Confessions of a M.A.C.aholic: My Experience Working For MAC Cosmetics! إعترافات مدمنة ماك: تجربتي كخبيرة تجميل مع ماركة ماك!

اليوم حابة أكتب تدوينة عفوية بسيطة عن تجربتي بالشغل مع ماك.

كلكم تعرفو قد أيش أنا شغوفة بالمكياج خصوصا بماركة ماك! أحب منتجاتهم والكونسيبت تبعهم وكله…

قبل سنة بالتمام قررت أشتغل معاهم كنت مخلصة الدراسة (لسا ماتخرجت حاليا أتدرب إمتياز بس خلصت أخر سنة بالجامعة)

وحسيتها فرصة حلوة وماكان همي إني أتوظف أو أشتغل لمجرد الشغل بالعكس كنت حابة ماركة ماك بالذات لأن كان واحد من أحلامي صراحة أتدرب عندهم وأتعلم على منتجاتهم أكثر وأكون خبيرة تجميل عندهم.. والحمدلله حققته الحلم :*

سويت سيرش في شركة الشايع لقيتهم طالبين وظايف لماركة ماك ورسلتلهم السي في تبعي وعلى طول بعد فترة قصيرة رجعو كلموني وحددو وقت المقابلة الشخصية..

على فكرة نظام التوظيف بماك عندنا يختلف كلياً عن ماك أمريكا أو كندا أو استراليا مثلا!!!

عندهم هناك جدا معقد وصعب ومو أي أحد يوظفوه لازم يكون خبير تجميل معتمد ويعملو عدة مقابلات شخصية كأنها إختبار، عندنا هنا ماراح أقول يوظفو أي أحد بس لأنهم مجبورين يوظفو نساء فيضطرو يوظفو بنات ماعندهم خبرة ويدربوهم بعدين..

المقابلة الشخصية معايا كانت مع خبير تجميل ومدير من ماك ومدير من شركة الشايع..

سألوني الأسئلة المعتادة بالمقابلات الشخصية وأسئلة عن ماركة ماك وبالتحديد الفاونديشنز وتفاجئو بالمعلومات اللي أعرفها لول!

بعدين عرفت من البنات اللي إشتغلو بماك إنهم ماكانو يعرفو ولا شيء عن الماركة ومعظمهم يتوظفو لمجرد الوظيفة.

بالنسبة ليا بالعكس كنت حابة أتوظف بماك لأني أحب الماركة وأحس راح أنجز شيء عندهم حتى لو كان شيء بسيط..

بعدها على طول باشرت بالعمل وتعينت كخبيرة تجميل عندهم..

هما مقسمين الوظايف إلى بائعة ومساعدة خبيرة تجميل وخبيرة تجميل مو متأكدة بالزبط من التقسيم وأتوقع غيروه..

طبعا سواء كنتي خبيرة أو لا ماك يهتمو إهتمام كبير بتدريب موظفاتهم!

يعلموك من الصفر كل شيء عن الماركة نفسها وعن المكياج والعناية بالبشرة وكله

تدريباتهم رائعة وعلى مستوى عالي وممكن يرسلوك إلى دبي والبحرين عشان تتعلمي مع خبرائهم المحترفين هناك..

يعني لما تروحي لماك وتشوفي الموظفة مي فاهمة شيء أكيد هذا لأنها جديدة لسا ماعندها خبرة

وراح تلاحظي البنات اللي صارلهم فترة خبرتهم عالية وهذا الشيء أنا لاحظته بنفسي!

مستحيل أشوف بنات متدربين بماك تعطيك أساس وردي ولا لونه سيء أو كونسيلر مايناسب بشرتك وحتى بمنتجات العناية بالبشرة إلا إذا كانت مو متدربة زي ماذكرت..

جدا إستفدت من تدريباتهم مع إني كنت فاهمة الحمدلله بس تعلمت أكثر خصوصا بمنتجات ماك!

وكنت كل يوم بالمحل أجرب منتجات جديدة لول 

للمعلومية مافي ولا منتج بماك ماجربته أو تعلمت عليه ههههههه

لأني أبغى أتعلم لنفسي أولا وكمان عشان أفيد زبوناتي..

وكنت بالأيام اللي أكون رايقة طبعا أسوي لوك ميك اب مختلف وبدون مبالغة كل مرة أنسأل عن الأشياء اللي مستخدمتها وتنباع :*

زي بيقمنت Blue Brown من ماك ترى البيقمنت هذا فظيييييييييييييع أجمل لون شدو بالحياة ومو معروف كثير ونادرا أحد يطلبه مرة حطيته وكل ماوحدة تدخل المحل تسألني عنه وتاخذه!! من جد رائع ومرة أحبه..

