Thursday, July 3, 2014

My Empties! ريفيو لمنتجات خلصتها!




اليوم التدوينة راح تكون عن منتجات إستخدمتها وخلصتها (وبعضها غصبت نفسي أخلصها لول)
أحب أشوف هذه البوستات لأن عادة لما تخلصي المنتج تكوني مجربته تمام وتقدري تحكمي عليه إذا حلو أو لا..

وأنا عندي عادة سيئة صراحة أستخدم المنتج ولما يقرب يخلص أسيبه وأشتري جديد :\
عشان كذا صارلي فترة أحاول أخلصهم كلهم،، منها عشان أعمل هذا البوست وكمان عشان ماأكون مسرفة لول
نزلت بوستين لمنتجات خلصتها بإنستقرام وهذه المرة في البلوق لأنها كثيرة شوية :*






مرطبات الجسم



LUSH Ro's Argan Body Conditioner 
مرطب بلسم للجسم توزعيه بعد الشاور وتغسليه يعطيك ترطيب حلو وريحة جميلة،، سويتله ريفيو قديم هنا
مرة حبيته خصوصا ريحته قوية أول ماتوزعيها بس نص ساعة عالجسم تهدا وتصير ناعمة وجميلة جدا
راح أرجع أشتريه إن شالله

The Body Shop Body Butters
مرة أحبهم! أستهلكهم بسرررعة لأن بشرة جسمي جافة ولازم بعد الشاور وقبل أنام أستخدمهم 
الشيا وجوز الهند والسبا وزدم أساسين يكونو عندي كل ماخلصت أخذهم.
باقي الروايح أغير كل فترة حسب إيش نازل عندهم جديد..
زبدة العسل مررررة جميلة ريحتها وترطيبها وكل شيء حبيتها مرة 
الخوخ حلوة بس طفشت منها. 

حتى ببوستات المنتجات اللي خلصتها بانستقرام أعتقد نزلت منتجات كثير مخلصتها من بودي شوب وصار لازم لي شوبينغ محترم عندهم p;



منتجات الشعر



LUSH Curly Wurly Coconut Shampoo
شامبو كيرلي ويرلي من لش مخصص للشعر الكيرلي ومن مكوناته جوز الهند
يرطب الشعر بس يحافظ على شكل الكيرلز ويعطيها Texture محدد يناسب البنات اللي شعرهم كيرلي أو ويفي ويبغو يخلو الكيرلز تبين أرتب..
حبيته مرة وحبيت نتيجته من جد أعطى الكيرلز لوك حلو ومرتب وممكن أرجع أشتريه بس مشكلته الوحيدة قطع جوز الهند تطفش عشان تنزل.

Lush Big Shampoo
سويتله ريفيو قديم هنا
شامبو مُنقي يستخدم مرة بالأسبوع ينظف الشعر من قلب وريحته منعششششة مرررررة أحبها من أجمل روائح الشمبوهات اللي جربتها وهي اللي تخليني أرجع أشتريه بإستمرار لول وطبعا نتيحته الجميلة..

Retread Hair Conditioner 
بلسم للشعر من لش ينفع للإستخدام المتكرر لأنه خفيف وترطيبه حلو يمكن أرجع أشتريه..

Yves Rocher Purity Shampoo
كمان شامبو يعتبر مُنقي ومرررة مناسب للي فروة شعرهم دهنية
ينظف من قلب كنت أحب أستخدمه بعد ماأزيت شعري لأنه ينظف الشعر مزبوط..
حاليا راح أخذ لش بيق بس مايمنع إني أرجع أشتريه. وعموما شامبوهات ايف روشيه ممتازة.

Garnier Fructis Style Hair Styling
بخاخ مثبت من غارنييه ريحته حلوة ويثبت بدون مايبين الشعر خشن ويعطي لمعة! أحسه أكثر بخاخ بيرفكت بالحياة لووول
لأن مهما كان البخاخ حلو إذا ريحته قوية مستحيل أستخدمه لأنها تثبت بالشعر ودايما أشمها بشعور البنات :\ هههه
فيه كمان بخاخ جميل من Indola نزيه نفس المميزات وريحته حلوة ولسا ماخلصته إن شالله أتكلم عنه ببوست ثاني.



منتجات الشاور



The Body Shop Shower Gels
أحبهم! برضو أغير حسب الروايح اللي نازلة عندهم بس نفس نوعية الشاور جل عندهم حلوة لأنها تنظف بدون ماتجفف الجسم وريحتها تثبت..
الباشن فروت جميييييلة ريحته خسارة إنه ليميتد لو نزل مرة ثانية أكيد راح أرجع أخذه
واللي بالعسل ريحته نفس كل المجموعة حبيتها.

