My Top Favorite Makeup Brushes فرش المكياج المفضلة عندي

بما إن الفرش شيء مرة مهم عندي بالميك اب حبيت أسوي تدوينة عن فرش المكياج المفضلة عندي واللي ماأستغني عنها!

دايما أحب أجرب فرش جديدة وأعتبر الفرش تحسن كثير من تطبيقك للميك اب وتخليه يبين بروفيشنال أكثر.

هذه طريقة ترتيبي لكل الفرش ونزلت فيديو بإنستغرام عنها 

أحب تكون قدامي بالتسريحة وسهل أوصلها.

من الماركات اللي جربتهم: ماك، سيفورا، سيجما، ريل تكنيك، انجلوت، مكياجي وفرش من محلات عادية..

حاولت أختار أكثر فرش أستخدمها ولو ضاعت أرجع أشتريها وممكن تكون كثيرة شوية بس راح أتكلم عن كل فرشة وإيش اللي يميزها وإنتِ تشوفي إذا تحتاجيها أو لأ حسب إستخدامك :*

وقبل لا أبدأ حابة أحط معلومات عن بعض الفرش

فرش ريل تكنيك كتبت عنها ريفيو كامل هنا
Real Techniques Brushes Review ريفيو فرش ريل تكنيك

فرش سيجما أطلبها من موقعهم
Sigma Beauty
وكل شهر يكون فيه تخفيض ١٠٪ والكود دايما أنزله ببنر عالبلوق
كود شهر سبتمبر LJW2013

فرش الفاونديشن | Foundation Brushes

Buffing Brushes 

فرش البفنغ للفاونديشن هي الطريقة المفضلة عندي لتوزيع الفاونديشن

وأستخدم كل الفرش الأربعة اللي بالصورة ماقدرت أختار وحدة xp

الشيء المشترك بين كل البفنغ برشز هو توزيع الفاونديشن ودمجه مع البشرة بشكل طبيعي وتغطية عالية بدون ماتترك خطوط أو أثر للفرشة عالبشرة وصراحة مايفرقو كثير عن بعض إلا بأشياء بسيطة راح أكتبها ولو عندك وحدة منهم أعتقد تكفي وماراح تحتاجي تاخذي غيرها.

الفرش اللي جربتها: 

Real Technique Buffing Brush

فرشة ريل تكنيك جدا خفيفة وسهلة بالتوزيع وأكثر فرشة عملية بالتنظيف 

عيبها إنها ماتنباع لوحدها وتشتريها بمجموعة الوجه من ريل تكنيك

أعتقد فرشة الإكسبيرت تشبهلها بالتوزيع بس حجمها أصغر ماجربتها بس تنباع لوحدها اللي حابة تجربها.

Sigma Round Kabuki Brush F82

فرشة راوند كابوكي من سيجما رقم إف٨٢ 

سعرها حلو ، ميزتها تعطي تغطية أعلى من الباقين بس تاخذ وقت أطول بالدمج 

وعيبها صعبة فالتنظيف وتاخذ وقت طويل عشان تنشف.

Sephora Mineral Powder Brush #45

فرشة سيفورا رقم ٤٥ تكلمت عنها كثييييير xp

سهلة بالتوزيع وشعرها جدا ناعم مرة أحب أستخدمها مع الباودر فاونديشن تعطيني نتيجة رائعة وكتبت عنها بريفيو برو فينيش هنا وريفيو كامل عنها ولطريقة توزيع الفاونديشن هنا

ماأشوف فيها أي عيب.

Inglot Buffing Brush

فرشة البفنغ من إنجلوت مو مكتوب عليها رقم ولا إسم جات بطقم فرش من إنجلوت وأعتقد تنباع لوحدها

سطحها فلات مو زي الباقين دائرية وحجمها أكبر تشبه فرشة F80 من سيجما، تدمج بشكل مرتب وسريع لأنها تاخذ مساحة أكبر من الوجه.

فرش الكونسيلر | Concealer Brushes 

هذه ثلاث فرش مخصصتها للكونسيلر فقط سواء لتحت العين أو للبشرة.

 Real Technique Deluxe Crease Brush

هي فرشة مخصصة لدمج الشدو بس أنا أشوفها فاشلة للشدو وممتازة للكونسيلر!

شكلها كأنها بفينغ برش بس صغيرة أستخدمها لتحت العين وحول الأنف وللبشرة تعطيني تغطية عالية وتدمج الكونسيلر بنفس الوقت.

عيبها ماتنباع لوحدها وتجي مع مجموعة العين. صراحة المفروض ريل تكنيك يبيعو الفرش منفصلة مرة أحسن :( 

دحين لو أبغى فرشة ثانية نفس هذه لازم أشتري المجموعة كلها وأنا ماأحتاجها :|

Sigma Precision Angled P84

مجموعة فرش البريسجن من سيجما أكثر من رائعة!!

هي مصممة بشكل يشابه الدمج بالأصابع بس بتغطية أعلى 

أنا عندي الفرشة المايلة أستخدمها لتحت العين لأنها تدمج الكونسيلر بالزاوية الداخلية أفضل من فرشة ريل تكنيك

 ماتخلي الكونسيلر يخطط وتعطيني تغطية عالية.