كمان روج ديفا وروج ليدي دينجر 

وبلاشر جينجرلي وآمبرينغ روز وبرونزر سن باور،، فاكرتهم لأني مرة أحبهم وفعلا كل مرة أحطهم أنسأل عنهم..

كمان الفاونديشن برو لونغ وير كان فاونديشني المفضل بماك بس حتى لما يسألوني عنه إذا مايناسب بشرة البنت ماأنصحها فيه! لأنه يناسب البشرة الدهنية أكثر. 

نجي للتعامل مع الزبونات :*

تجربتي كانت رائعة الحمدلله مبيعاتي بالمحل أغلب الأوقات عالية كنت مرة مرة أستمتع على فكرة وأنا أجرب للزبونة وتقتنع بكلامي وترجعلي أكثر من مرة شعور مرررة جميل :(

أول شيء لازم تكوني واثقة من نفسك ومن خبرتك عشان تقدري تقنعي الزبونة ثانيا مو شرط تجبريها تجرب منتج هيا مو حابته! ولأني عارفة أغلب مشاكلكم مع الموظفات بمحلات المكياج وأنا شخصيا كنت أعاني منها حاولت أصحح المفهوم هذا قد ماأقدر وأقدم أحسن شيء عندي..

كنت أسأل إيش طلبها وأعطيها نصيحتي إذا ماإقتنعت أقولها تعالي أجربلك وشوفي وأحكمي بنفسك وبالأخير تقتنع لأنها شافت النتيجة.. أبدا مو سهل تكسبي ثقة البنات خصوصا بالمكياج..

في بعض البنات يجو وماأكذب عليكم يرفعو ضغطي شوية لووول

تجيبلي أساس قديم عندها لونه أغمق شيء بالحياة ومرة غلط على بشرتها بس على أساس إنه "برونزي" حاولت مع هذه الفئة كثييير بس مافيش فايدة :| 

وترى كثير بنات يجو يطلبو أشياء يشوفوها بالإنستقرام بس نهائيا مايناسبهم!

اللي تتابع وحدة تعجبها وتشتري نفس أساسها والكونسيلر طيب لونك مو زيها :(

ياخوفي بنات يتابعوني يسوو نفس الشيء :(

فيه زبونة ماأفتكر إسمها بس جاتني مرة وطلبت أجربلها كذا منتج وأعلمها كيف تستخدمهم عشان عندها مناسبة

جلستها عالكرسي اللي بماك قدام المراية ووريتها المنتجات وعلمتها عليهم وأخذتهم وهيا جدا مبسوطة

ورجعتلي بعد فترة وقعدت تدعيلي وتشكرني :( ماتتخيلو قد إيش إنبسطت هذاك اليوم من الزبونات اللي ماانساهم :*

على فكرة فيه بنات كمان يحبو يتفرجو لوحدهم بدون مساعدة (أنا زيكم ترى لول) بس لا تلومي البنت الموظفة اذا نشبتلك لأنه لازم تسألك إذا حابة مساعدة وتوقف عندك هوا النظام كذا مو بس بماك بأغلبية المحلات.. وعشان تاخذي راحتك قوليلها من البداية أنا أحب أتفرج وإذا إحتجت مساعدة راح أسألك.. لأنه لو خلتك بدون مساعدة وشافتها المديرة أو المدير راح يخاصموها فعشان كذا تحسيهم نشبة..

فيه جزء جدا ممتع بالشغل مع ماك وهوا لما تنزل كولكشن جديدة *-*

إذا كملتي فوق ٤ شهور معاهم تطلعلك Gratis من الكولكشن يعني هدية..

مرة حماس وكمان بماك إذا كملتي ٦ شهور أظن ليكي الف دولار تقريبا مو فاكرة بالزبط تطلبي منتجات من عندهم وتوصلك من أمريكا..

أنا ماكملت ٣ شهور مو عشان شيء بس لأني من البداية ماكنت ناوية أطول بس كنت حابة أتوظف عندهم فترة الصيف وخلال هذه الفترة جدا إستمتعت ماتتصورو قد إيش وجدا إستفدت وتعلمت من نواحي كثيرة!

غير المكياج اكتسبت خبرة بسيطة بالتسويق وكيف أتعامل مع الزبونات خصوصا وإني مو مرة إجتماعية جدا فادني الشغل معاهم وكانت فترة حلوة بحياتي :*

إن شالله حبيتو التدوينة مختلفة عن تدويناتي المعتادة جاتني الفكرة فجأة بس حبيت أتكلم عن هذه التجربة الجميلة وكثير بنات سألوني عنها مادري ليش تأخرت سنة بكتابتها لول وإذا عندكم أي سؤال بهذا الموضوع إكتبولي هوا بالكومنت :)

وأشوفكم إن شالله بتدوينة قريبة :*

❤❤❤

Twitter | Instagram | Email