كيف تحافظي على رشاقتك بالأعياد والمناسبات؟ Stay Fit During Holidays

من ضمن المفاهيم الخاطئة الكثيييرة عن الدايت

إنه إذا أكلي كله دايت ماتهم الكمية حتى لو أكلت عن عائلة أهم شيء إنو أكل دايت :| 

بتنقيص الوزن لازم أول شيء نتحكم بكمية الأكل اللي ناكله 

يعني أنا ماعندي مشكله لو أكل حلى بس تكون كميته قليلة

 بكذا ماحرمت نفسي وبنفس الوقت ماخربت نظامي

طبعا بعضكم راح يستغرب لأنه اللي متعودين عليه إنه الدايت رز أسمر وجزره مسلوقه وأكل مستشفيات

لا هذا مايمشي معايا ومتأكده ماراح يمشي مع ناس كثير لول

الصح إنه نغير من عادات أكلنا الغير صحية ونخليها صحية أكثر ونتحكم بالكمية 

عشان نقدر نستمر على نظامنا على طول وبالعكس راح تحبون النظام هذا أكثر ;)

هدفي من البوست هذا مو إني أعطيكم نظام وأقولكم إمشو عليه

لا راح أقولكم عالكميات اللي لازم تاكلوها وتقدرو تعدلو على أكلكم من اليوم.

 

 

أول شيء نتكلم عن نوعية الأكل ونصايح عامة:

- أول نصيحة لازم نفكر بالأشياء الصحية اللي نضيفها بأكلنا مو بس إيش اللي نبعد عنه! 

يعني فيه ناس تبعد عن الدهون والنشويات بس برضو نظامها مو صحي أبدا 

لأنها ماأضافت الفواكه ولا الخضروات ونظامها غلط وصعب الإستمرار فيه!

 

- نشرب لترين ماء باليوم يعني ٨ كاسات.

 

- دايما نحاول نستبدل أي نوع نشويات أبيض بالقمح الكامل ( الأرز - الخبز - المكرونة ... إلخ)

 

- نستبدل كل مشتقات الحليب الكاملة الدسم بقليلة الدسم.

- بكل وجبه تكون  شاملة كل العناصر الغذائية: ( بروتين - نشويات - خضار أو فاكهة - مشتقات الحليب)

 

- نوزع وجباتنا بدل ٣ وجبات ثقيلة لـ ٥ وجبات خفيفة باليوم (فطور - سناك - غدا - عشا - سناك) ولا تفوتو أي وجبة

الطريقة هذه تخلي الجسم طول اليوم يحرق بدل مانثقل عالفطور والغدا والعشا 

ويسير الجسم مشغول يهضم ومايحرق شيء 

ويخلينا ناكل كمية أكبر من اللي نحتاجها لأنه فيه وقت طويل بين الفطور والغدا 

عكس لو وزعنا وجبات خفيفة طول اليوم تخلينا ناكل أقل ونشبع بسرعة.

 

- أكثر سعرات حرارية نستهلكها بالصباح بوجبة الفطور ونحاول نفطر خلال نص ساعة من أول ما نقوم من النوم.

 

- إذا متعودين نطبخ بالسمنه أو الزبدة نستبدلها بالزيت النباتي. 

(اللي تقولي زوجي مايرضى ولازم سمنه وبلا بلا... أنا أقولك طلقيه أحسلك لووووول)

- ندخل بأكلنا الدهون الصحية زي المكسرات وزيت الزيتون (بدون طبخ) والأفوكادو والسمسم والأسماك.

 

- نختار سناك يكون مشبع وفيه فايبرز زي سلطة أو مكسرات أو غرانيولا بارز.

 

- لا تحرمو نفسكم من أكلتكم المفضلة زي مثلا عند السعوديين مستحيل نستغني عن الكبسة صح p:

وراح أقولكم كيف تخلون الكبسة صحية ;)

 

- بالمطاعم دايما أطلبو وجبات الأطفال تراها ماتفرق عن الوجبات العادية غير بالكمية اللي تكون ١٠ أضعاف الكمية اللي نحتاجها :\

 

- إذا كنتو من النوع اللي تكثرون أكل لمن تكونون بسترس ولا طفشانين زيي :|

غيرو الشيء هذا مثلا بالشوبينغ (نصير بمشكلة ثانية اللي هيا دايما مفلسين لول)

أو رقص ، رياضة ، إطلعو من البيت تمشو...

