مفضلات البشرة
Clarisonic Mia 2
صعب أتكلم عنها بموضوع فيفورتس تحتاج بوست كامل إن شالله أكتبه قريب *-*
مرة عجبتني صراحة ومن جد تفررررق كثيييير بتنظيف البشرة تنظيفها جدا عميق وسريع بدقيقة وحدة بس!
أنا استخدم الفرشة للبشرة الحساسة اللي تجي مع الجهاز ولاحظت أول آسبوعين طلعتلي حبوب صغييرة بجبهتي نفس الحبوب اللي تطلع بعد الفتلة لول
بس خفّت بعد كذا وبشرتي مرة تحسنت ونعمت حتى حجم المسام صغر.
والحلو لأنها كمان تنظف البشرة بعمق فتخليها تستفيد من كريمات العناية بشكل أقوى.
إن شالله كل التفاصيل عنها بكتبها في بوست خاص بس حبيت أقولكم إنها جدا عجبتني وناسبتني *-*
الغسول اللي معاها جيد لا بأس به حبيته كمان ينظف بدون لا ينشف البشرة.
Dior 'One Essential' Intense Skin Detoxifying Booster Serum
هذا السيرم كنت فاهتمه غلط! أول شيء حسبته مخصص للترطيب ولمن حطيته ماحسيت فيه ترطيب عالي بس بعد كذا لمن قرأت عنه إكتشفت إنه زي الديتوكس للبشرة ومرررة عجبتني فكرته يحمي البشرة من التلوث اللي يخلي البشرة باهتة ويعطي البشرة boost وبرضو يخليها تستجيب بشكل فعال أكثر للمنتجات اللي تحطيها بعده ومايدهن أبدا.
هوا مع الكليراسونك أعطوني نتيجة فظيعة صراحة أستخدم بعده كريم مرطب بنفت اللي تكلمت عنه الشهر اللي فات وبشرتي تحسنت كثييييير.
The Body Shop Drops Of Youth Eye Concentrate
كريم لتحت العين مستخلص من زهرة نادرة من جبال الالب إسمها Edelweiss
وهذه الزهرة تساعد على تجديد خلايا البشرة الرقيقة تحت العين.
أنا حسيت بعد كم يوم من إستخدامه إنه منطقة حول العين مبينة مرتاحة أكثر، وطبعا لو نومك وأكلك ملخبط وماتشربي مويه ولا مية زهرة نادرة تقدر تخفي التعب والارهاق لول .. الكريمات تساعد بنسبة بسيطة على تقليل التعب وتخفيف النفخة بس الأهم إنك تهتمي بنومك وأكلك وتشربي مويه كفاية وعصيرات طازجة.
والحلو بهذا الكريم إنه فيه رولر وضغاط يطلع كمية مناسبة من الكريم وبعدين تسوي مساج تحت منطقة العين لمدة دقيقة أو دقيقتين تقريبا بالرولر وهذا المساج لو عندك نفخة مرة يساعد على تخفيفها.
مفضلات العناية بالجسم
The Body Shop Wild Argan Oil
تكلمت عن المجموعة بتغطية ايفنت بودي شوب هنا
اللي إستخدمتهم أكثر شيء هذا الشهر الشاور جل واللوشن والبخاخ والزيت الصلب.
المجموعة ريحتها جميلة وترطيبها أجمل. الشاور جل واللوشن نفس كل باقي مجموعات بودي شوب بس المميزين الزيت البخاخ تقدري تستخدميه للشعر والجسم وترطيبه مرررة حلو خصوصا للشعر أحب أستخدمه.
والزيت الصلب مرة أحبه للمناطق الجافة بالجسم وحول الأظافر ترطيبه جدا عالي ومُركز.
Prada Florale Candy
عطر برادا الجديد ريحته ورد وسويت ونظافة بنفس الوقت مرة أنثوي وناعم بس الريحة ماتناسب كل الأذواق! أختي مرة ماعجبها بس أنا جدا حبيته مادري إذا تحبو الروايح الهادية جربوه يمكن يعجبكم :*
مفضلات المكياج
Dior Star Foundation
هذا الفاونديشن إسم على مسمى فعلا ستار بين الفاونديشنات الثانية لوول
كتبت عنه ريفيو كامل هنا
L'Oréal Paris True Match Super Blendable Foundation
تكلمت عنه كذا مرة بإنستقرام بإختصار بالنسبة لأنو فاونديشن درق ستور يعتبر جدا ممتاز. أنا بالدرق ستور كان يعجبني فاونديشن بورجوا بس هذا أحلى منه لأن درجات الألوان والاندرتونز عندهم أكثر وتقدري تلاقي درجتك بالزبط.
ثباته متوسط ويحتاج تثبتي بباودر إذا بشرتك دهنية بس الفينيش تبعه طبيعي عالبشرة ينفع إستخدام يومي لأنه مو قوي
بس مااحب أستخدم فاونديشن بشكل يومي وأخلطه مع إضاءة ستروب لوشن من ماك يعطيني فينيش جميلة مرة وطبيعية.
Dior Addict Mascara
تجنن هالماسكارا! أدري مو كل البنات يتفقو عالماسكارا بالذات بس أنا جدا عجبتني من ناحية إنها تطول وتفرق الرموش وماتتكتل وتعطي كثافة طبيعية وسوادها عالي وأحب إنها خفيفة عالرموش ماأحس إنها يابسة، وتنظف بسهولة.
Magic Marc'er Precision Pen
بإختصار:
- ريشة مرنة وترسم بدقة
- سهل وعملي جدا بالإستخدام
- سواد عالي جدا بلمعة
- ثبات عالي جدا جدا جدا حتى لو الجفون عندك دهنية مايسيح ولا يروح إلا بمزيل مكياج مقاوم للمويه
الريفيو كامل هنا
Motives Cosmetics With Love Element Color Box
هذه الباليت هدية من خلود متجر لودي شوب عالإنستقرام @LodyShop
ومررررة أشكرها عالهدية لأني مافكرت أجرب موتيفز! أسمع عنها بس حقيقة ماحسبتها بنفس هذا الجمال والجودة *-*
الشدوات خيالية صراحة صبغتها مرة عالية بدون ماتتناثر وجدا ناعمة وثابتة حتى بدون برايمر وتندمج بسهولة
وألوان الباليت عملية وجميلة جدا. رحت دبي بالشهر الماضي عشان إيفنت نيولوك وماأخذت غيرها سويت فيها كذا لوك مختلف وجدا أنصحكم فيها.
Revlon Matte Balm In Shameless 215
اليوم نزلتله سواتش بإنستقرام لونه موف غامق شتوي ومرة جميل والريفيو كامل تشوفوه هنا
Barry M Gelly Hi Shine Nail Paint in Watermelon 325
باليوم الوطني جلست أدور مناكير أخضر ومالقيت غيره لوول ماأتخيل نفسي أحط مناكير أخضر ماادري ليش بس مرة عجبتني هذه الدرجة!
مو مرة أخضر جاي شويه مزرق ومميز اللون حبيته
هذا سواتش له من النت
ومناكير باري ام تكلمت عنها مليون مرة p;
وبس :*
❤ حبيت مفضلاتك حبيبي جدا جميلهه
ReplyDelete