Saturday, November 14, 2015

Makeup Basics: Foundation For Dry Skin اساسيات المكياج: الفاونديشن للبشرة الجافة




امس بسناب اتكلمت على طلب كثير من البنات عن طريقة الفاونديشن للبشرة الجافة..
كيف نتجنب ان الفاونديشن يقشر ومايبين مغبر وكل هالمشاكل المتعلقة بالبشرة الجافة..

حبيت اعمل بوست صغير عالمدونة كمرجع لكم اذكر فيه كل النقاط اللي قلناها عشان تستفيدو منه دايما.. 

في البداية قبل مانتكلم عن المكياج لازم انبه عن نقطة جداً مهمة،، ومهما كان مكياجك حلو وخطواتك كلها صح 
لو مااهتميتي بعناية بشرتك ماراح يطلع الفاونديشن حلو،، وراح يقشر ويتكسر ويقطع وتصير كل هالمشاكل اللي دايما تعانو منها :(

عناية البشرة الجافة بسيطة بس تحتاج استمراااار،، مهم تركزي على تقشير البشرة بشكل اسبوعي عشان يشيل القشور ويجدد سطح البشرة وتهتمي بالترطيب مرتين باليوم بمنتجات مخصصة لنوع بشرتك،، برضو استخدمي ماسكات ترطيب علاجية هذا الشي بيفيدك كثير خصوصا الماسكات المرطبة قبل النوم راح تعطيك ترطيب مكثف 
وال Sheet Masks نفس سيفورا وايتود هاوس هذه ممكن تستخدميها قبل المكياج لترطيب فوري ونضارة سريعة..
اذا حبيتي تستخدمي الكليراسونك او نفس هالاجهزة للبشرة خذي الفرش اللي تكون مخصصة للبشرة الرقيقة او الحساسة راح تناسبك اكثر..
ممكن تبحثي اكثر عن الروتين اللي يناسبك بالعناية او تسألي دكتور مختص يكتبلك الكريمات اللي تناسبك لكن زي ماذكرت المهم هو الاستمرارية على طول.



خطوات المكياج:

الترطيب
 اول خطوة نبدأها الترطيب ابدا مانكنسل هذه الخطوة ولا نهملها.. مرطب للوجه وللعين..
استخدمي اي مرطب انتي تفضليه او مرطبك اليومي المهم يكون مخصص للبشرة الجافة يعني يكون مكتوب عليه Cream or lotion for dry skin
من الكريمات اللي استخدمها كلينيك لوشن الاصفر ممتاز قبل المكياج بس اللي بشرتها شديدة الجفاف ممكن تحتاج مرطب اقوى..


البرايمر
هذه خطوة اضافية ممكن لو احتجناها نسويها الاهم نركز عالمرطب بس اضافة البرايمر تعطيك نتيجة حلوة المهم نركز عالانواع اللي تناسب البشرة الجافة..
موجودة عدة انواع بالماركات اللي يناسبك البرايمر المرطب او اللي يعطي لمعة او ممكن تخلطيهم مع بعض وتستخدميهم قبل الفاونديشن راح تعطيك فينيش جميل للبشرة لمعة صحية مع ترطيب 
من البرايمرز اللي جدا مناسبة 
ماك ستروب كريم - ميك اب فوريفر Hydrating Primer & Nourishing Primer 
ديور غلو برايمر ونفس الفكرة في توم فورد وايستيه لودر وغيرلان كلها برايمرز تعطي غلو ولمعة للبشرة 
من الدرق ستور موجودين في نكس وريفلون برضو..



البرايمرات اللي نتجنبها المطفية واللي قوامها سيليكوني لأن اغلبها مافيها ترطيب كافي وتتكور وتتقشر عالبشرة الجافة من تجربتي.

بعد البرايمر دايما احب ارش فكس بلس من ماك خطوة اعشقها تعطي كمان ترطيب اضافي.

الفاونديشن او كريم الاساس
دايما نختار الانواع اللي تكون ساتين او ديوي سواء كان سائل او ستيك او كريم.
ايش يعني؟
يعني مو مطفية وناشفة.. المطفية مخصصة للبشرة الدهنية وكثير بنات يشوفو الكل طايح بفاونديشن معين يقومو يشتروه ويطلع مو حلو ويقشر ومرة ناشف طيب ليش؟ لأنه مو مخصص لبشرتك..
ممكن تجربي الساتين راح يعطيك فينيش مخملي وقريب للمطفي بس طبيعي ومو مرة ناشف ومكتم على بشرتك..
 الديوي اللي تحسيه خفيف وفيه لمعة..
هذه اهم نقطة باختيار الفاونديشن ومن اللي انصحكم تجربوها:
نارس شير قلو - ميك اب فوريفر اتش دي العادي والستيك (راح اعمل ريفيو عنه بعد هذا البوست)
ديور ستار - جورجيو ارماني لومينوس سيلك - ديور نيود - بوبي براون ستيك فاونديشن - مايبلين فت مي - ماك فيس اند بودي وستوديو سكلبت - بنفت هلو فلولس...




واكيد فيه غيرهم كثير لكن هذا اللي جربته، جربو لمن تلاقو اللي يعجبكم..


بالنسبة لتوزيع الفاونديشن نقطة مهمة احب اذكرها دايما اعتمدي على التربيت ومو بطريقة البفنغ اللي هي حركات دائرية،
ليش؟ لأن الحركة الدائرية بالفرشة ممكن تزيد من مشكلة تقشر البشرة.
فالتربيت والطبطبة بالفرشة او يفضل اسفنجة رطبة زي البيوتي بليندر انعم وافضل بكثير ورح تفرق معاك.


