فترة بشرتي تتغير
    بس الحبوب بتطلع
    كانت بسرتي عادية و فجاة طلعلتلي حبوب
    و جربت كل شي و طفشت 😢

    ReplyDelete
  10. This comment has been removed by the author.

    ReplyDelete
  11. ايش احسن مرطب للبشره الدهنيه المختلطه ابي اسم الماركه

    ReplyDelete

Related Posts Plugin for WordPress, Blogger...