Sunday, October 12, 2014

CONFESSIONS OF A M.A.C.AHOLIC: Top 5 Must Have MAC Products إعترافات مدمنة ماك: أفضل ٥ منتجات من ماك





هذه المرة قررت أتكلم عن منتجات ماك المفضلة عندي بشكل عام.
تكلمت بهذه السلسلة قبل عن مفضلاتي من الشادوات والبلاشرز وغيرهم،، بس هالمرة حبيت أقولكم عن المنتجات اللي برأيي الأفضل بماركة ماك واللي تميزو فيها وكثير ماركات قلدتهم فيها.

كلنا عارفين إن الفاونديشن عند ماك مو الكل متفقين عليه! فيه ناس يعتبروه فاونديشنهم المفضل وناس بالعكس من أسوء ماجربوه، البلاشرز والشادو والأرواج عند ماك حلوييين وأغلبنا نحبهم بس ممكن نلقى بلاشرات وأرواج وشدوات حلوة بأغلب الماركات سواء هاي إند أو درق ستور،، 
 والمنتجات اللي إخترتها اليوم وبتكلم عنها بالتفصيل حاولت أختار منتجات بتناسب الكل وإذا إنتِ مهتمة بماركة ماك أو جديدة عالماركة هذه المنتجات مهم تجربيها.





1- 217 Brush


عارفة إنه فرش ماك غالية ومو الكل يقدر يشتريها لكن هذه الفرشة فعلا تستاهل الشراء. لو بتاخذي فرشة وحدة بس من ماك أنصحك فيها وراح تجلس سنيين معاك محافظة على جودتها. وأغلب الميك اب ارتيست العالميين إذا سألوهم عن فرشهم المفضلة تكون هذه من ضمنهم.
شعرها طبيعي ومسكتها خشب وصناعتها يدوية يابانية وعلى فكرة كل فرشة منها موجودة بماك تختلف عن الثانية بفروقات بسيطة جدا لأنها مصنوعة يدويا.
قصة الفرشة هي اللي تميزها وكثير ماركات قلدوها.. مقصوصة بشكل بيضاوي وشعراتها ناعمة بس بنفس الوقت متماسكة تخليك تقدري تدمجي وتوزعي منتجات باودر وكريمية. حجمها متوسط وتناسب كل أحجام العيون
إستخداماتها كثيرة ممكن توزعي فيها لون الشدو أو تدمجي كذا لون مع بعض تختصرلك شغل الدمج والنتيجة اللي تعطيك اياها بالدمج ممتازة وإحترافية وتبين شغلك نظيف،
وممكن كمان تستخدميها للكونسيلر والباودر تحت العين أو للوجه وتدمج الكونسيلر تمام مع البشرة.

نسيت بالزبط متى إشتريت الفرشة حقيقة بس فوق ٤ سنين ولسا محافظة على شكلها وجودتها مع الغسيل والتنظيف المستمر. وتراني حاطة مناكير شفاف على إسمها لأن أغلب فرش ماك الإسم ينمسح بعد فترة وهذا عيبهم.

أعتبرها من المست هاف بمجموعة الفرش الأساسية اللي لازم تكون عند الكل.

سعرها تقريبا ١٥٠ ريال ( بتشوفوني أكتب تقريبا عند أسعارهم لأن ماك للأسف أسعارهم مو ثابتة هذا أكبر عيب فيهم :\ )



2- Fix+

على فكرة غيرو تعليبه وإسمه prep and prime fix+ 
كثير ناس مو فاهمين هذا البخاخ ويعتقدو إنه مثبت ولمن يجربوه يخيب أملهم.
وفيه ماركات نزلو نفس فكرته ومنهم ميك اب فور ايفر وإربن ديكاي (النوع اللي بالفايتمنز مو المثبت) وماركة نكس كمان أظن منزلين شبيه فيه ناوية أجربه إن شالله وأقارن بينهم..

