Collective Beauty Haul: Marc Jacobs | Sephora | Lime Crime | MAC and More! مشتريات ميك اب

بوست اليوم عن مشترياتي وبعض المنتجات اللي وصلتني هدايا مجمعتهم من شهر تقريبا

أحب أجمعهم وأنزلهم مرة وحدة ببوست مشتريات وتراني أخليهم بعلبهم بكرتونة صغيرة وأحاول إني ماأفتحهم لحد ماأصورهم بس أفشل لووول

فيه بعض المنتجات جربتها وراح أكتب إنطباعي الأولي عنها وبعضها لا وأكيد راح أكتب عنهم بوقت ثاني بس أجربهم مزبوط :*

مو كلها أون لاين هالمرة بس اللي طلبته أون لاين راح أكتب من فين طلبته وكيف شحنته..

وعلى فكرة فيه شحنة المفروض تكون مع هذا البوست بس راح يتلفوها :(

شفت كثير بنات يتكلمو عن المنتجات الكورية وبالتحديد ماركة ايتود هاوس وماقد فكرت أطلب بس طلبت منهم وشحنتها من كوريا لبريدي الصيني بس طلع ممنوع يشحنو كريمات ومستحضرات تجميل من الصين مو زي أمريكا وأوروبا وأنا راح عن بالي أشوف إذا أقدر أشحنهم أو لا لأن متعودة أطلب عادي وماكنت عارفة إنه الصين ممنوع تجميل :(

أتوقع هذا بس عند شوب اند شيب أرامكس مااعرف بقية الشركات.

المهم حاولت أدور عنوان أي أحد بالصين أرسله الشحنه ويجيبها ليا السعودية ومالقيت إلا مكتب يشحن بسعر مكلف أكثر من الشحنة نفسها وتركتها خلاص الله يعوضني :) 

توبة ماعاد بطلب منتجات كورية لول

Lime Crime 

أول شيء راح أبدأ بطلبي من لايم كرايم ياإني عانيت مع هذا الطلب كمان:/ 

طلبته من موقعهم LimeCrime.com

وماابالغ لو قلتلكم صارلي ٦ شهور أو أكثر أبغى أطلب من عندهم وكل شيء أبغاه أوت أوف ستوك!! :\

واشيك بإستمرار كل مرة نفس الشيء وحتى شيكت على مواقع ثانية تبيع لايم كرايم وبرضو أغلبهم مخلصين!

لحد قبل أسبوعين تقريبا دخلت الموقع ولقيت هذه ال Velvtines مرة كنت ميتة عليهم بس كمان كنت أبغى أرواج معينة كانت مخلصة بس طلبت اللي لقيته ولا يخلصو عليا وأندم بعدين لول

هي تعتبر أرواج مخملية ثابتة حسب الريفيوهات اللي قريتها إنه مررررة ثابتة ولونها قوي وحلوة ماتنشف الشفايف

أغلب الريفيوهات كانت إيجابية ومرة تحمست أجربها ماتتخيلو قد إيش *-*

الدرجات اللي أخذتها Red Velvet, Pink Velvet, Wicked

سعر كل واحد ٢٠ دولار والموقع طلبت منه بفيزا تسوق من الراجحي وشحنت الطلب على صندوق بريدي الأمريكي من شوب آند شيب أرامكس.

Anastasia Beverly Hills

طلبي من انستازيا

هذه من ضمن الأشياء اللي ماقدرت ماأجربها لوول

انستازيا معروفة بهوليود إنها Brow Genius محترفة بكل شيء مختص بالحواجب وعندها صالون في بيفرلي هيلز بلوس أنجلس وتسوي حواجب لكثير من المشاهير من ضمنهم أوبرا. 

نفسي مررررة شي يوم أروح صالونها وتسويلي حواجبي :'(

وماركتها مو بس عندها منتجات حواجب حتى منتجات للمكياج كمان

بس مؤخرا سمعت كثييييير عن هذا البوميد للحواجب ومررة حسيت لازم أجربه!!! أخذت درجتين Blonde و Dark Brown

هو جل بس تركيبته خفيفة جدا وثابتة جربته مرة وحدة بس جدا عجبني كأول إنطباع!

لازم أسويلهم بوست مخصوص إن شالله.

صراحة تشجعت أطلب أقلام وبودرات وجل الحواجب من عندها كمان *-*

سعر الواحد ١٨ دولار وموجودين بموقع اناستازيا ونوردستروم وسيفورا

أنا طلبتهم من نوردستروم لأني مجربته وطلبت منه أكثر من مرة 

وشحنتهم على بريدي الأمريكي.

Marc Jacobs

كمية فخااامة بمنتجات مارك جيكوب! *-*

الماركة متوفرة بمحلاتنا في سيفورا جدة والرياض والظهران

بجدة موجودة بالتحلية سنتر ومجمع العرب وقريب جدا بالريد سي إذا مانزلوها خلاص هناك قالو بنص رمضان.

وهذه المنتجات هي الأكثر مبيعاً عندهم بالعالم وقريت عنها الكل يمدحها 

باليت ظلال لوليتا وقلم ايلاينر أسود وروج درجة 126 NEO-NOIR

الباليتات أسعارهم ٢٦٥ ريال 

الأرواج ١٥٠ ريال

الأيلاينر ١٤٥ ريال

MAC

من الحب أخذت هالأشياء اللزيزة *-*

الأرواج كلها كانت ليميتد أديشن وماك رجعوها بالمجموعة الدائمة.

الأرواج من تحت لفوق

Sweet and Sour

كان بمجموعة All About Orange السنة اللي فاتت

لونه نيود مشمشي فاتح ونوعه كريم شين مرة جميل مع تان ومكياج سموكي.