 

- كافئو نفسكم بالويكيند بقطعة حلى أو أكله بمطعمكم المفضل عشان تتشجعو وتقدرو تستمرو بالدايت ;)

 

- أخر نصيحة وأهم شيء بالنسبة ليا الرياضة ، جسمك ماراح يفرق بالشكل إلا بالرياضة 

المشي لوحده مايكفي ، دخلو مع المشي رياضة أيروبكس ومو لازم جيم ممكن تلقونها باليوتيوب وتسوونها بالبيت D;

 ٢٠ دقيقة أيروبكس مع مشي ٤٥ دقيقة ٥ مرات بالأسبوع مرة تكفي ولا تنسون تمارين الستريتش بعد ماتخلصون :)

إيش الكميات اللي المفروض ناكلها؟

 هذه صورة لقيتها ونزلتها بتويتر بالإنجلش ودحين ترجمتها عشان تكون واضحة 

طريقة كيف تحددون الكمية المناسبة لكل نوع أكل حسب مقاس يدكم 

عشان إحتياجات كل شخص تختلف عن الثاني سواء إمرأة أو رجل أو طفل

وتقريبا هذه أكثر طريقة عملية لأنه صعب بكل وجبة نجيب ميزان أكل ونقيس مثلا ٥٠ غرام!

ومكتوب بالجدول الحصص ونوع الأكل والسعرات الحرارية اللي فيه

 

وهذه صورة ثانية للوجبة المثالية

إذا تعرفوني هذه الطريقة أحلف فيها من كثر ماأحبها وذكرتها كذا مرة ودايما أنصح فيها

بس هالمرة ترجمتها بالعربي ;)

اللي هيا الصحن الصحي

مثلا إذا غدانا كبسة ، نقسم صحن وسط لـ ٣ أقسام

نص الصحن خضروات ممكن تكون كوب سلطة أو كوبين خضار مطبوخة

وربع الصحن رز وربع لحم

إذا إحنا طابخينها بالبيت نبعد عن السمنة والزبدة ونستبدلها بزيت نباتي وإذا كانت من مطعم مشكلة :| 

ماندري عن كمية الدهون اللي حاطينها بس نحاول نزود السلطة والخضار. 

وحاطتلكم بدائل مثلا بدل الزر ممكن مكرونة بس نفس الكمية أو بدل اللحم سمك ...

ونضيف مع الوجبة عشان تكون مثالية نوع من مشتقات الحليب ( لبن - سلطة زبادي - جبنة...) 

وحبة فاكهة يستحسن ناكلها قبل الوجبة.

هذه الطريقة تشبعكم تماما وماتحسون أبدا إنكم محرومين :)

 

وأخر شيء هذا جدول راح يفيدكم حاطين فيه كمية الحصص لكل نوع من العناصر الغذائية 

 

إضغطو على الصورة للتكبير.

طيب عرفنا الكميات والحصص اللي المفروض ناكلها 

تعالو نجمع الموضوع على بعض وأقولكم كيف النظام لطول اليوم يكون؟

أول شيء بالفطور مثلا  قطعة توست أسمر أو أي بديل من حصص النشويات 

مع شريحة جبنة قليلة الدسم ( فيها بروتين ومشتقات حليب)

 مع خيار وطماطم وعصير فواكه 

هذا بس مثال وممكن تغيرو حسب اللي تحبو تاكلوه أهم شيء نلتزم بالكميات ونخلي الوجبة شاملة كل العناصر.

 

بعد ساعتين ونص ناخذ سناك 

سلطة أو فاكهه أو غرانيولا بار تلاقوها بقسم الدايت بالهايبر ماركت بس إنتبهو بعضها يكون مليان كالوريز 

ناخذ نوع فيه فايبرز ومايكون فيه سكريات كثير.

والغدا نفس الصحن اللي ذكرته.

العشا نقلل النشويات فيه ونخليه خضروات وبروتينات مثلا سلطة مع تونة أو دجاج.

 

السناك أنا دايما أفضل يكون حليب دافي أو زبادي طبعا قليلة الدسم لأنها  تساعدكم على النوم ❤

ونامو بدري عشان ماتاكلون سناكات كثيرة أخر الليل xD

ودحين عرفتو الكمية الصح اللي تحتاجونها قارنو بينها وبين الكميات اللي كنا ناكلها قبل 

أغلبنا ياكل أكثر من إحتجياته بكثيير وهذا السبب الريئيسي لزيادة الوزن 

لأنه الجسم يخزن الأكل الزايد ومع قلة الحركة الوزن يزيد :(

ويارب يكون عجبكم البوست وإستفدتو منه وإن شالله راح أسوي تدوينات ثانية عن الدايت والرياضة 

وإذا عندكم أي سؤال إسألوني هنا

وكل عام وإنتو بخير ❤ :*