Sunday, December 15, 2013

Review: Beauty Blender Sponge الإسفنجة العجيبة بيوتي بلندر | ريفيو | طريقة إستخدامها وتنظيفها







متأكدة أغلبيتكم سمع عن إسفنجة بيوتي بلندر!
صارلها كم سنة منتشرة وعليها ضجة كبيرة وأعتقد إني أخذت وقت طويل عشان أجربها أخيراً لول!!.. وماندمت أبدا!


هي عبارة عن إسفنجة على شكل بيضة تستخدم لتطبيق الأساس السائل والكريمي، الكونسيلر، البلش الكريمي، المكياج المينيرال والباودر
صممتها خبيرة مكياج نجمات هوليود Rea Ann Silva وحازت على جائزة مجلة Allure لمدة سنتين على التوالي
والإسفنجة خالية من اللاتيكس والعطور وماتسبب حساسية.

تجي بعلبة زي اللي بالصورة من جوا فيها زي العلبة الصغيرة تحطيها فيها بعد ماتغسليها عشان تخليها تنشف.

وفيه منها ٣ ألوان



الوردية هي الأساسية
البيضا Pure
السودا Pro
ومايفرقو عن بعض أبدا بس الإختلاف في اللون،
السودا مناسبة للميك اب أرتيستس لأن المكياج مايطبع عليها ويبين شكلها أنظف وبروفيشنال أكثر.


إيش المميز فيها؟

- إذا إستخدمتيها بالفاونديشن تعطيك نتيجة خفيفة وناعمة جدا وساتين (مو مطفية ولا ديوي)
- تحافظ على التغطية العالية بدون مايبين إنك حاطة فاونديشن يعني حتى لو إستخدمتي فاونديشن تغطيته عالية راح تخليه جدا طبيعي.
- ماتترك أثر خطوط عالبشرة زي بعض الفرش.
- مناسبة لكل البشرات وخصوصا للبشرة الجافة لأن ماتخلي البشرة تتقشر.
- تدمج الكونسيلر والكونتور والهايلايت الكريمي بشكل ممتاز وهذه أحلى ميزة عندي.
- إذا إستخدمتيها مع الباودر ماتخليه كأنه طحين عالبشرة بالعكس يبين طبيعي وتوزع الكمية المناسبة خصوصا تحت العين.
- عملية وسهلة بالإستخدام والتنظيف.


طريقة إستخدامها الصحيحة:

ماأنصح تستخدموها جافة لأنها راح تكون زيها زي أي إسفنجة عادية
والطريقة الصحيحة لإستخدامها رطبة
وشوفو هذا الفيديو للميك اب أرتيست ريا آن توضح كيف طريقة إستخدامها


هنا الرابط اللي مافتح عندها
تبلليها كويس بالموية وبعدين تعصريها وتلفيها بمنشفة وتعصريها مرة ثانية
لأن مانبغاها تكون مبلولة بس تكون رطبة شوية وراح تلاحظي حجمها تضاعف وصارت مرة خفيفة وناعمة
وبهذا الشكل ماراح تمتص المنتج وراح تعطيك النتيجة المرغوبة



الجزء الدائري من تحت يستخدم للوجه والمدبب من فوق يستخدم لتحت العين وحول الأنف والشفايف



وطريقة التوزيع تكون بالطبطبة Stippling


طريقة تنظيفها:

فيه لها صابون خاص سائل وصلب بس شخصيا أحسه مايفرق عن الصابون أو الشامبو العادي
أغسلها بشامبو أطفال أو صابون سائل كل مرة أستخدمها عشان ماتترك أثر وتنظف بسهولة
وهذا فيديو لطريقة تنظيفها رجعت كأنها جديدة


هنا الرابط اللي مافتح عندها
أسوي نفس طريقتها بالزبط أبلل الإسفنجه وأفركها بيدي بنعومة بشامبو الأطفال لحد ماتنظف ومايطلع فاونديشن منها
وإذا أهتميتي فيها راح تجلس عندك تقريبا ٥- ٦ شهور



بصراحة مرة أنصحكم تجربوها خصوصا بتوزيع الكونسيلر والكونتور الكريمي البيوتي بلندر أحسها أحلى طريقة وتعطي نتيجة جدا رائعة، وأستخدمها بتوزيع البنانا باودر تحت العين ماتخليها تبين متكتلة أبدا
وكمان أحب أستخدمها إذا بسوي مكياج لأحد غيري لأن أحسها أسهل وأسرع من الفرشة.

لها بدائل مرة كثيرة بس صراحة ممكن يكونو نفس الشكل بس مو كلها تعطي نفس النتيجة لما تجربي البيوتي بليندر راح تحسي بالفرق.
من اللي جربتهم وتكلمت عنهم بإنستجرام، إسفنجة سيفورا ماتشبهلها وحقة سيفورا أقرب للإسفنجة العادية
 وجربت من ماركة ألمانية إسمها Ebelin مرة تشبهلها نفس الشكل والنتيجة والحجم وسعرها مرة رخيص مشكلتها إنها متوفرة بس بالدرق ستور بألمانيا حتى ماهي متوفرة أونلاين.
ولحد الآن أكثر إسفنجة يقولو قريبة منها هي حقة ريل تكنيك ولسا ماجربتها إن شالله قريب.


سعرها يختلف حسب فين تشتروها، تلاقوها أونلاين بأمازون، سيفورا، نوردستروم وغيرهم
أنا أخذتها من موقع http://camerareadycosmetics.com/ بسعر ١٨.٥٠ دولار
أو تلاقوها عند التاجرات.




❤❤


Twitter | Instagram | Email




3 comments:

  1. مره متحمسه لها و مااعرف متى راح اقرر اشتريها شكراعلى الريفيو

    ReplyDelete
  2. ريفيو وشرح جميل وفاء خاصة اني بشتريها قريب وحمستيني زيادة
    تسلم ايدينك شكراً
    :*

    ReplyDelete
  3. سفنجة سيفورا كمان نبلها بمويه و لا جافة ؟ و شكرا ع الريفيو

    ReplyDelete

Related Posts Plugin for WordPress, Blogger...