September Beauty Favorites 2013 مفضلات شهر سبتمبر

بوست المفضلات الشهرية صار شيء أساسي في بلوقي xp

أحس خلاص تعودتو عليه ومايحتاج مقدمات p;

أبدأ بفيفورتس العناية بالجسم

Jergens Hydrating Coconut Milk

مرطب جيرجنز بحليب جوز الهند.

أستخدمه للجسم، ترطيبه حلو ومتوسط بين الزبدة وبين اللوشن ينفع بالنهار لأنه مايدبق.

Aqua Therapy Mineral Hand Cream

كريم أكوا ثيرابي بالمعادن لليدين، تكلمت عنه ببوست أخر مشتريات من دبي.

ترطيبه رائع يجلس فترة طويلة، والحلو فيه إنه أبدا مايدبق ولا أحس إني حاطة كريم يعني لما أوزعه عادي بعدها أمسك شاشة الأيفون لوول فيه بعض الكريمات تترك أثر عالشاشة xp

ريحته مو قوية وصار كريم الشنطة المفضل ماأخرج من البيت بدونه ❤

The Body Shop Passion Fruit Shower Gel

شاور جل من مجموعة باشن فروت من ذا بودي شوب، ريحته جميييلة والمجموعة كلها ريحتها على فواكه خفيفة ومنعشة حلوة بالحر بما إنه إحنا لسا صيف :\

مفضلات الشعر

L'oreal Mythic Oil 

سيروم ميثيك أويل للشعر من لوريال، عندي من كم شهر جدا جميل وسويتله ريفيو مصغّر بالإنستغرام.

أستخدمه قبل أو بعد الشاور ينعم اطراف الشعر ويخليها تبين صحية،

{طبعا مو اللي شعرها متقصف ومعدوم تروح تجربه ومايسويلها شيء تجي تحاربني :\

الشعر المتقصف والمحروق مستحيل أي شيء يخليه يبين صحي غير القص.}

بس هذا السيروم يحافظ عالأطراف وينعمها بدوم مايزيت الشعر وممكن تستخدميه بعد التصفيف.

سعره ١٢٥ريال موجود بالصالونات والصيدليات الكبيرة.

مفضلات المكياج

Illamasqua Blush Duo in Hussy, Lover

ياجمالو *-*

لون البلش مرة قوي ونوعية البودرة نفسها جدا ناعمة تندمج بسهولة مع البشرة

وثباته عالي. ونزلتله سواتش بإنستغرام من فترة.

سعره حدود ١٥٥ ريال وإلاماسكا مو موجودة بالسعودية للأسف تلاقوها برا أو أون لاين.

Sigma Eye Brow Gel 

أنا أستخدم الجزء الملون مرة عملي وسريع، يعبي الحواجب ويعطيها لون خفيف ويثبتها 

وهذا ريفيو كامل عنه سويته قبل كم أسبوع هنا

MAC Rimal Dahabia

تكلمت كثير عن هالباليت بجد مرة عاجبتني وسهلت لي حياتي لوول

بسبتمبر سافرت كذا مرة وماأخذت معايا غيرها الألوان اللي فيها طبيعية وجدا عملية ودافية تناسب بشرتي.

تقدري تسوي باليت زيها من ماك، فيها لونين موجودين بالكولكشن الدائمة هم Soft Brown ، Shroom

والألوان الباقية ليميتيد بس فيه ألوان قريبة منهم من ماك زي Brown Script ، Brun 

Rimmel Kate Moss Lipstick #01

روج ريميل مجموعة كيت موس رقم ١

لونه أحمر عودي بالأسبوع اللي فات تقريبا إستخدمته بكثرة، لأني صرت أشوف هاللون كثير هالفترة

جميل ونوعية هالأرواج أعشقها وهنا ريفيو كامل عنها هنا

MAC Pink Nouveau 

روج بينك نوفو أحسه البيرفكت بينك! ولون أساسي عندي مو مرة فاتح ولا غامق والأندرتون حقة بارد،

نوعه ساتين ناسب بشرتي الحنطية المتوسطة وأعتقد بيناسب كثير بشرات.

Sigma P84 Brush

رائعة لدمج الكونسيلر! أستمتع وأنا أستخدمها تعطي نتيجة مرة حلوة

وأوزع فيها الهايلايتر المثلث تحت العين وتدمجه بشكل جميل.

رابط موقع سيجما هنا وكود تخفيض ١٠٪ لشهر أكتوبر FALL2013

وبس هذه كانت الفيفورتس إن شالله تكون عجبتكم ❤

حسابي بالإنستغرام TheArtisticHands

تويتر WafaA7med

وإذا حابين تتواصلو عالإيميل wafa.a7med@hotmail.com

وأشوفكم ببوست جديد يوم الأربعاء إن شالله :*