الريفيو كثير طلبوه بإنستجرام حبيت أتكلم عنه ببوست مفصل في المدونة أحس أظلم المنتجات لما أسويلها ريفيو بإنستجرام :(
المدونة أخذ راحتي فيها أكثر وأتكلم عن كل التفاصيل اللي ممكن تفيدكم :*
ريميل أعتبرها ماركة درق ستور ممتازة!
مرة أحب أرواجهم والمحددات والأكحال والباودر ستاي مات تكلمت عنهم كثير قبل وهذه المنتجين كمان كانو تجربة جميلة :)
حأبدأ بالفاونديشن وبعده البلاشر..
Rimmel Stay Matte Foundation
نوعه موس مطفي كاتبين عنه إنه خفيف عالبشرة يمنع اللمعة خلال اليوم ويخفف ظهور المسام.
متوفر ب ٨ درجات
سعره ٣٩ ريال تقريبا موجود بصيدلية بووتس وسنتربوينت
الفاونديشن له مميزات عجبتني وعيوب بس حاولت أعدلها.
بشرتي مختلطة/دهنية أول مرة جربته بالمحل حسيته مطفي وناعم عالبشرة مرة تحمستله وجربت الدرجات وأخذت الأقرب ليا..
عادة بالدرق ستور الدرجات محدودة! نادرا ألاقي درجتي بالزبط ودرجة ٢٠٣ كانت الأقرب أندرتونها بيج
الدرجة أفتح مني بتكة بسيطة أحب أخلط معاها نقطة من كونسيلر ماك برولونغ وير تخليه نفس درجتي وتخلي الأندرتون شوية أصفر،
أو ممكن أوزعه لوحده وأستخدم بودرة أغمق شوية ويطلع تمام.
الباكجنغ حقه علبة بلاستيك عصار عادية بس جدا عملية.
طريقة توزيعه:
أشوف الأفضل لتوزيعه بيوتي بليندر رطبة وهذا ريفيو كامل عنها هنا
أو ممكن تستخدمي فرشة بفنغ.. يحتاج توزعيه مزبوط لأنه مو مرة خفيف عالبشرة زي ماهما قايلين
وبرضو مو مرة ثقيل جاي بالنص!
أول ماتوزعيه تحسي شوية ثقيل بس بعدين يندمج ويصير طبيعي وماتحسي فيه.
مميزاته:
- مطفي ويمنع اللمعة ويجلس مطفي طول اليوم مع العلم إني أثبته ببودرة ستاي مات من ريميل.
- تغطيته متوسطة/عالية.
- سهل وسريع بالدمج.
- ثباته ممتاز مع الباودر.
عيوبه:
- الدرجة مو زابطة ١٠٠٪ زي ماذكرت بس حاولت أعدلها.
- مايغطي المسام بالعكس لو عندك مسام ممكن يبينها شوية وممكن يبين القشور في البشرة الجافة.
وبشكل عام صح مو بيرفكت بس ماتوقعته إنه يكون بيرفكت لأنه درق ستور وسعره رخيص يحتاج تعديلات بس حبيته!
وأكثر شيء عجبني فيه إنه ثابت ومطفي.. أكثر مشكلة أكرهها بالفاونديشن اللي يزيد لمعة وجهي أو اللي مايثبت خصوصا بالنهار وهذا ثباته حلو،
مشكلة المسام ممكن تحليها بإستخدام برايمر سيليكون زي حق سيفورا ينعم سطح البشرة أو بورفيشنال من بينيفت وراح يطلع جميل.
البشرة الجافة أعتقد ماراح يناسبها أو إستخدمي مرطب كويس قبله عشان مايبين القشور.
أختي جربته كمان ومرة عجبها بس برضو ماحبت الدرجة ههههه
Stay Blushed in Apricot Glow
نفس الملمس حق الفاونديشن كريمي موس وزي التنت يثبت.
مرة ثابت يعطي لون حلو وجدا طبيعي فيه نتفة شيمر بسيطة ماتبين أوفر بالعكس تعطي غلو حلو للبشرة
حبيته مرة! سعره ٢٥ريال بس من سنتربوينت وصيدلية بووتس وفيه ألوان ثانية أعتقد ٤ أو ٥ ألوان.
أنصحكم فيه خصوصا للجامعة والدوامات.
Daym ahshofh :)
ReplyDeleteIf i use benefit primer "15 hours flawless" stick one , will it be good?
l2n mshklty m3 al matt foundation daym y6l3 8shor :( m3 eno my skin m5tla6h.