MAC 212 Flat Brush

فرشة ماك ٢١٢ نحيفة ومسطحة أستخدمها لتحديد وتنظيف الحواجب بالكونسيلر وتحديد الشفايف من برا بالكونسيلر 

مع إن ممكن البعض يشوف مالها داعي بس بالعكس أبدا ماأستغني عنها حتى إذا سافرت أخذها معايا لأنها مسطحة تحدد بشكل مرة مرتب .

فيه نفس الشكل هذا من سيجما إذا حبيتو بديل أرخص وتؤدي نفس الغرض.

فرش الباودر | Powder Brushes 

الباودر أوزعها بعد الفاونديشن والكونسيلر للتثبيت وأحب أستخدم فرشة كبيرة توزع بخفة عشان ماتبين البودرة متكتلة

الفرشتين اللي أحبهم: 

Real Technique Powder Brush

حجمها مرة كبير تقريبا أكبر فرشة عندي وشعراتها متماسكة أحب أستخدمها مع البودرة المضغوطة والمينيرال وتعطي شوية تغطية.

MAC 150 Powder Brush 

شعراتها مرررة ناعمة وخفيفة ماتعطي تغطية بس تثبيت وحلوة مع البودرة الحرة لأنها ماتخليها تتكتل.

فرش الكونتور | Contour Brush

هذه الفرش اللى أستخدمها للكونتور الكريمي والباودر

 MAC 186 Angled Brush

جدا رائعة للكونتور الباودر وتوزعه بطريقة محددة أكثر لأنها بزاوية، والفرشة عندي من سنيييين وحتى إنمسح الرقم منها بس نفس الشعر لسا ناعم ومتماسك وهذا اللي أحبه بفرش ماك صح سعرها غالي بس جودتها ممتازة وتجلس معاك سنين.

Sigma F05 Small Contour Brush

برضو أستخدمها للكونتور الباودر تختلف عن حقة ماك إنها مو بزاوية ماتعطي كونتور محدد بس تدمجه مع البشرة وتخليه يبين طبيعي أكثر، حلوة كمان مع البرونزر.

Real Technique Contour Brush

ممتازة للكونتور والبرونزر الكريمي! 

شعرها صناعي بس جدا ناعم ولأنها صغيرة تعطيك كونتور محدد والقصة حقتها توزع وتدمج بنفس الوقت

مشكلتها برضو نفس الشيء بفرش ريل تكنيك إنها تجي بمجموعة الوجه ومو لوحدها :)

فرش الهايلايت | Highlight Brushes

Inglot Fan Brush

فرش المروحة بشكل عام حلوة لتوزيع الهايلايت الباودر خصوصا اللي يكون قوي لأنها توزعه بشكل ناعم

أحب أستخدم هذه الفرشة مع بيجمنت فانيلا من ماك أوزعه تحت الحاجب

أو على عظمة الخد يعطيني هايلايت مرة جميل ومناسب للسهرات.

MAC 130 Brush

فرشة ديو فايبر صغيرة من ماك مرة أحبها بالهايلايت السائل والكريمي
وهذا بوست كامل تكلمت عن طريقة إستخدامها مع الإضاءة السائلة هنا

وكمان أستخدمها للبلش الكريمي.

 Sigma F35 Tapered Highlighter Brush

أستخدمها للهايلايت الباودر للوجه ولتحت العين.

فرشة البلش | Blush Brush

 MAC 129 Brush

مرة بيرفكت للبلش حجمها حلو وشعراتها مو مرة ناعمة بس مو خشنة

تمسك اللون وتوزعه بدون مايبين blotched أو كأنه ملطخ 

طبعا هي أطول من كذا بس أنا عندي الصغيرة من كولكشن ليميتيد وعادة فرش الكولكشن بماك جودتها مو نفس الكبيرة بس حتى هذه الفرشة عندي من سنين ولسا جودتها حلوة.

وصراحة أحب هذا الطول عشان أقدر أخذها معايا بالشنطة! 

فرش الحواجب | Eyebrow Brushes

صراحة فرش الحواجب أحس أي فرشة بنفس هذه الشكلين تؤدي الغرض بالنسبة ليا

يعني لو عندك أي فرشة بزاوية صغيرة ومشط نفس اللي بالصورة راح تكفيك إن شالله.

Inglot Small Angled Eyebrow Brush

شعرها صناعي تستخدم مع باودر ومع جل، أحب إن شعراتها متماسكة 

وترسم وتعبي الفراغات بشكل مرتب.

Sephora Brow Comb #11

لها جهتين وحدة للحواجب والثانية أستخدمها للرموش

بعد ماأحط الماسكارا عشان لو تكتلت تفرق الرموش.

فرش العين | Eye Brushes

الفرش اللي إخترتهم أعتبرهم جدا مهمين بالنسبة ليا وتقريبا بأي لوك مكياج عين عالأقل لازم أستخدمهم!