هو يساعد على ثبات الميك اب صح لكن اساسا مو مثبت ولو مكياجك يسيح وإعتمدتي عليه بس للتثبيت بدون الباودر ماراح يثبتلك.
طيب إيش هو هذا المنتج؟
هو بخاخ معزز بالفايتمينات والمعادن ينعش البشرة ويصحح المكياج ويعطي ترطيب فوري بسيط ونضارة صحية للبشرة.

إستخدماته كثيرة وإستخدامتي له:
- برايمر قبل المكياج يعطي ترطيب خفيف بدون مايدهن البشرة.
- مصحح لبعد المكياج خصوصا إذا حسيتي وجهك مغبر ومافيه نضارة.
- تقدري تستخدميه أي وقت خلال النهار إذا حسيتي مكياجك باهت.
- إذا إستخدمتيه مع شدو باودر لميع راح يخلي لمعة الشدو تبين أقوى وأجمل لأن فيه جلسرين. وحتى مع هايلايتر الوجه مرة راح يقوي لمعته.

طريقة إستخدامه للوجه خصوصا لبعد المكياج لازم توزعيه من بعد ١٥ سم مو من قريب وحركي راسك يمين ويسار عشان يتوزع على كل الوجه وخليه ينشف بدون ماتلمسي وجهك وراح ينشف بسرعة بدقيقة تقريبا.

سعره ١٠٠ ريال تقريبا.



3- Paint Pot 

تركيبته جميلة هو شدو كريمي لمن توزعيه يثبت ويصير بودرة.
أغلب إستخدامي له بيس تحت الشدو وجدا رائع لهذا الإستخدام!
فيه تغطية عالية لو الجفن عندك غامق راح يغطيه تماما والشدو يتوزع ويندمج بسهولة فوقه ولونه يبين أقوى ويزيد من ثباته وقت أطول ومايخطط.

خذي لون مقارب لبشرتك وفيه كذا درجة مناسبة للكل


اللي عندي سوفت اوكر لونه بيج مصفر أفتح من بشرتي.
بينترلي لونه بيج لحمي يناسب أغلب البشرات.
البشرات السمراء والداكنة يجربو الدرجتين عاليمين غراوند ورك وكوايت ناتشورال.
على فكرة كوايت ناتشورال حتى عالبشرات الفاتحة تقدر تستخدمه بيس غامق للسموكي مثلا عشان يغمق اللون وينفع شدو لوحده.

سعره ناسية والله أظن حدود ٩٥ ريال تقريبا.



4- Mineralize Skinfinish Natural

هذه البودرة المعدنية اللي يخليها تتميز عن غيرها إنها جدا طبيعية عالبشرة تثبت الفاونديشن بدون لا تبين مغبرة بالعكس تعطي ناتشورال فينيش كأنها بشرتك.
تغطيتها خفيفة ينفع تستخدميها لوحدها بشكل يومي إذا بشرتك ماتحتاج تغطية عالية.
وإستخدامي الأساسي لها لتثبيت الأساس أحبها مرة وتقدري تاخذيها معاك بالشنطة وتعدلي على مكياجك خلال النهار،
الباكجنغ الجديد منها فيه مرايه سهل هذا الشيء.
وتقدرو تستخدمو لون غامق وفاتح منها للهايلايت والكونتور أو برونزر لأنها تعطي لوك طبيعي وسهل دمجها مع البشرة.

وترى كميتها كبيرة ١٠ جرام، لها عندي وقت طويل حتى ماقربت تخلص ولأنها معدنية عادة ماتخرب بسرعة.
درجتي ميديم دارك أحيانا بدون تان تكون شوووييه غامقة عليا بس مايبان فرق كبير لأنها خفيفة وقبل كان فيه درجات محدودة منها بس نزلو مؤخرا منها درجات كثيرة أفكر أجرب ميديم تان أتوقع أفتح منها بتكة.

سعرها ١٦٠ ريال تقريبا.



5- Pro Longwear Concealer

هذا المنتج ماأقدر أجزم إنه يناسب الكل لكن يناسب الأغلبية. ممكن لو منطقة تحت العين عندك جافة راح يتعبك.
بس جربيه قبل بالمحل وشوفي وعموما كل شيء جربوه بنفسكم بالمحل لا تشتري شيء بدون تجربة مهما قريتي عنه وماك تطور عندنا صار فيه غرف خاصة تقدري تدخلي وتجربي براحتك.