Sushi Kiss

برضو كان بنفس المجموعة ولونه أورنج فاتح درجته رهيييبه ماعندي أي شيء مقارب منها

ونوعه ساتين. أتوقع هالدرجتين لسا مانزلو عندنا بس إسألو عنهم أكيد راح ينزلو قريب.

All Fired Up

هذا أخذته باك تو ماك من عندنا موجودة هالدرجة وكل درجات الريترو مات اللي رجعت بالمجموعة الدائمة نزلت عندنا وحتى لو خلصت إن شالله ينزل منها مرة ثانية.

نوعه مطفي ثابت ولونه أحمر فوشي قوي.

Flat Out Fabulous 

هذا الإدمان الجديد p;

نفس النوع برضو ريترو مات وموجود عندنا على طول 

لونه موف فوشي دافيء الدرجة مرة جميلة وتحلي معظم البشرات.

سعر الروج حاليا بماك ١٠٣ ريال وترى بعد العيد راح تزيد الأسعار.

وكالعادة بأي مشتريات من ماك لازم أخذ فكس بلس أستهلكه بسرعة وأحبه مااستغني عنه أكثر منتج رجعت إشتريته بحياتي!

سعره ١٠٠ ريال تقريبا.

Skin79

هذا كمان كان من تأثير البنات بالإنستقرام عالمنتجات الكورية. بس الحمدالله ماطلبته مع هذاك الطلب :(

أخذته من أمازون وشحنته لأمريكا.

هو بي بي كريم برونزي تحمست أجربه لأن نفسي أجرب البي بي كريم الأسيوي من كثر ماسمعت عنه بس أظن من خلال بحثي ولا درجة عندهم تناسبني! كلها أبيض وفير ولايت من حبهم للتبييض :\

بس شفت هذا برونزي حسيته بيزبط وجربته كم مرة اللون شوية أغمق مني تقريبا درجته زي Nc42 من ماك وأندرتونه بيج 

بس لأنه خفيف يندمج مع البشرة ومايبين فرق شاسع

تغطيته خفيفة مو عالية زي مو كاتبين والحلو إنه فيه نسبة وقاية من الشمس ٥٠

مرة ينفع للإستخدام اليومي وبالسفر وإذا حابين أتكلم عنه أكثر إن شالله أسويله بوست خاص.

Inglot

من فترة أخذته هو هايلايت شيمري لمعته عالية بس مرررة حلوة 

تستخدم للعرايس والسهرات ماتنفع للإستخدام اليومي وممكن تستخدميها للوجه والجسم.

الدرجة اللي عندي ١ لونها حلو مو على فضي ولا ذهبي جاي في النص ويناسب كثير بشرات. عندهم درجات ثانية مايلة للوردي والفضي والبرونزي.

وسعرها ٧٥ ريال

إنجلوت في جدة موجودة بالأندلس مول ومجمع العرب والريد سي مول

Sephora

من سيفورا منتجات بعضها كانت عندي وتكلمت عنها سواء هنا أو بانستقرام زي الاي لاينر السائل (أحبببببه مرة!)

والماسكارا جربت الذهبية ومررة حبيتها متأكده هذه بتعجبني كمان لأنها ضد المويه.

مزيل المناكير برضو كان عندي بس بصراحة هو حلو وسريع لما أكون مكسلة أشيل المناكير بس مرة ينشف الكيوتكلز حول الأظافر :( وأنا خلقة عندي جافة! 

فمخليته بس وقت الأزمات أو للسفر.

شاور جل من المجموعة الجديدة شكله حلو أفتكر جربت مجموعاتهم للجسم أول مافتح سيفورا عندنا لما كنت بالمدرسة لول

بس ترى جميلة وروايحهم حلوة.

مزيل جل لمكياج العيون

جربت السائل صراحة فاشل مرة! إن شالله هذا يكون أحسن منه بجربه وأقولكم رأيي أكيد.

لصقات الأظافر

الديزاينات عندهم جميييلة *-*

الأرواج 

من المجموعة الجديدة Lip Infusion هو عبارة عن قلوس ثابت أنا مو مرة أحب القلوسات لأنها مو ثابته وإحساسها يضايقني فمااعرف بجربه وأشوف أحسه مختلف عن القلوس العادي!

والروج الثاني نفس فكرة ديور اللي يتفاعل مع شفايف ويعطيك تورد طبيعي هذا مرة متحمسة أجربه *-*

أسعار سيفورا جدا معقولة قريبة من أسعار بورجوا وجودتهم عالية.

 The Body Shop

علبة مكياج مرة تنفع كهدية

فيها ٣ شدوهات أوف وايت ورمادي وأسود ونوعية شدوهاتهم هذه حلوة.

وفيها ماسكارا وكحل وايلاينر وفرشة وباليت الحواجب الجميييلة حقتهم.

سعرها ٢٩٩ ريال وعلى فكرة ترى منزلين مجموعات مكياج حلوة عندهم حبيت أكثر شيء شنطة الفرش ونزلتها بإنستقرام جاية نفس فكرة شنط سيقما عملية وتقدري تحطي فيها فرش من عندك كمان.

شدو أصفر لونه غريب بس يطلع مرة حلو بالدمج مع شدو بني يدفي اللون هذا إستخدامي الأساسي له

وممكن تحطيه بزاوية العين الداخلية.

Insta Blur منتج جديد نازل عندهم لسا ماجربته بس فكرته تقريبا زي بورفيشنال من بينيفت ينعم المسام ويعطي نتايج أكثر إن شالله أكيد راح أكتب عنه قريب بس أجربه وإحساسي يقولي إنه بيعجبني p;

وبس إن شالله حبيتو البوست :*

❤❤❤

Twitter | Instagram | Email