Sigma Pencil Brush E30

فرشة القلم من سيقما مهمة لتوزيع هايلايت مدمع العين ودمج الشدو تحت العين وممكن تسوي فيها تحديد لكسرة الجفن.

 Sigma Short Shader Brush E20

مررة جميلة وأحبها!

فرشة توزيع للشدو حجمها صغير ومتماسكة أقدر أحدد فيها حول العين بشدو غامق من فوق وتحت وتعطيني تحديد مدموج smudged أحب هالطريقة.

وكمان تقدري توزعي فيها الشدو لو مساحة الجفن عندك صغيرة.

MAC 239 Brush

أهم فرشة لتوزيع الشدو جدا أساسية بالنسبة ليا لأنها توزع وتبين اللون بشكل قوي

صح غالية بس زي ماقلت قبل فرش ماك سعرها فيها *-*

Sigma Eyeliner Brush E05

بيرفكت للجل أيلاينر وتعطيني wing حلو وأقدر أتحكم فيها بكل سهولة لأنها مو مرة طويلة.

MAC 217 Brush

أبدا ماأتخيل نفسي أوزع شدو بدون هذه الفرشة هي وفرشة ٢٣٩ مرة مهمين عندي وأنصحكم فيهم بقوة!

الأفضل بالدمج وحتى ممكن توزعي فيها شدو وممكن تستخدميها فوق وتحت العين.

حاولي دايما تستخدميها نظيفة وحتى خلال الدمج تمسحي الشدو الزايد اللي فيها بمنديل وإرجعي إدمجي عشان تعطيك لوك نظيف.

Sigma Small Tapered Blending Brush E45

فرشة ماهي أساسية بس أحبها لأن شكلها tapered وصغيرة تدمج الشدو عالكسرة بشكل محدد 

وكمان مرة حلو لكونتور الأنف.

فرشة الشفايف | Lip Brush

Real Technique Detailer Brush

مع إنها مي مخصصة للشفايف بس مرة بيرفكت لتوزيع الروج خصوصا الألوان القوية تحتاج أستخدم معاها فرشة من هالنوع توزع الروج وتحدد الشفايف.

فرش متعددة الإستخدامات | Multitask Brushes

هذه الفرش ماحبيت أحصرهم مع مجموعة معينة لأني أستخدمهم لكثير شغلات!

Duo Fiber Brushes

فرش الديو فايبر اللي تجي فيها نوعين من الشعر، طبيعي وصناعي وتجيك بأطوال مختلفة

الفرش هذه رائعة لدمج أي شيء كريمي أساس، كونسيلر، هايلايت وكونتور.. 

الفرش اللي إستخدمتهم من هذا النوع:

MAC 187 Duo Fiber Brush

حجمها كبير وممكن تستخدميها للأساس تعطي تغطية خفيفة وإستخدامي لها للباودر ودمج مكياج الوجه 

يعني بعد ماأخلص البلش والبرونزر والهايلايت وكل شيء أدمج فيها بشكل خفيف وحركة دائرية تعطيني لوك نظيف ومافيه حدود للبلش أو البرونزر وكله مدموج مع الأساس.

MAC 188 Small Duo Fiber Brush

أستخدمها للأساس، كونتور كريمي، دمج الكونسيلر والبلش الكريمي.

Sigma Duo Fiber Blush/Powder Blush F15

مع إنها ديو فايبر بس تختلف تماما عن حقة ماك!

أحس شعراتها متساوية ومتماسكة ماأقدر أستخدمها نفس إستخدامات فرش ماك الديو فايبر

بس مرة حلوة للبلش الباودر خصوصا اللي لونه قوي لأنها تخففه وتدمجه بشكل ناعم.

فرش Tapered للوجه
هذا النوع من الفرش جميل وله إستخدامات كثيرة ممكن باودر، بلش، برونزر وحتى كونتور ناعم
اللي جربتهم:

Sigma Tapered Face Brush F25
تشبه فرشة ماك ١٣٨ الى حد كبير!
شعراتها ناعمة وحلوة لتثبيت الباودر حتى ممكن تثبت تحت العين بشكل أفضل من فرشة الباودر العادية عشان شكلها،
وبرضو ممكن تستخدم للبلش والبرونزر.

Real Technique Blush Brush
نفس إستخدامات اللي من سيجما بس أحبها أكثر شيء بالبرونزر وأحيانا بلش.

يعني لو عندك وحدة من هذه الفرشتين ممكن تغنيك عن إنك تاخذي فرش ثانية للبلشر والباودر لأن برأيي أشوفها تسوي كل هالأشياء بشكل بيرفكت.


وأخر شيء نجي للفرشة الجميلة اللي أبدا ماأستغني عنها
Sigma Tapered Blending Brush E40
شبيهة لفرشة ماك ٢٢٤
أستخدمها لدمج الكونسيلر السائل، تثبيت الباودر تحت العين، دمج الشدو، كونتور أنف ناعم، كونتور لعظمة الخد.

وبس! أسفة لو البوست طويل شويتين ويارب تكونو إستفدتوا :*
شاركوني بالفرش المفضلة عندكم بالتعليقات
وأشوفكم إن شالله ببوست قريب ❤