Confessions of a M.A.C.aholic: Perfect Foundation Routine For Oily Skin | إعترافات مدمنة ماك: روتين فاونديشن مثالي للبشرة الدهنية

أهلين ياجميلات ♥♥♥

بوست اليوم تابع لسلسلة إعترافات مدمنة ماك اللي بدأتها قبل كم أسبوع

والموضوع حيكون عن روتين الفاونديشن للبشرة الدهنية اللي أغلب البنات بإنستغرام إختارو إني أتكلم عنه..

المنتجات كلها من ماك والروتين هذا مرة أعشقه وأعتمد عليه دايما بالمناسبات المهمة لأني واثقة إنه بيطلع حلو ويثبت ومايبين زيوت بشرتي بعد كم ساعة.

إذا بشرتك دهنية أو دهنية/عادية مرة أنصحك فيه.

في البداية أهم خطوة وهي تحضير البشرة

أستخدم ماسك وسكرب Volcanic Ash وسويتله ريفيو كامل هنا

REVIEW: MAC MINERALIZE VOLCANIC ASH EXFOLIATOR ريفيو مقشر مينيرلايز فولكانك اش من ماك

مرة ممتاز للبشرة الدهنية لأنه يخفف من إفراز الدهون ويصفي البشرة.

وبعده أستخدم مرطب Mineralize Charged Water Moisture Gel نوعه جل ميزته يعطي البشرة ترطيب ويعوض الموية اللي ناقصتها وخفيف مو دهني،،

ولا مرة بحياتي كنسلت المرطب لأن البشرة الدهنية إذا ماأعطيتيها ترطيب كفاية راح تزيد إفراز الدهون عشان تعوض الترطيب اللي ناقصها

وهذا المرطب يعطي ترطيب بس لأنه جل ماراح يخلي البشرة تلمع.

البرايمر

Prep + Prime skin

برايمر قوامه سيليكون فائدته يخلي طبقة بين الفاونديشن والبشرة وماراح يخلي الفاونديشن يدخل بالمسام وبالتالي يزيد ثباته أكثر، هذا البرايمر يثبت ويصفي شكل البشرة وينعمها ويهديء الإحمرار (مناسب لكل البشرات مو بس الدهنية)

الفاونديشن 

طبعا عارفين بماك فيه كذا فاونديشن لكل أنواع البشرات وراح أتكلم عنهم بتدوينة ثانية بس اليوم إخترت النوع الأنسب برأيي للبشرة الدهنية وهو Prolong Wear Foundation

- تغطيته متوسطة/عالية.

- يتميز بتقنية الثبات لمدة ١٥ ساعة مايتغير لونه ولا يتأكسد.

- هو وفاونديشن فيس اند بودي من ماك يتميزو بإنهم يسوو طبقة عالبشرة Film Former Technology تخلي البشرة ناعمة وماتمتصه المسام أبدا عشان كذا ثباتهم عالي ويستخدموهم كثير خبراء تجميل بالتصوير.

- مطفي ويمنع إفراز الدهون.

- خفيف عالبشرة ويندمج بسهولة.

حاولت أطلعله عيوب عشان أعطيكم ريفيو متكامل بس مالقيت صراحة جدا رائع ومرة أحبه أحطه وأنا متطمنة

مناسب بالنهار لو دوامك طويل وكمان مناسب بالسهرات وحتى للعرايس..

يمكن الشيء الوحيد اللي لازم تنتبهيله بهذا الفاونديشن هو إنه ينشف بسرعة يعني لازم توزعيه على طول 

أنا أوزعه بكل منطقة بوجهي لوحدها مثلا أبدأ بالخدود وأدمجه وأوزعه تمام بعدين الجبهة والأنف والدقن وزي كذا..

ممكن يتوزع بالأصابع أو فرشة أو إسفنجة.

طريقتي المفضلة بتوزيعه فرشة بفنغ ريل تكنيك وأطبطب عليه بأصابعي عشان أدمجه مع البشرة ودرجتي Nc40 

الكونسيلر

نفس نوع الفاونديشن كمان أستخدم Prolong Wear Concealer وله نفس المميزات

تغطيته عالية بس خفيفة عالبشرة لأنه سائل، جدا ثابت ومايخطط 

درجتي Nc35 أخذت أفتح من الفاونديشن بدرجة لأن هالاتي مي قوية يعطيني تغطية كافية ويفتح تحت العين، أوزعه بفرشة ماك ٢٢٤.

وحكاية إختيار الدرجات صعبة شوية كثير يسألو بشكل يومي أنا هالاتي كذا إيش أختار درجة وإيش الأندرتون اللي يناسبني.. المشكلة إنه مستحيل أجاوبك صح بدون ماأشوفك! ماأبغى أقولك شيء وتجربيه مايناسبك وتحقدي عليا :(

روحي لفرع ماك وإن شالله يساعدوك.. بجدة فرع الصيرفي والتحلية فيه بنات شاطرين وأكيد بقية الفروع كمان ماك يهتمو كثير بتدريب الموظفات عندهم اذا لقيتي موظفة ماعندها فكرة أكيد إنها جديدة أطلبي وحدة تكون خبيرة عندهم..

الهايلايتر

 Prep + Prime Highlighter ولونه Light Boost

درجته على صفار تناسب بشرتي وتعطيني إضاءة جميلة

أوزعه على شكل مثلث تحت العين وفوق جسر الأنف والشفايف وبوسط الجبهة

يثبت ويناسب البشرة الدهنية لأنه ناشف شوية مو كريمي ومناسب لكل البشرات كمان، أدمجه بالبيوتي بليندر.

الباودر

أستخدم Studio Fix Powder لأن تغطيتها عالية تزود تغطية الفاونديشن وتعطيني تغطية Flawless ومخملية 

أوزعها بفرشة كبيرة زي ماك ١٥٠ بشكل ضربات خفيفة عالوجه وتحت العين لمجرد التثبيت.

الكونتور

بودرة Mineralize Skinfinish Natural درجة Medium Dark هي درجتي بالصيف لما أسمر شوية بس حاليا أستخدمها للكونتور مي مرة غامقة وتعطي كونتور بسيط وطبيعي لأن نوعية البودرة هذه مرة طبيعية ماتبين كأنها بودرة 

أوزعها بفرشة زاوية للوجه من ماك ١٦٨ تحت عظمة الخد وجوانب الأنف وعالجبهة حدود الشعر.

وبعدين كملي مكياجك عادي زي ماتحبي،، وإذا كانت بشرتك مو مرة دهنية وحسيتي الفاونديشن مطفي بزيادة بخي فكس بلس راح يعطيك لوك طبيعي أكثر ولمعة للبشرة وممكن تزودي هايلايتر لمعة كريمي عالخدود زي ستروب لوشن من ماك إذا حابة يكون شوية ديوي ومو مطفي تماما..

بس أنا أحبه مطفي وهذا بالنسبة لي أفضل روتين فاونديشن ثابت للبشرة الدهنية بإستخدام منتجات ماك.

أتمنى تكونو إستفدتو من البوست،، وصاحبات البشرة الجافة لا تزعلو راح أتكلم عن الفاونديشنز المناسبة لكم قريب إن شالله..

وإذا عندكم أي إقتراحات لتدوينات بهذه السلسة بليز أكتبولي هيا بالكومنتس :*

❤❤❤

Twitter | Instagram | Email