الكونسيلر 
يفضل تستخدمي الكونسيلر الكريمي دايما او السائل اللي يكون فيه ترطيب وكريمي وسلس.
بعض انواع الكونسيلرز تحسيها تقلب على باودر هذه حسب جفاف بشرتك ومنطقة تحت العين ممكن بعض البنات يبين مرة جاف عليهم فالافضل تستخدمي الكريمي.
ومن اللي جربتهم وعجبوني ماك ستوديو فينيش تغطيته عالية وممتازة سواء كونسيلر او كوركتر
نارس رادينت كريمي كونسيلر واربان ديكاي نيكد كونسيلر من الانواع السائلة المريحة بس كريمية مو ناشفة وتغطيتها ممتازة يومي او سهرات برضو.



الكونتور مااتطرقت له كثير لكن انا برضو عالبشرة الجافة افضل استخدم انواع كريمية ممكن نفس الفاونديشن او الكونسيلر بس بدرجة اغمق وادمجه مع الفاونديشن واثبته بكونتور باودر خفيف.


الباودر
في بنات ممكن يستغنو عنها تماما وتطلع النتيجة حلوة.
لكن لو احتجتي تثبيت بأماكن معينة مثلا حسيتي تحت العين ممكن يخطط او حوالين الشفايف بالخطوط التعبيرية..
او ممكن بشرتك تكون مختلطة الى جافة وشويه تدهن عندك مناطق معينة بالوجه إذاً استخدمي الباودر بس على هذه المناطق
وبكمية بسيطة فقط مجرد تثبيت خفيف.
استخدمي فرشة صغيرة زي فرشة ريل تكنيك Setting Brush او سيقما F35 
ويفضل تستخدمي نوع بودرة لووس او حرة لأنها جدا ناعمة زي لورا مرسييه بن ناي او ماك سي سي باودر 
خذي كمية صغيرة جدا من الباودر وانفضي الزايد دايما وبعدين وزعيها بطريقة التربيت برضو بس عالاماكن اللي تحتاج تثبيت زي ماذكرنا..
من الباودرز الحلوة كمان ماك مينيرالز سكين فينيش تكلمت عنها كثير قبل ممتازة تعطي فينيش طبيعي وصحي للبشرة. حتى ممكن تستخدمي الدرجات الغامقة للكونتور.
اي مكياج فيه مينيرالز يعني على طول تعرفي راح يناسب البشرة الجافة لانه يعطي ترطيب ولمعة.. 




لا تستخدمي فرشة باودر حجمها كبير عشان ماتوزعلك الباودر بكل مكان وكمان الاسفنجات المربعة اللي تجي مع البودرات (اكرهها ودايما ارميها) توزعلك الباودر بكمية كبيييييرة مرة الافضل استخدمي فرشة.
واتجنبي تستخدمي انواع الباودر اللي تكون مضغوطة او الباودر فاونديشن الثقيلة لانها مطفية ممكن تبين مغبرة عليك بزيادة وثقيلة.


تقريبا كذا خلصنا مكياج الوجه تبقى اللمسات الاضافية دايما احب استخدم الفكس بلس من ماك بالنهاية لانه يسحب اي باودر زايدة من البشرة ويخلي الفينيش طبيعي جدا وشكله صحي وجميل.
واحب ازود هايلايت بودرة على عظمة الخد والانف والاماكن البارزة بالوجه عشان تعطيني نضارة ولمعة زيادة للبشرة لان البشرة الجافة تحتاج هالشيء..




وبس هذه تقريبا كل الخطوات اللي أسويها انتي خذي منها اللي يناسبك وعدلي عليها حسب بشرتك 
ممكن تكون شديدة الجفاف او مختلطة الى جافة انا شرحت للكل انتي اختاري الأشياء اللي تحسيها تناسبك..

وان شالله تكونو استفدتو اشوفكم ان شالله ببوست قريب..




❤❤

Twitter | Instagram | Email




8 comments:

  1. شكررررراً مررره إستفدت خصوصاً اني من البشرات الجافه )':

    ReplyDelete
  2. أشكرك جداً على هذا المجهود والتقرير الجميل والمفيد .. أنا كنت أشك انه بشرتي جافه بس مو متأكده إذا تصنيفي مزبوط أو لأ ، وتقريرك ريحني لأنه أكد لي بكثير من منتجاتك اللي اخترتيها ووصفك انه نفس الأشياء اللي تناسبني ونفس ملاحظاتي عليها انه فعلاً تعتبر جافه .. واستفدت انك عرفتيني على منتجات وطرق ثانيه ممكن تناسبني
    الله يعطيك العافيه

    ReplyDelete
  3. وفاء مرا مرا مرا شكرا اساسا كتبت كل المعلومات بنوت لما تكلمتي بالسناب بس بالبلوق افضل و ارتب و اقدر ارجع لها بآي وقت
    يعطيك العافيه وفاء من جد ما قصرتي

    ReplyDelete
  4. This comment has been removed by the author.

    ReplyDelete
  5. تسلمي .. مرره استفدت بصراحه

    ReplyDelete
  6. ربي يسعدك ويعطيك العافيه ��استفدت منك كثير كثير وعرفت اش الأشياء اللي تناسبني وتناسب بشرتي ❤️❤️

    ReplyDelete
  7. شكرا جدا موضوع مفيد

    ReplyDelete

Related Posts Plugin for WordPress, Blogger...