Soap & Glory Clean On Me Shower Gel And Flake Away Scrub
مررررررة حبيتهم!!! ريحتهم لزيزة وثابتة
السكرب ينعم الجسم بشكل فظيع جدا جميل
الشاور جل برضو ينظف وريحته ثابتة ومايجفف الجسم مشكلته إنه علبته كبييييرة مرة طفشت عشان أخلصه ولسا ماخلص ترى لووول باقي يمكن إستخدامين تقريبا..
يعني إن شالله أرجع أشتريهم بس أحجام أصغر عشان ماأطفش منهم.

LUSH It's Raining Men Shower Gel
ريحته نفس صابونة العسل من لش :(
أعشقها الريحة وقد نزلت في إنستقرام أبغى لوشن وعطر نفسها بس مالقيت :(

على فكرة خلصت كم صابونة وBubble Bar من لش بس نسيت أصورهم قبل لا يخلصو :/

عموما لش من محلاتي المفضلة للعناية بالجسم والأسترخاء والدلع
جربو صوابينهم ومنتجات الإستحمام والشعر وكل شيء تقريبا لوول 
ماأفتكر جربت شيء من لش وماعجبني بالعكس دايما أرجع أشتري منهم..

Victoria Secret Mango Temptation Shower Gel
معلومة عني: أنا أكره المانجو! مااحبها ولا أحب ريحتها
هذا الشاور جل أخذته بالغلط بس ماحسيته نفس ريحة المانجو جميل بس ماراح أرجع أشتريه لول

شاور جلز فكتوريا سيكريت مو واو بس أحب أستخدمها مع مجموعاتهم تكمل الريحة وتثبتها أكثر ومجموعتي المفضلة عندهم بيور سيدكشن.



كريمات اليد


LUSH Lemon Flutter Cuticle Butter
زبدة لمحيط الأظافر بريحة الليمون أي شي ريحته ليمون ١٠٠٪ يعجبني p;
ترطيبها عالي وتدهن زي الزيت تقريبا بس مرة جميل للي يعانو من جفاف حوالين أظافرهم زيي وممكن تستخدميها للأكواع والركب وأي مناطق جافة بجسمك..
مرة جميلة والعلبة تحسي حجمها صغير بس تكفيك وقت طوييييييل جدا لأن ماتحتاجي إلا كمية قلييلة منها..
راح أرجع أشتريها إن شالله.

Jergens Enriching Shea Butter Cream
عندي كذا مرطب من جيرجنز نفس هذا وموزعين بكل مكان شيء بالشنطة وشيء عند السرير وشيء عالمكتب 
أعتبره مرطب سريع وخفيف وريحة الشيا أحبها.
إشتريته أكثر من مرة.

L'occitane Shea Butter Hand Cream
مرطب يد من لوكسيتان بزبدة الشيا ترطيبه عاااالي جدا أستخدمه قبل ماانام وأصحى يدي قمة النعومة..
المفروض أجيب الشى هذاك اللي يعصر الكريم ويخلي شكله مرتب زي الناس :|

Aqua Therapy Mineral Hand Cream
مرطب جميل مايدبق نهائيا بس ترطيبه يجلس وقت طويل
ممكن أشتريه مرة ثانية بس فيه كثير مرطبات تعطي نفس نتيجته..



منتجات البشرة


 LUSH Tea Tree Water Toner 
تونر بزيت شجرة الشاي من لش يناسب البشرة الدهنية والمعرضة للحبوب ( الريفيو هنا )
مررة أحبه ومشتريه منه علبة ثانية
أحطه بالتلاجة وأستخدمه بعد الغسول يقلل من الحبوب ويعقم البشرة واللي أحبه فيه إنه مافيه كحول..

Clinique Liquid Facial Soap
غسول من كلينيك للبشرة الدهنية عندي كل المجموعة حقة البشرة بس أول شيء خلصته الغسول لول
الغسول حلو ينظف البشرة بدون مايجففها أو يحسسها أو يطلع حبوب
إن شالله برجع أشتريه ومنتجات كلينيك بالبشرة ممتازة.



منتجات المكياج



MAC Fix+
منتج أساسي عندي من ٨ سنين!
دايما كل ماقرب يخلص أخذلي واحد جديد واولريدي أخذت واحد تشوفوه إن شالله ببوست مشتريات قريب.

MAC Brush Cleanser
كمان منتج أساسي نفس الفكس بلس ومن زمان أستخدمه
ينظف الفرش ويعقمها بشكل سريع Spot cleaning 

Sephora Waterproof Eye Makeup Remover
مزيل مكياج العين من سيفورا هذا الحجم سامبل وكان عندي تقريبا ٣ أو ٤ زيه 
صراحة ماينظف ولا يشيل المكياج الا بصعوبة نزلو نوع جديد بالجل لسا ماجربته إن شالله يكون أفضل منه.

Maybelline Gel Eyeliner
جل أيلاينر راااائع!! عندي أسود وبني ولأن الجل لاينر ينشف بسرعة أضطر أرميه قبل لا يخلص 
بس نفس الجل أول ماآخذه جميل وكريمي وسلس بالرسم وسواده حلو.. أخذته مية مرة وبرجع أخذه إن شالله.