ايش اللي يميزه؟
هو كونسيلر سائل تغطيته عالية مطفية وفل كفرج بس إحساسه خفيف مو ثقيل زي ستوديو فينش مثلا.
يثبت لمدة طويلة جدا فوق ١٠ ساعات بدون لا يخطط أو يتغير لونه ويقلب رمادي (مهم تختاري الدرجة الصح)
تقدري تستخدميه تحت العين أو للوجه. وممكن تستخدميه بيس تحت الشدو كمان زي البينت بوت يغطي ويثبت.

عيوبه:
- تعليبه غبييي قزاز بأقل طيحة ينكسر. والضغاط حقه ماتقدري تتحكمي بالكمية مرة يحتاج يغيرو تعليبه صراحة :| 
- العيب الثاني لأنه يثبت ويصير بودرة لازم تدمجيه بسرعة لو مادمجتيه بسرعة بيتكتل ويصير بشع وبس تدمجيه تمام يثبت ويصير جميل.

طريقة إستخدامه:
وزعيه تحت العين أو عالمنطقة اللي حابة تخفيها ومباشرة إدمجيه بإصبعك بالطبطبة أو بالبيوتي بليندر أو فرشة سيقما F86 

إختيار الدرجات:
هنا يجي وقت التجربة أهم شيء جربي الدرجة على نفسك ومو لازم تشتريها بنفس اليوم روحي البيت أو بإضاءة مختلفة وإحكمي عاللون إذا ناسبتك إرجعي خذيها، ماإقتنعتي جربي درجة ثانية :)

إذا كان إستخدامك الأساسي له للبشرة مو لتحت العين خذي نفس لون بشرتك،
لكن لو لتحت العين بعطيكم كم درجة تجربوها..

طريقتي بإختيار الدرجات للي عندهم هالات غامقة تحت العين:
- بشرتك بيضا جربي درجة NW20
- بشرتك متوسطة حنطية جربي درجات Nw25 - Nw30 حسب غمق الهالات ودرجة بشرتك.
- بشرتك سمراء جربي درجة Nc42 لونها مشمشي دافي.

إذا ماعندك هالات غامقة وناوية تستخدميه هايلايت أو إضاءة خذي لون أفتح منك بدرجة أو درجتين وبس إن شالله محد يحتار بالدرجات :*

أنا بشرتي حنطية متوسطة وهالاتي وسط متركزة بزاوية العين لأني ألبس نظارة وأستخدم درجتين (مو مع بعض أي وحدة فيهم) nw25 تعطيني تغطية وتغطي الهالات مع هايلايت بسيط أو nc35 إذا أبغى لون كونسيلر قريب من بشرتي.

سعره تقريبا ١٢٠ ريال



أتمنى عجبكم البوست.. وأنا أكتبه جاتني فكرة أعمل بوست ثاني عن أسوء ٥ منتجات ماك اللي جربتها! إيش رايكم؟ صح إني مدمنة منتجاتهم بس مايمنع إني جربت منتجات تفشل من عندهم والله لول 
كتبت عنهم زمماان بإنستجرام بس لازم إن شالله أعملها بوست مفصل ;)



❤❤

Twitter | Instagram | Email




3 comments:

  1. انا عندي مشكله اني وقت ما اجي اوزع باودر استديو فكس من ماك بيعمل زي حبيبات كدا مع اني بوزعه حلو
    كمان ياريت لو تكتبي عن كيفيه استخدام
    stay flawless ( primer stick ) benefit
    لاني حاسه انه بيتكتل لانه ناشف
    و شكراااا

    ReplyDelete
  2. This comment has been removed by the author.

    ReplyDelete
  3. يعطيكي ألف عافية
    قبل اسبوع رحت ماك واحترت ماعرفت ايش اشتري
    وبسألك ايش رأيك في ارواج ماك ؟ّ
    شكرا ع الافادة

    ReplyDelete

Related Posts Plugin for WordPress, Blogger...