Sephora Liquid Eyeliner
أعششق هذا الايلاينر وأدري أغلبكم عارفين إني أحبه لوول
أغلب البنات اللي أعطيتهم دورات القاه عندهم ويقولولي من كثر مامدحتيه أخذناه هو وكم منتج كمان :*

عندي منه ٢ جدد تشوفوهم إن شالله بالمشتريات p;

MAC Opulash Mascara in SAMA
 ماسكارا من ماك إسمها أوبلاش واللون أزرق كحلي إسمه سما،، نزلت بكولكشن فن العيون السنة اللي فاتت 
صراحة ماإستخدمتها الا كم مرة بس لأن  صارلها أكثر من ٦ شهور خلاص مااقدر أستخدمها

لونها مررة حلو تحت العين ونوعية الماسكارا جدا مكثفة وفيه منها لون أسود موجود على طول بماك.

Benefit They're Real Mascara
أعتقد مايحتاج أقول ولا كلمة عن هالماسكارا! 
من سنتين أول ماجربتها الى الآن وهي ماسكرتي المفضلة مالقيت أي ماسكارا ثانية تعطيني نفس نتيجتها :*
عندي باك اب كثير منها p;


مفضلات الغرفة



بخاخ من باث اند بودي ووركس
هو للجسم بس ماادري ليش ماارتاح لمنتجاتهم حقة الجسم! :( 
استخدمه لمفرش السرير ريحته سويت ماراح أرجع أشتريه.

معطر غرفة من سنتربوينت بالأورنج
أستخدمه لمفرش السرير والستاير عادي صراحة ريحته ماتثبت نهائيا أو يمكن أنا تعودت عليه.
 أحلى شيء لتعطير الغرفة الفواحات هي اللي تثبت وريحتها قوية خصوصا فواحات بودي شوب وزهور الريف..

دوبي إفتكرت إني خلصت شموع من ايكيا وباث اند بودي ووركس وسنتر بوينت بس نسيت أحطهم مع المنتجات :\


وبس أتمنى عجبكم البوست إن شالله كل فترة راح أنزل نفس هالبوستات سواء هنا أو بالانستقرام :*
أشوفكم إن شالله بالبوست الجاي وإحتمال يكون تكملة لسلسلة ماك p;



❤❤

Twitter | Instagram | Email



5 comments:

  1. ماشاء الله مدونة حلوة و
    ريفيو عن منتجات جميله وراح أحرب ماسكارابنفيت أن شاء الله
    Thank you very much

    ReplyDelete
  2. بوست جداً جميل
    عندي بغرفتي هناك درج حاطه فيه الاغراض اللي خلصتها على اساس بسوي هالبوست
    زي ماقلتي احسه جد الوحده جربت الشي اذا خلصته وتقدر تحكم عليه
    شامبو كيرلي ويرلي كان مره نفسي فيه ! مع انه شعري موكيرلي بس ابيه يرتب الويفي بشعري بدون بلسم بعده بس للأسف ماحصلته بلش بجده لمارحت :( يمكن ارجع هاليومين عساني الاقيه
    حمستيني على مرطب الارقان من لش والتونر شكلي بشتريهم
    وشامبوهات ايف روشيه جربت اثنين وكلهم حلوين جداً حتى البلاسم من عندهم جميله < سلكي لوالجمع غلط ههههه
    كريم لوكسيتان واضح انه مره محبوب ههههههه تحمست له مع ان بشرتي موجافه بس عندي ادمان ترطيب :p

    يعطيك العافيه على التدوينه الجميله جداً
    دايم اتابعك واتابع تدويناتك اول بأول بس للاسف قليل ارد :(
    وانتي والله تستاهلي ان شاء الله بتعلم وابدأ ارد :p

    رمضان مبارك (F)

    ReplyDelete
  3. تحمست لشامبو كيرلي ويرلي ،
    لأني ماقد جربت شامبو ضبط لي الكيرلي بدون نفشة
    اﻻ مجموعة وحدة للشعر مرة أخذته من صالون ولعد لقيت زيها :(
    ان شاء الله أجربه لمن أخلص الي عندي
    ﻷني صراحة أثثثق ثقة عمياء ب آرائك للمنتجات :$

    ReplyDelete
  4. بوست جدا جميل وكتير استفدت منه
    بالزات منتجات لش
    حطيت كم برودكت في الويش ليست
    بالنسبة للجل ايلاينر وانهم ينشفوا بسرعة
    في قطرة في انجلوت ممكن تستخدمي كم قطرة منها تساعد انها ترجعها زي ما كانت
    وكل ما نشفت ممكن تعيدي عليها نفس الطريقة
    حبيت اني اساعدك ولو بشي بسيط ♡ =)

    ReplyDelete
  5. بوست مفيد جداا

    يعطيك العافيه

    ReplyDelete

Related Posts Plugin for WordPress, Blogger...